BAWIPA IH HMAI AH

“Bawipa hnenah na nunnak pe aw; Amah rinsan awla a lo bawm ding… Bawipa ih hmaiah daitein um aw, Amah ih cangvaihnak cu thinsau in hngak aw,” (Saam 37:5, 7).

Minung tampi cu kanmai’ thil ti theinak le hlawhtlinnak kan comi ruangah Pathian zianghman siar duh lo in kan um pang ṭheu. Sikhalsehla Baibal ca sungah in sim ringring mi cu Pathian rinsan ding, a hnenah nunnak pek aw ding, a hmai ah daitein um ding, amah ih cangvaihnak pawl kha thinsau in hngak ding tvp. a si ringring. Curuangah kan biakmi a nung Pathian hi ziangkim ti thei Pathian a si timi thu hi cingkeng ringring in A hmaiah daitein a kutcak lang dingmi hngakin um thiam ding hi a thupi ngaingai.

1. Kan nunnak pe ding.
Kan nunnak hi Bawipai’ pekmi a si. Curuangah zumtu cun Pathian hnenih ziangkim kan ap thiam ding hi a thupi zet. Kan biakmi a nung Pathian cu ziangkim ti theitu a si. Kannih minung pawl cu Amai’ sersiam cop mi kan si. Pathian hnenan kan nunnak ziangkim kan ap hnuhnu cun kan nunnak cu Pathian kut sungah a um. Huham cahnak ziangkim a neitu Pathian kutah ziangkim a um ahcun hnangam ding lawng a si thluh. Kan um daan ding, kan nunnak, kan neihmi thilri le kan ziangkim hi Pathian hnenah kan pe thluh ding a ṭul. Pathian hnenih ziangkim ap dinghi Saam cangantu ih in zirhmi khal a si. Zumtu diktak cun Pathian hnenah kan nunnak pek aw in a duhnak sawn in in uk dingih lam in hruai ding hi a thupi sawn a si.

2. Amah rinsan ding.
Pathian rinsan ding timi hi Baibal ih in zirhmi a si. “Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah,” (Thuf. 3:5). Milian le mifim pawl rinsan ding a ti lo. Pathian in Amah rinsantu hmangin a kutcak langter ṭheu. Baibal sung hmun tampi ah Pathian rinsantu pawl an zumnak an hngetzia, a kutcak an langterzia thu pawl kan hmu thei. Curuangah ziang tinkim ah Pathian rinsan thiam ding hi a thupi zetmi a si. Kan minungpi pawl kan rinsan ding a ṭul caan a um ko nain a netnak tiang in ṭanpi thei thluh lo ding. Pathian a rinsantu pawl cu ziangtik khalah Pathian in a tlansan dah lo. Pathian in amah rinsantu hmangin a kutcak a langter ṭheu. Cun Pathian in a kutcak a langtermi pawl kan zoh tikah a hrilmi minung pawl le amah a rinsantu pawl hmang in a cangvai ṭheu a si.

3. A cangvaihnak cu thinsau in hngak ding.
Minung hrangah thil harzet pakhat cu hngah hi a si. Thu pakhat khat ruangih hngah ṭulnak a um tikah thinsau in hngak ding hi a ol lo ngaingai. Cubang pawl hrangah cun hngah caan hi a rei duh cuang. Thinsau ih kan hngak thiam ttheu lo ruangah mi tampi cu mualpho in an um ṭheu a si. Minung pawl Pathian cangvaihnak ah lungkim loin kan thin a sau ṭheu lo hmanah  Pathian cu amah remruat cia mi vekin a cangvai ringring. Tlai khal a tlai dah fawn lo, tikcu caan khel in hna a ṭuan ringring ṭheu. Pathian kutcak lang dingin thinsau in a hngak theitu cun a caan a kim tikah Pathian in an hrangah an ṭulmi pawl kha famkim zetin a pe tengteng ko ding.

Thunetnak.

Zumtu diktak kan si ahcun Pathian ih cangvaih ding kha thinsau tein kan hngak thei a ṭul. Thinsau ih kan hngak thei lo ruangah ziangpipa kan tuahsuak thei cuang lo ding. Pathian cu ziangkim ti thei Pathian a si vekin a caan khelin a cangvai ringring ṭheu. Curuangah Bawipa ih hmaiah daitein um in, Amah ih cangvaihnak cu thinsau in kan hngak cio ding hi a thupi zetmi a si.

Duhdawtnak le duhsaknak thawn,

Rev. Dr. Hrang Hmung. D.Min., Ph.D.,

Camkhat Yangon.

September 10, 2016|Saturday|1:00 am.