A FAMKIM LE PITLINGMI

“U le nau pawl, nan hnenah hniksak harsatnak a phunphun a thlen tikah mi vannei kan si tiah ruat aw uh; ziangahtile nan zumnak in cubangtuk hniksak harsatnak nan neh tikah tuar theinak a ra, ti nan thei. Tlaksamnak zianghman um loin a famkim le pitlingmi nan si theinak dingah a net tiang a tuar theitu si dingah zuam uh” (Jeim 1:2-4).

Leitlun mi zovek khalin ziangkim ah famkim thluh ding kan duh nain harsat hniksaknak cu kan tuar duh hrimhrim lo. Zumtu pawl nitin kan thlacammi kan zoh tikah harsat hniksaknak ihsin kan luat theinak ding hrangah kan cam ṭheu. Kan thei cio ding a ṭulmi cu hniksaknak um lo in zianghman a famkim thei lo ding. Hniksaknak kan tuar thei ahcun minung hrangah pitlinnak in co ter ding a si. Tlawngah camipuai kan tuah ṭheumi hi tlawngta pakhat kha namthlak ding hrangah si loin a tu hnakih sang deuh a kai theinak ding hrangah a si. Curuangah remcang lomi le hniksaknak kan ton tikah tha nau in um men ding a si lo. Pitlin lam kan pan theinak ding hrangah nun in rem rero a si tiah kan cohlang thei ding a ṭul.

1. Hniksaknak in tuar theinak a karhzai ter.

Minung pawl hniksaknak kan tonmi hi sullam nei lopi kan tonmi a si lo. Kan nunnak ṭhangso ter in duh ruangah Pathian in harsat caan in tong ter. Cutin harsat hniksaknak kan tuar tam ahcun tuar theinak a suahpi. Tuar theinak hi minung hrangah nitin kan ṭulzetmi sinak pakhat a si. Cuih tuar theinak in nitin kan nun ah famkimnak co dingah in fehpi vivo. Curuangah Jeim in, “Tlaksamnak zianghman um loin a famkim le pitlingmi nan si theinak dingah a net tiang a tuar theitu si dingah zuam uh,” a ti (Jeim 1:4).

Tuar theinak kan nei ahcun kan nun hrangah sambau mi zianghman a um lo ding. Cule kan tuar theinak in ziangkim a remṭhat ter vivo. Thlarau nun khal a famkim ter vivo. Phundang in kan sim a sile zumtu pawl kan thlacamnak ah harsat hniksaknak tong lo dingin thla kan cam ahcun tuar theinak le famkimnak ka co duh lo ti thawn a bang ding a si. Hniksaknak kan tongmi hi tuar theinak karhzai tertu a si timi hi kan cingkeng ding a ṭul.

2. Mi lungawi ah in cang ter.

Zumtu pawlin harsatnak le remcang lonak kan tonmi kha riahsiatza, beidongza ah kan ruat ringring a si ahcun kan nunnak in siatsuah ter sinsin ding. Pathian in a duhdawtmi a faate pawl kha ziangtik hmanah a ṭha lomi in tuahsak dah lo ding tiah kan rinsan ngam a ṭul. Zumtu cun kan nunnak ah harsat hniksaknak a thleng ahcun lungawiza a siih kan ṭhansonak hrangah a si tiah kan hmu thiam ding a ṭul. Harsat hniksaknak a um tikah kan lungawi thei lonak hi ziangruangah a si pei? Kan zohnak hmun a dik lo ruangah a si thei. Paul in 2 Korin 4:18 sungah caan pahnih thu a sim. Cumi cu “hmuh theimi” le “hmuh thei lomi” caan pawl an si. “Hmuh theimi” cu “caan tawite sung lawng a awh” ih “hmuh thei lomi” cu “kumkhua a daih a si,” a ti. Atu kan hmuh theimi zohin kan nung ahcun sunralnak kan hmu ko ding. Sikhalsehla hmuh thei lomi kumkhua daih caan ahcun sunlawinak a si leh ding. Curuangah tuih caan lawng zoh loin kumkhua hrangah kan zoh thiam ding a thupi.

Tlangpar thuzirhnak ah Bawi Jesuh in, “Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si. Nan lungawi in nan aipuang uh, ziangahtile nan hrangah tuarman tampi vancungah ret a si,” a ti (Mat. 5:11-12). Curuangah zumtu kan si ruangih kan tuarnak pawl hi a lak a si lo. Hmailam thu saupi ruatin kan hmu thiam a ṭul. Pathian ih in hmuhmi pawl kan hmu thiam ding a ṭul a si.

Thunetnak.

Harsatnak cu nan pa ih pekmi nunsimnak a si tiin tuar hram uh; ziangahtile harsatnak nan tonmi hin Pathin in a faate ah a lo ruat a si ti a langter. A pa ih nun a sim lomi fa a um dah kel maw? (Heb. 12:7).  Piter in, “A harsazet hniksaknak nan tuar ruangah hin mangbangin um hlah uh; zohman ih an ton dah lomi harsatnak kan parah a thlengce tiin ruat hlah uh. Khrih ih tuarnak a hlawm-awmi nan si ruangah nan lungawi sawn uh. Cutiin nan ti a sile a sunlawinak a lang tikah nannih cu lungawinak in nan khat ding,” a ti (1 Pit. 4:12-13). Curuangah a famkim le pitlingmi kan si theinak dingah a net tiang a tuar theitu si dingah zuam uh, tiah Jeim in in forh a si.

Duhdawtnak le duhsaknak thawn,

Rev. Dr. Hrang Hmung, Ph.D.,

Toungphila, Kalaymyo.

October 22, 2016|Saturday|11:50pm.