BAWIPA ZANRIAH

~1 Kor. 11:24-25.

A tlangpi thu in October zarh hmaisabik hi leitlun huap Bawipa Zanriah hmanni (World Communion Day) a si. Himi ni ah Pathian zumtu pawl hmankhawmmi Bawipa Zanriah cabuai pawl zatein pehzom thluh sehla peng 25,000 tluk a sau ko ding. Zumtu Khristian zatein Bawipa Zanriah hmang cio dingah pumkhawm thluh bang sehla mipum ting 14,000 tlun kan kim ko ding. Cuih Bawipa Zanriah a hmangtu ding zumtu mipi pawl hi midum, misen, mirang ti thleidan um loin hmangkhawm thluh dingmi a si.

(Hitin hman thei dingih hram a thoktu cu Presbyterian kawhhran ih Hugh Thomson Kerr a siih 1933 kum ah an kawhhran ah an hmang thok. Bawipa Zanriah hi zumtu zapi thawn pehparmi a si ruangah Presbyterian lawng si loin zapi huap (ecumenical) le lungawinak (eucharist) ih hman dingin 1940 kum ah Jess Moren Bader in National Council of Churches in USA sungah hman dingah thu a than. Cuticun leitlun huap in a karhzai ih tuini tiang leitlun huap in kan hman tlangnak a si).

Cuih Bawipa Zanriah ih a teltu pawl hrangah a thupimi pakhat cu Bawi Khrih ah pawlkomnak tumpi kan neih hi a si. Paul in, “Judah mi le Zentail mi tiah thleidan a um nawn lo” tiah a sim (Gal. 3:28). Bawipa Zanriah cabuai khalah thleidannak a um lo. Jesuh ih thinglamtah hram ah hmunkhatte komkhawm aw thluhmi kan si.

1. Bawipa Zanriah a hmangtu pawl cu “thuthangţha” a congahtu pawl kan si.

Misual kan si ko nain sualthlahnak a cotu pawl kan si. Cuih thuthangţha cu “lungawiza thuthangţha” a si. Bawi Jesuh cu cuih thuthangţha a si. Cuih thuthangţha cu Jesuh Khrih ah hrambunmi a si. Kanmahtein kan tuah thei lomi cu Pathian in Jesuh Khrih hmangin in tuahsak famkim thluh zo. Cumi cu misual kan sinak hmuahhmuah in khuhsak thluh ih Pathian thawn pawlkom theisalnak a si. Minung pawl sualthlahnak kan ngah ruangah Pathian a lungawi. Pathian zaangfahnak le duhdatnak a co tlakmi mi famkim, mi ding zohman kan um lo nain Pathian in famkimtein in co ter thluh zo. Cuih a duhdawtnak, zaangfahnak le rundamnak thuthangţha cu mi hmuahhmuah ih nunah neih ter dingah Pathian in a duh bikmi a si.

2. Bawipa Zanriah a hmangtu pawl cu Jesuh Khrih zumtu pawl kan si.

Paul le Silas te pa hnih cu Filipi thawng sungah an um laiah Pathian thangţhatnak hla an sak ih thawnginn sangka pawl a ong thluh. Kut khihnak thir cikcin khal a phoih qheh. Thawnginn kiltu cu a ţih tuk ruangah amah le amah thah awk a tum. Cule mangbang vansang in Paul le Silas hnenah, “Rundamnak ngah dingah ziang ka tuah ding?” tiah a sut tiah “Jesuh Khrih zum aw,” tiah an sim. Cubangtukin tuini Bawipa Zanriah a hmangtu pawl khal Jesuh Khrih a zumtu pawl kan si. Jesuh Khrih a zumtu pawl cu Jesuh Khrih ih zirhmi thu pawl cohlang in nunpitu pawl kan si. Curuangah mai’ duhnak hnakin Pathian ih duhnak thupi sawn ah kan ret a ţul. Zumnak timi cu kan thluak sungih sia-ţha theihtheinak lawng si loin kan thinlung sungih tuarnak (feeling) thawn komkhawmmi a si. Cuih zumnak cu zumtu ih kan nunnak hrangah a hrampi a si ringring a ţul.

3. Bawipa Zanriah a hmangtu pawl cu Pathian hmaiah pumkhat kan si.

Minung timi cu mahte lawng um a theih lo. Pakhat le pakhat lungrual pawlkomnak neiin um dingmi kan si. Pawlkomnak timi cu pakhat le pakhat pehtlaih awknak a si. Kawhhran sung thuhla pawlah thinlung hmunkhat le bangrantein lungrualzetin ţuantlang dingmi kan si. Leitlun hmun tinkim ah kan um khalle Kawhhran zate hrangah thinlung hmunkhat neiin thlacamsak ding kan ţul. A ţulnak vekin bawm-awton dingmi khal kan si. Thlacamnak, bawm-awknak, a hnaţuan ţuan tlangnak in Pathian hmaiah pumkhat kan sinak langter ringring ding kan ţul.

4. Bawipa Zanriah cu Bawipa Jesuh hngilh lonak ding hrangah a si.

Jesuh Khrih thawngin Pathian ih duhdawtnak a phuanlangmi pawl hngilh lotein thei ringring ding kan ţul. Bawipa Zanriah cu Pathian ih duhdawtnak kha a tharin langternak a siih Bawi Jesuh in amah hngilh lonak ding hrangah in timtuahsakmi a si. Kan cinken ding thupizetmi cu  “Kanmah misual pawl hrangah Bawi Jesuh in thinglamtah parah a nunnak liamin in runnak thu” hi a si. Kawhhran timi cu “Jesuh Khrih a hngilh thei dah lotu zumtu pawl hmunkhat ah komkhawmnak hmun” a si. Himi caan ah Jesuh Khrih lawng si loin sankhat hnu sankhat Jesuh Khrih hrangah nun a liamtu zumtu hmaisa pawl khal hngilh lo ding a ţha. Thukam thar ih tarlangmi Khrih ih Kawhhran timi cu “thinlung hmunkhat neiih thlacam ringringtu mibur” sinak kha a si. Hmun dangdang ah um cio khal sehla pakhat le pakhat mang aw in hngilh aw siang lotein thlacam sak awk ringringmi kawhhran kan si a ţul.

Thunetnak.

Bawipa Zanriah kan hmang tikah a tanglam thu 4 pawl hi kan cinken ding a ţul.

1. Dunglam zohkir salnak: Bawipa Zanriah kan hmang tikah zumnak ih hrampi a siih a thuanthu zatein mangsal kan ţul. Jesuh Khrih ih tuarnak, thihnak pawl hi kannih zumtu pawl hrangah a si (1 Kor. 11:24).

2. A lenglam thlirnak: Bawipa Zanriah cabuai kan pan tikah Jeuh Khrih cu midang hrangah a nunnak a liam bang tukin kannih khal kan kiang ih ummi nautabik pawl hrangah ţuan ding kan ţulzia mangsal a ţul. Nautabik pawl hrangah duhdawtnak le duhsaknak thawn kan tuahmi pawl hi Jesuh Khrih parih kan tuahmi a si ti kha mang cio uhsi (Mat. 25:40).

3. Tlunlam zohnak: Bawipa Zanriah ruangah Pathian thawn pehzomnak kan ngahsal a si timi kha cing ringring kan ţul.

4. Hmailam thlirnak: Kan nunnak ah sawmngiarnak pawl le thil a phunphun kan tong vivo lai ding. Jesuh Khrih ih duhnak kha thei ringring in hmailam ah nor vivo ding kan ţul.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

October 1, 2016|Sat|8:55pm.