PATHIAN IH THU

“Pathian ih thu cu a nungih a cak fawn. Kap hnih hriam ralnam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlang thei a si. Milai thinlung ih duhnak le ruahnak tla a thei thluh a si” (Heb. 4:12).

Himi Baibal caang in zum lotu pawl an hmu ngah lomi kha ralrin peknak a si. Himi sungah “Pathian ih thu” ih thil ti theizia a langter. Mi tampi cu zum lotu pawl vekin Pathian ih thu kha zianghman ah an siar lo. Cubangtuk zumtu tuini ah an karhzai rero thlang. Himi hi ţihnungza nathrik pakhat a si. Curuangah Hebru cangantu in Pathian thu ih thi ti theizia kha a simfiang duhmi a si. Pathian thu ih a sinak ziang pawl an si timi hi a tanglam vekin kan zohtlang ta hnik ding.

1. A nung ih a cak.

Leitlun thu tampi hi a nung tiah kan sim theimi a um lo men ding. Hmakhatte sung cu a cangvai thei nain caan a rei tikah hngilh sal men a si ţheu. Sikhalsehla Pathian ih thu hi a nung, a cak tiah kan hmu thei. Pathian thu a nung ruangah kum tampi sung, mi tampi ih nunnak sungah a cangvai thei a si. Zum lotu tampi khal harsat hniksaknak tampi lak ihsin “zumtu” ah a cang ter hngai a si. Curuangah Pathian ih thu hi a nung ih a cak tiah kan sim thei a si. A thi a si ahcun zianghman a cangvai thei lo dingih huham cahnak kha a nei hrimhrim lo ding a si.

2. Kap hnih hriam ralnam hnakin a hriam sawn.

Kap hnih hriam ralnam hi ral nam lakah a ţhami phun khat a si an ti ţheu. Ral an do tikah kap hnih in mi a sat thei ruangah ral nam ţha pakhat ih an ruahnak a si. Cuvekin Pathian ih thu khal hi kap hnih hriam ralnam vek lawng si loin cumi hnak hmanin a hriam sawn, tiah Baibal in a sim. Pathian thu ih thil ti theinak cu minung nunnak ah kan lungruhmi pawl khat lam ihsin a tongtham ngah lo hmanah minung ih ruah ban lomi phun dang deuh in mi a tongtham thei a si. Minung ih thu in thil ti theinak tampi a um ţheu hman sehla cumi vek men a si lo, cumi hnakin hmual a nei sawn a si.

3. Nunnak le thlarau an ton awknak le hlikhlok le thlik an peh awknak tiang a suntlang thei.

Minung kan thil titheinak in mi ih thinlung sung suntlang ko in thil a ti thei thluh lo. A lenglam lawng hi a tongtham ban a si. Sikhalsehla Pathian ih thu cu minung ih thil titheinak hnakin hmual a nei sawn. Pathian thu cu nunnak le thlarau an ton awknak le hlikhlok le thlik an peh awknak tiang a suntlang thei, tiah Baibal cun fiangzet in a sim. Sunglam sung muril tiang a tongtham thei. Zianghman lo kan si ko nain Pathian in a seherh ih a zawn a ruat ringring a si (Saam 144:3).

4. Milai thinlung ih duhnak le ruahnak tla a thei thluh.

Milai thinlung sungah midang ih theih ban lomi thuthup le duhnak tampi kan nei. Cumi cu kan kiang ih a ummi pawlin in theisak thei lo. Sikhalsehla Pathian cu ziangkim tithei Pathian a si vekin a thil titheinak hi minung ih ruah ban lo tiangin a si. Minung kan thinlung thup ih kan ruahmi, kan duhmi zate, ziangvek hmun ih kan um hmanah in hmu ih a thei thluh (Saam 139). Pathian in a thei lomi thil pakhatte hman a um lo a si.

Thunetnak: Pathian in minung in sersiam ih a sersiammi lakah a seherh bikmi kan si. Nitin kan nunnak ah Pathian thu cu kan ke hrangah mei-inn a siih kan lamzin hrangah tleunak a sizia kha cingkeng ringring uhsi (Saam 119:105). Pathian ih thu hi menmen ah ruat loin kan nunnak sungah thupibik hmun ah kan ret thei cio ding hi a thupi ngaingai a si.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

October 8, 2016|Sat|8:30pm.