BAWIPAI’ DUHMI NUN DAAN

“Curuangah nan nun daan ahhin ralring uh. Mi aa bangin nung hlah uh; a fimmi bangin nung uh”

(Efe. 5:15).

Baibal sungah Pathian ih duhmi nun daan thuhla tampi a um. A sersiammi minung pawl nitin kan nunnak ah tuah ter in duhmi thu tampi in sim. Cumi nun daan ding pawl cu kan thei cawk lo ih kan thlun cawk fawn lo. Cumi nun daan ding tampi sungin Paul in Efesa 5:15-20 sungih a simmi thuhla hmangin thazaang lak tlang uhsi.

1. Nun daan ralring ding.

Paul in zumtu pawl kan nun daan ahhin ralring cio dingah in forh. A hleice in mi aa bangin nung dingah in siang lo, mifim bangin nung cio ding hi in duhsak a si (Efe. 5:15). Kan nun daan ralring ding kan ṭulmi pawl cu kan ṭong daan, kan cangvaih daan, kan caan hman daan, kan tlanlen daan tivek pawl tampi a um. “Mi hmuhsuamnak ṭong a ṭongtu cu mi aa a si. Mifim na si ahcun na ṭong suup aw” (Thuf. 11:12). Thu ṭhatein a ruattu cun mi aa nun daan ziang a siih mifim nun daan khal ziang a si timi cu nitin kan nunnak in siseh, ca a phunphun le Baibal ca sung in siseh kan thei cio ko ding.

2. Caan hman daan thiam ding.

Atu kan san hi nitin tein a ṭha lam hnakin a sia lam ah in fehpi rero ti cu kan thei cio. Curuangah caan ṭha kan neihmi pawl cu man nei zetin hman thiam ding a ṭul (Efe. 5:16). Minung hrangih caan hman ṭhat a ṭulzia kha in theifiang ter. Minung in no lai caan, ṭuan thei lai caan, cah lai caan, remcan lai caan tivekin kan nei thluh. Cuih caan pawl kan hman thiam ding a thupi ngaingai. Caan ṭha timi hi a sunglawi tukmi a si. Mi tampi cun kan caan hi man nei lo zet le sullam nei lo zetin kan liamter men ṭheu. Baibal in kan caan ṭha man nei lo menih liamter men cu in siang lo. Ei le ih lawngin caan cemter lo ding a ṭul (Thuf. 23:21). Kan tikcu caan hi zualkotu hnakin a zamrang sawn a si (Job. 9:25). Curuangah caan hman daan thiam ding hi a thupi ngaingai.

3. Thlarau in khat sawn ding. 

Thlarau ih kan khah ding hi Baibal ih in sawmmi a si (Efe.5:18). Minung cu thinlung, taksa le thlarau tiin komkhawm ih nungmi kan si. Mi tampi cun thinlung le taksa hrang lawngah kan caan kan hmang ih thlarau hrangah zianghman kan ruat dah lo. Curuangah Thlarau in kan khah thei ding kha in duh saknak a si. Thlarau khat lo ih kan cangvaihnak pawl cu tisa hnaṭuan hlir a rak si. Tisa duhnak thlun in zu kan in, kan ri, kan buai. Zu in cu mi hmuhsuam tonnak a si (Thuf. 20:1). Baibal sungah Thlarau in a khatmi pawl thuhla kan hmu. Zakhariah cu Thlarau in a khat ih Pathian thu a sim (Luk. 1:67). Thlarau in a khatmi hruaitu pawl an hril (Tirh. 6:5). Antiok khua ih dungthlun pawl cu lungawinak le Thlarau in an khat (Tirh. 13:52). Thlarau Thianghlim ih kan khah lawngah kan cangvaihnak ah Pathian a sunglawi ding a si.

4. Pathian thangṭhat ringring ding.

Lungawi thu sim in Amah thangṭhat ringrng ding hi Pathian duhmi a si (Efe. 5:20). Pathian in kan parah thil ṭha a phunphun in tuahsak ih catbang loin in kilkhawi ringring. Curuangah lungawi thu sim hi kan tuah ding hrimhrim a si. Paul ih nunnak kan zoh tikh ziangtluk harsatnak a tong khalle Pathian thangṭhat in lungawi thu a sim ringring (Tirh. 16:25; Fil. 4:4,6). Kan parih Bawipai’ ṭhatnak tinkim pawl ruatin Pathian hnenah lungawi thu simin thangṭhat ringring ding kan ṭul a si.

Thunetnak.

Nitin kan nunnak ah kan nun daan ralring in mi aa si lo ding hi a ṭhupi ngaingai. A fimmi bangin kan nung cio ding a ṭul. Mi aa si lo in Bawipa in tuahter in duhmi kha hawl tum sawn dingmi kan si. Curuangah kan nun daan ralring in, caan hman daan thiam in, Thlarau thawn khat sawn in Pathian hnenah lungawi thusim le thangṭhat ringring ding hi Pathian duhmi zumtu nun daan pawl an si.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

August 13, 2016|Saturday|11:30pm.