SIHTE HNEN IHSIN ZIRNAK

“Mi zaangzel pawl cun sihte khi va zoh seh. Sihte nuncanzia zoh in zir seh” (Thufim 6:6).

Minung a phunphun kan um. A hrek cu mi law zet an siih a hrek cu mi zaangzel an si. Mi law pawl cu cat bang loin hna an ṭuan ringring. Ṭhanso ding ruatin taimak suahin hna an ṭuan ih hlahtlinnnak an ngah. Sikhalsehla mi zaangzel pawl cu zianghman tuah duhmi an nei lo. Hna an ṭuan paih lo ih an ṭuan khalle sim tlak lo te lawng an ṭuan. Cuih sim tlak lo an ṭuannak cun an hrangah ṭhansonak zianghman a pe thei lo. Mi hrek in, “zaangzel hi a hmin a sia menna, minung hrangah a hahdam zet si lawm” tiah an sim ṭheu. Zaangzel ruangah ṭhansonak zianghman a suahpi hrimhrim dah lo.

“Nauhak pawl hrial dingmi zaangzelnak phun 6” tiah tlawng ca ih kan zir dahmi biazai te cu: a dai tuk aw, a sa tuk aw, khua a thim thlang, a tuan tuk hrih, ka ril a rawng, ka pum a puar tuk, timi pawl tla an si. Himi pawl phuahlam ah hmangin hnaṭuan paih lonak a suahpi thei.

Thufim 6:7-8 ih a simmi Sihte pawl ih nuncanzia cu (a) hruaitu upabik le lal le uktu an nei lo, (b) asinain ṭhal sungah rawl an khawl ih thlatang hrangah timtuah in an ralring cia. Sihte pawl hi hruaitu an nei lo nain an zatein taimak suahin hna an ṭuan thluh. Zo in a ṭuan deuh, zo in a ze deuh tiah nun sim awk rero khal a um lo. Anmah le hnaṭuan an ṭuan cio. Rannung an si ko nain tikcu caan an hmang thiam. Ṭhal caan rawl hawl a theih lai ah cat loin an tawi, an vak ih rawl an hawl, an khawl. Cuticun thlatang a thlen tikah an khur sungah an lut ih an khawl ciami rawl an ei sal. Curuangah Sihte hnen ihsin zir dingah Thufim ngantu in a simmi a si.

1. Zaangzel in itthat men nawn hlah uhsi.

Hna ṭuan paih loin zaangzel le itthat ih kan um sungah farahnak cu kawh ṭul loin a ra thleng mai ding. Cuticun ziangtik lai khalah tlasam in a um ding a si (Thuf. 6:9-11). Bawi Jesuh khalin sualforhnak sungih tla lo dingah itthat loin tho uhla thlacam uh, a ti (Luk. 22:45-46). Mi zaangzel pawl hi ol-tein len theinak ding lamzin an hawl, ṭhat lonak tuah in lennak an hawl nain a netnak ah a hloral thluh sal ṭheu. Zumtu cu zaangzel in itthat men ding kan si lo. Khristian thuanthu kan zoh tikah zumtu hmaisa pawl zaangzel in itthat men loin taimak suahin an zumnak an phuan ruangah thuthangṭha a karhzai theinak a si. Zaangzel in itthat men ta sehla Khristian biaknak hi khui hman ah a thleng, a zai thei lo ding.

2. Taimak suahin hna ṭuan uhsi.

Paul in, “Nan hnenih kan um laiah khan, ‘Hna a ṭuan duh lotu cu rawl khal ei hlahseh,’ tiah kan lo sim ṭheu. Hiti ih kan lo simnak cu nanmah sungah mi hrekkhat zaangzel in an um ih hnaṭuan zianghman zuam loin midang hnaihnawh lawng an thiam. Cubangtuk ih a nungmi pawl hnenah felfai teih nung dingah le mahih pumcawmnak hrang ṭuan ve dingah Bawi Jesuh Khrih hminin kan lo forhfialmi le ralrinnak kan pek duhmi an si,” a ti ( 2 Thess. 3:10-12). Tuini milian, mifim tampi hi an nun lamtluan ah taimak suahin a zuamzetmi pawl lawng an si. Thufim ngantu in, “Mi zaangzel in sumsaw a nei dah lo ding. Asinain mitaima pawl cu an lian ding,” a ti (Thuf. 11:16). Curuangah taimak suahin hnaṭuan cio ding kan ṭul. Zumtu kan si cio vekin zumnak kan neihmi hi ṭuannak in kan langter ding a ṭul (Jeim 2:26).

Thunetnak.

Zaangzelnak in ṭhatnak zianghman a suahpi dah lo. Zaangzelnak in farahnak, zianghman ṭuan duh lonak, a lakih ngah duhnak pawl a suak ter ih hlawhtlinnak a suahpi dah lo. Kan zumnak ṭhansonak hrangah, thuthangṭha karhzainak ding hrangah, kan kawhhran ṭhansonak hrangah taimak suahin kan zuam cio a ṭul. To men ding a rem thiam lo. Zaangzel men in ṭhansonak zianghman a suahpi lo ding. Curuangah taimak suahin mah le ti theitawk taimak suah ih hnaṭuan cio dingah Sihte hnen ihsin taimak suahin hnaṭuan daan zir dingin Thufim ngantu nih in forh a si.

Duhdawtnak le duhsaknak thawn,

Rev. Dr. Hrang Hmung, D.Min., Ph.D.,

Toungphila, Kalaymyo, Myanmar.

July 16, 2016|Saturday|8:30pm.