“Sikhalsehla kanmah ih sual ruangah hriamhma a pu. Thil ṭha
lo kan tuah ruangah vuaknak a tong. Hremnak a tuarmi cu kan damnak a si.
Vuaknak a tuarnak cu kan rundamnak a si” (Isaiah 53:5).
Himi Baibal caang hin thinglamtah parah Bawi Jesuh ih a tuar
dingmi thu pawl a sim ciami a si. Minung pawl damnak kan ngah theinak ding
hrangah Bawi Jesuh in hremnak a tuar timi cu minung pawlah Pathian ih
duhdawtnak ziangtluk a tum timi langternak a si. Pathian in minung pawl dam ter
in duh. A famkimmi lungawinak in co ter duh. Harhdamnak hi minung hrangah a
thupi zetmi a si. Kan dam lo tikah sumsaw ziangtluk kan nei ih, sinak dinhmung
ziangtluk kan sang hman ah, ziangtluk hminthangmi kan si hman ah nomnak
zianghman a um lo. Bawi Jesuh vuaknak a tongih hremnak a tuarnak pawl hi kan
damnak hrangah a si. Himi pawl hi thihnak neh in a thosaltu Bawi Jesuh thawngin
a famkim thluh a si. Amen.
1. Natnak ih hramthawhnak.
Pathian ih sersiammi leilungah tarnak, natnak, thihnak timi
a um lo. Pathian in minung pawl cu Eden hmuandum sungah ziangzongza famkim
zetin a sersiam sak thluh. Sikhalsehla minung in Pathian thu ngai loin thlemnak
dung a thlun ihsin thokin leitlun ah natnak a rung lut. Natnak hi Pathian
duhnak el ruangih a suakmi a si. Curuangah minung pawl natnak tuarih kan um hi
Pathian ih duhnak a si lo. Miphar pakhat cu Bawi Jesuh hnenah ra in, Bawipa na
duh ahcun i dam ter thei a si tiah a dil. Cutikah Bawi Jesuh in ka lo dam ter
duh a si a ti ih tlunah damnak ngah in a thiang ter a si (Mat. 8:1-2; Mar.
1:40-45; Luk. 5:12-16). Pathian in minung pawl dam ter a duhzia kan hmu thei a
si.
2. Damnak petu Pathian.
Pathian in a mi Israel mi pawl sal tangnak hmun ihsin an
luat tikah “Keimah cu a lo damtertu Bawipa ka si” tiah a phuang aw (Suah.
15:26). Israel mi pawl hnenah Izipt ram ihsin an kenmi natnak pawl a dam ter
duh ruangah a si. Curuangah Pathian cu minung pawl dam tertu Pathian a sizia
kan hmu thei. Bawi Jesuh leitlun a rat hnu lawngah Pathian in mi a dam ter a si
lo. Thukam Hlun san lai ihsin thokin Pathian cun natnak a phunphun ihsin dam tertu
Pathian a si.
3. Mi hmuahhmuah damnak a pek.
Ralbawipa Naaman cu Siria siangpahrang ih rinsan zetmi a
siih ral pawl a neh ringringtu a si. Cumi cu Pathian in a bawm ruangah a si (2
Siang. 5:1). Sikhalseh Naaman cu ziangvek siibawi thiam khalih dam ter thei
lomi phaarnat a tuar ngelcel. Ral ziangtluk neh in siangpahrang ih rinsanmi
siin sumsaw ziangtluk nei hman sehla a tuarmi phaarnat ihsin zohman in an dam ter
thei lo. Pathian in Israel miphun sal nunau te hmangin Profet Elisha hnenah a
thleng. Elisha ih fialnak vekin Jordan tiva ah vei sarih a hnim awk tikah a
damfel sal. Cuih damnak ruangah Naaman nunnak cu Pathian lamah a thleng aw a si
(2 Siang. 5:17-18). Curuangah Pathian in
mi hmuahhmuah damnak a co ter tiah kan hmu thei.
Thunetnak.
Minung hmuahhmuah damnak a co tertu Pathian cun tuini kan
tuarmi natnak zate ihsin dam ter thlun in duh. Curuangah natnak a cang tertu
kan sualnak pawl cu siirnak thawn a hnenah pan ter ding in duh. Bawi Jesuh amah
rori in kan ai-ah a tuar thluh zo timi cu cu zum aw, phuang aw, cohlang aw.
Cuticun sualnak huham natnak cu kan sungah hmun a la thei nawn lo ding. Hremnak
a tuarmi cu kan damnak a si. Vuaknak a tuarnak cu kan rundamnak a si. Bawi
Jesuh in kan zate hrang ai-awh in thihnak a tuar ih a thosal zo a si timi zum,
phuang, cohlang ding lawng hi kan tuah ṭulmi
a si.
~Rev. Dr. Hrang Hmung, D.Min., Ph.D.,
Toungphila, Kalaymyo.
April 15, 2017|Saturday|10:22pm.
No comments:
Post a Comment