PATHIAN LUNG TONGMI

Baibal thianghlim kan siar tikah kan thil tuahmi pawl sungah Pathian lung tongmi le lung tong lomi thuhla pawl kan hmu thei. Cumi sung in unau suahpi sungah Pathian lung tongmi le lung tong lomi thuhla tla an um. Ziangvek hi Pathian lung tongmi a siih ziangvek cu Pathian lung tong lomi a si timi thuhla zoh in Pathian thutak sungah thazang thar lak tlang cio uhsi.

1. Kain le Abel (Seem. 4:1-16).
Seemtirnak sungah Kain le Abel tei’ unau Pathian hnenih raithawinak an pek timi thu kan hmu. Kain cu Pathian hmaiih raithawinak a tuah tikah amai’ duh daan vekin a tuah. “Caan a hung rei deuh tikah Kain cun a lo sungih a suakmi rawl pawl kha Bawipa a pek” (Seem. 4:3). Amai’ duh daan vekin a pek ruangah a pekmi parah Pathian a lungkim lo ih Pathian lung a ton lonak a si. Mai’ duh daan ih Pathian biak hi ttihnungza a si.

Abel cun Pathian duh zawngin a biak. Pathian hrangah uimi a nei lo. “Abel khalin a tuu faate suak hmaisa bik pawl a that ih a sa tthatnak bik Bawipa a pek ve” (Seem. 4:4). Hitiin a hmaisa bik le a tthatnak bik a pek ruangah Pathian lung a tonnak a si. Pathian lung kan tonnak ding cu kanmai’ duhzawng si loin Amai’ duh zawngih kan biaknak hi a si. Kain le Abel tei’ unau lakah Abel cu Pathian lung tongmi a si.

2. Esau le Jakob (Seem. 25:19-34).
Isaak le Rebekah in faphir an nei. An hmin ah Esau le Jakob tiah an sak. Esau cu upa deuh a siih Jakob cu nauta sawn a si. Esau cu sakap ramtawi a siih Jakob cu midai a si. Isaak in Esau a duh deuh ih Rebekah in Jakob a duh sawn. Esau cu a rilrawn tuk ruangah fatir sinak cu rawl malte men thawn Jakob hnen ah a zuar siang mai. Cuihtlunah a neihmi thluasuah covo kha tthatein a kilkhawi lo. Fatir a sinak a covo cu zianghman ah a siar lo (Seem. 25:32). Cuihtlun ah ramdang nupi tthit in nu le pa thinhar tertu ah a cang (Seem. 26:34-35).

Jakob cu a nu ih duhnak thlunin a pa lungkim tertu a si. A nu ih bomnak vekin thil ttha a tuah ngah ih hleiah Pathian lung a tong a si. Pathian a rinsan ih thlah duh loin thluasuah a dil ruangah Pathian in thluasuah a pek (Seem. 22-29). Esau le Jakob tei’ unau thuhla kan zoh tikah Jakob cu Pathian lung tongmi a si.

3. Martha le Mari (Luk. 10:38-42)
Bawi Jesuh le a dungthluntu pawl cu Martha tei inn ah khual an tlung. Martha cu khualdarnak hrangah a buai nasa. Bawi Jesuh hnakin leitlun thil thupi ah a ruat. Leitlun thil hi kan ttulmi a si ko nain thupi bikih ret ding cu a si lo. Martha hin a nau Mari in hnattuan a bawm duh lo ruangah a ngaih lo. Curuangah Bawi Jesuh in, “Martha, Martha! Nang cu thil tampi parah helhkam le awloksong in na um; a ttul ngaingaimi cu pakhat lawng a si. Cumi cu Mari in a hril ngah ih zohman in an long nawn lo pei,” a ti (Luk. 10:41-42).                

Mary cun Pathian thu kha pakhatnak ah a ret. Bawipa ih kehram ah um hi nuam a ti. A ttul ngaingaimi cu Mari in a hril ngah ih zohman in an long nawn lo dingmi a si. Curuangah Pathian lung a tonnak a si. Pathian lung tongih kan nun ding hi a thupi ngaingai.

Thunetnak.

Zumtu nitin kan nunnak ah Pathian lung tong lomi kan si pang ding hi cu ttihnungza a si. Pathian lung kan tonnak le ton lonak cu kan nuncan, kan tuahmi parah a um. Ziangkim kan tuahmi hi Pathian ih lungkimmi le lung tongmi a si maw, a si lo, tiah Baibal sirhsan in kan nunnak ah cekfel awk ringring ding kan ttul.

Duhdawtnak le duhsaknak thawn,

Rev. Dr. Hrang Hmung, D.Min., Ph.D.,

Toungphila, Kalaymyo.

July 30, 2016|Sat|4:45pm.