KHAWVEL DAAN AH KOP NAWN HLAH

“Hi khawvel daanah hin kop nawn hlah uh; cuhnak in nan thinlung kha tharthawh tahratin thleng aw sawn uh. Cutiin Pathian ih duhnak cu nan thei dingih Pathian ih hmaiah ziangso a ṭha, ziangso a lungawi mi a si tile ziangso a famkimmi a si ti nan thei ding” (Rom 12:2).

Himi Baibal cang kan siar tikah Pathian in a fale pawl hi leitlun khawvel mi nun daan ih nung dingah in sian lozia kan hmu thei. Ziangruangah Pathian in khawvel daan ih nun ding in siang lo a si pei? Khawvel daan ih kopmi minung pawl cu ziangtin an nung? Himi thu thawn peh aw in khawvel daan ah kop ih nun daan pawl cu ziangmi pawl an si timi zoh tlang hnik uhsi.

1. Mah le mah an ret thupi aw.

Pathian mi pawl hrangah Pathian hi kan ziangkim a si. Sikhalsehla khawvel mi, Pathian thei lomi, pawl cun Pathian hnakin mah le mah thupi ah an ret aw sawn. An tlunah Pathian in thu a nei timi hi an pom thei lo, an cohlang thei lo ih a ruat khal an ruat dah lo. Fimthiamnak, lennak, hlawhtlinnak, hminthannak tvp. an neihmi kha mai’ zuamnak le taimaknak ruangah a si tiah an ruat. Ziangkim sersiamtu Pathian a um lam hman an thei ban nawn lo. “Bawipa in mihngalhngawng pawl cu a hua. Cuvek pawl cu hremnak in a luatter lo ding” (Thuf. 16:5). Zumtu pawl kha cuvek ih nun ding Pathian in in siang lo. Zumtu diktak cun Pathian hnakin mah le mah thupi ah kan ret aw lo ding a thupi.

2. Leitlun thil hi thupi ah an ret sawn.

Leilung mi kan si hrih ruangah leitlun thil pawl ziang siar lo ih umsan men ding cu a theih lo. Minung cu thinlung, taksa, thlarau ih nung kan si. Curuangah thinlung le taksa hrang kan ruat a ṭul. Cuvek in thlarau nun khal thupi ah kan ruat a ṭul. Pathian nei lo mi tampi cun thlarau lam thil hrimhrim hi an ngaihsak paih lo. Milian mi aa pa bangin leitlun ih duhkhop an ngah ih an nom ahcun a tawk tiah an ruat (Luk. 12:16-21). Pathian thei lo khawvel mi pawl cun leitlun hi kumkhua a hmun dingah an ruat ih khawvel duhnak thlunin caan an hmang. Cuticun leilung thil hi thupi ah an ret sawnnak a si. Baibal in, “Hi leilung le a sungih thilri hi tlaihsan hlah uh; hi leilung hi nan tlaihsan a sile Pathian duhdawtnak nan nei lo a si… Leilung le a sungih ummi thilri, milai ih an tlaihsanmi pawl hi an hloral vivo zo; asinain Pathian duhnak a tuahtu cu kumkhua in an nung ding”, a timi kha cing ringring kan ṭul (1 Joh.2:15,17).

3. Biaknak hi a leng mawinak men in an hmang.

Tuini zumtu nun sungih ṭih a nung zetmi pakhat cu Pathian thu hi a lenglam lawng in thei ih mi tampi ih nunmuril ah Pathian thutak a um lo hi a si. Nu le pa, pi le pu zumtu an si ruangah a hmin men zumtu an tam tuk zo. Zumtu mi tampi cun Pathian biak le Pathian lam thil pawl hi a lenglam mawinak men ah an ruat. Pathian khal harsat caan ih mi bawmtu ding le buainak an ton tikih tawlrel saktu ding fang men ah a biatu an tampi. Pathian hrangih thungai thlak in hman awk hi sanman lo le aat hna, farah zonzai bom awknak men ah an ruat. Curuangah Paul in, “Kan biaknak hi a lenglam cun an pom ding; asinain a sunglam ih an cahnak hmual ngaingai cu an hnong ding. Cubangtuk minung pawl cu kom hlah uh,” a ti (2 Tim. 3:5). Pathian thutak sungah thungai thlak in nung ding a ṭul ngaingai.

Thunetnak.

Pathian a thei taktak lotu khawvel mi pawl cun tisa hiarnak ih duhzawng hlir in an nung. Mah le mah an ret thupi aw ih an nun ah Pathian ṭihnak hrimhrim an nei lo. Santiluan ih fehpimi, “Na duhduh in nung aw, na duhduh tuah aw, na tlunah zohman in thu an nei lo, nangmah na thuthu si ko,” tvp. ah diriam in an nung. “Cuvek in nung hlah, Pathian in a duh lo”, tivek ih simmi thu pawl cu an ngai paih lo, an duh lo. Cutin a simtu cu san man lo santiluan dawi ban lo tluk ah an ruat. Pathian thu sim khal le Pathian ih duhdawtnak le a tthatnak lam lawng ngainuam an ti. Nunsimnak lam hi ngai ding an duh hrimhrim lo. Curuangah Paul in, “Hi khawvel daanah hin kop nawn hlah uh; cuhnak in nan thinlung kha tharthawh tahratin thleng aw sawn uh. Cutiin Pathian ih duhnak cu nan thei dingih Pathian ih hmaiah ziangso a ṭha, ziangso a lungawi mi a si tile ziangso a famkimmi a si ti nan thei ding”  tiah in sim hngai a si (Rom 12:2).

Duhdawtnak le Duhsaknak thawn,

 

Rev. Dr. Hrang Hmung, D.Min., Ph.D.,

Toungphila, Kalaymyo.

August 27, 2016|Saturday|11:00pm.