IN BAWM IH IN CAKTERTU

“Zianghman ṭih hla, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding. Ka lo hum dingih ka lo run ding,” (Isa. 41:10).

Zumtu kan nunnak hi Pathian tel locun zianghman a si lo. Mi tampi in kanmai’ thil ti theinak, fimthiamnak, lennak, sungkhat unau tampi neihnak, sungtel mipum tampi neihnak tvp. rinsan in Pathian ka ṭul lo tiah kan ruat pang ṭheu. Sikhalsehla cumi pawl cun thil titheinak rikhiah an nei. A netnak ih thu neitu cu Pathian a si. Minung kan nunnak ah nitin do dingmi ral a tam, ton dingmi harsatnak hlir in a khat. Cumi sung ihsin Pathian a rinsan taktaktu pawl ih nun ah Pathian in a kutcak a langter ṭheu. Kan nunnak ah in bawmtu ṭhabik le kan cau tikih in caktertu cu kan biakmi a nung Pathian lawng a si.

1. Joshua le Jerikho khua kulhnak (Josh. 6:6-20).

Josuah le a ralkap pawlin Jerikho khuapi lak dingin an tum. Jerikho khua cu fektein an kulh ih kotka khal a hngetzetmi a si. Cumi khuapi Joshua hnenah pe dingin Pathian in a ralkap hmangin thu a sim cia (Josh. 5:14-15). Bawipai’ simmi vekin Joshua le a ralkap pawlin Jerikho khua cu nikhat ah veikhat in ni ruk sung an vel. Ni sarihnak ah Jerikho khuapi cu vei sarih an vel tikah puithiam pawlin tawtawrawt cu an phawt. Joshua in a minung pawl hnenah au dingin thu a pek. Mipi in napi in an au ciamco tikah khuapi kulhnak ralhruang cu a cim rupri. Pathian rinsan in an thangṭhat ruangah Bawipai’ bomnak thawngin Joshua le a ralkap pawlin Jesikho khua cu an nehsuak thei a si.

2. Gideon le a ralkap (Thuṭhen. 7:1-25).

Gideon in Judah pawl ih ral a simi Midian mi pawl thawn an do awk laiah Pathian in nehnak pe dingah thu a kam cia (Thuṭhen. 7:9). Curuangah ral do dingin an timtuah tikah ralkap thawng thawng sawmthum le thawnghnih an kim. Cumi cu Pathian in a tamtuk a ti ruangah a netnak ah ralkap zathum lawng a hril. Cuih ralkap zathum pawl in Midian ral an do tikah tawtawrawt pakhat ciar le a sungih meisa van ciami thawl pakhat fingfing an keng. Ral an do daan cu “Pathian hrangah le Gideon hrangah ralnam,” tiah an au ciamco ih an kenmi thawl cu an khuai. Minung zoh daan ahcun ral nehnak ding thu a um hrimhrim lo. Sikhalsehla Pathian ih bomnak le cahnak thawngin Midian pawl cu an nehsuak thei a si.

3. Thawnginn sungih Paul le Silas (Tirh. 16:16-34).

Filipi thawnginn sungah Paul le Silas cu nasazet in vuak an tuar hnu ah thawnginn sungta khaan sungah a rit zetmi thingtum pahnih in an hreng. Zanṭim laiah Paul le Silas cu thla an cam ih Pathian thangṭhatnak hla an sak. Cutikah rin lopi ah nasazet in ling a hnin ih thawnginn cu a tawhram tiang in a hnin ṭheh. Hmakhatte ah sangka pawl an ong aw ṭheh ih thawngtla pawl hmuahhmuah ih kut khihnak thir cikcin cu an phoih aw ṭheh. Hivek dinhmun ah minung ruahnak cun thil cang thei lomi dinhmun a si. Sikhalsehla Pathian bomnak le cahnak thawngin Pathian a rinsan ih thlacam le thangṭhatnak a petu pawl hnenah fiangzetin a lang a si.

Thunetnak.

Nitin kan nunnak ah kan tonmi buainak, harsatnak, ral donak pawl hi kanmai’ thazaang cahnak in kan neh thei lo caan tampi a um ko ding. Pathian cu kan hnenah a um ruangah zianghman ṭih ding a um lo. In bawm ih in cakter ding a si. In hum dingih in run ding a si. Pathian rinsan in kan ziangkim Amai’ kut sungah ap cio uhsi.

 Duhdawtnak le duhsaknak thawn,

Rev. Dr. Hrang Hmung, D.Min., Ph.D.,

Toungphila, Kalaymyo, Myanmar.

July 23, 2016|Saturday|11:00pm.