(Temptation and Test)
Hi leitlun kan nunnak ah a bang aw
thluhmi thil a um thei lo. Kan hmel a bang aw lo, kan ruahnak, kan duhnak a
bang aw thluh thei lo. Bang aw zik vekin a um na’n a bang aw thei ngaingai dah
lo. Cutin a bang aw lomi tampi sungah zumtu hmuahhmuah in kan ton bang rep
tlangmi cu a tlangpi thu in thil phunhnih a um. Cumi pawl cu thlemnak
(temptation) le hniksaknak (test) tla an si. Zumtu nitin kan nun ah hi thil
phunhnih hi a tong lo zo hman kan um lo. Kan thei le thei lo thu lawng a si ko
ding. Ziangahtile hi thil phunhnih kan ton tikah zaran hrangah cun theihthiam a
harsa ngaingai. Khuimi deuh hi thlemnak a siih khuimi deuh sawn hi hniksaknak a
si timi thu hi theihthiam dingah a harsatzetmi a si.
Curuangah Bawipai’ Thlarau Thianghlim
hnen ihsin kan ngahmi fimnak siar lo cun theihthiam a har ngaingai. Ziang a si
khalle hi thil phunhnih ih um daan cu hitin rel tum hnik sehla; “Thlemnak” cu
duh a nung lomi kan ral a siih “Hniksaknak” cu kan hrangah duhnungza a si, tiah
kan ruat ahcun a palh lem lo ding. Hi thil phunhnih thu hi a tanglam bangin a
tawizawngin kan zoh tlang hnik pei.
1. SUALFORHnak (Jeim 1:13-15)
A hmaisa ah ‘thlemnak’ lole ‘sualforhnak’ ih umzia maltein kan zoh
duak hnik ding. “Sualforhnak/Thlemnak” timi cu ṭong
dang in kan sim asile bumnak a si. Kan
duh lomi duh koin in lem, in hruai ih a netnak ah siatnak ah in thlenpi.
Curuangah “thlemnak cu Satan hnenin a ra ti sehla kan palh lo ding”. Jesuh
tihnimnak a lak ṭheh hnu hramlak ah ni
sawmli sung rawl loin a um hnu ah Jesuh hnenah Satan a ra ih sualforh a tuahnak
thu kan hmu (Mat. 4:1-11).
‘Thlemnak timi cu Pathian hnenin a ra dah lo ih Satan hnen lawng
ihsin a ra ṭheu a si’. Curuangah
thlemnak hi kan hrangah duhnung lo, ṭihnungza
kan ral tumpi ka tinak a si. Bawipa Jesuh Khrih khalin tirhthlah pawl hnenah
hitin a sim: “Sualforhnak sungih tla lo dingin itthat loin thlacam uh”
(Mat.26:41, Mar.14:38). Sualforhnak (thlemnak) hi kan hrangah a ṭha
lomi a si. Satan kan hnenih a rat tikah kan hrangih thilṭha
veikhat hman a keng dah lo. Kan hrangih thilṭha
vekin a lang awter ih a dunglam ah kanmah siatsuahnak lawng a keng ṭheu
a si.
Zumtu tampi in cuih thu cu kan theihfiang thei dah lo ruangah kan
rak cohlang pang ṭheu.
Cuticun kan thlarau nun siatnak ah in thlenpi ṭheu
a si. Satan hnenih kan hmuhmi thlemnak pawl kan theihthiamnak dingah cat bang
loin thlacam ringring ding hi a ṭul
ngaingai mi kan hriamhrei a si. Satan ih a ralṭhatnak
zawn cu zumtu hnenah thlemnak thawn in ra pan ṭheu
hi a si (Mat. 4:1.11, Heb. 4:15). Kannih zumtu menmen sim loin kan Bawipa Jesuh
rori khalin thlemnak hi a tong ve ti hi kan theih ciomi a si. Hebru 2:18 ah, “Amah rori in sualforhnak le harsatnak a
tuar zo ruangah atu ah sualforhnak a tongmi pawl a bawm thei a si,” tiah kan
hmu thei.
Cuihtlunah 1 Korin 10:13 sungah,
“Hniksaknak nan tonmi pawl hi midang hnen khalah a thleng ṭheumi
sualforhnak a si ko. Sikhalsehla Pathian cun a thukammi a kimger ih nan tuar
thei lo ding tiangin hniksaknak a thlenter lo ding. Hniksaknak nan ton tikah
nan tuar theinak dingah thazaang a lo pe dingih cuticun nan luatnak dingah
lamzin a lo sial sak ding,” tian kan hmu. Zumtu kan vanṭhatnak
cu Jesuh amah rori in thlemnak a tong zo ruangah thlemnak tuartu pawl a bawm ṭheu
hi a si. In bawm theitu umsun khal a si. Jesuh ih in bawm daan pakhat cu
tlansuahnak in tuahsaknak hi a si. Thlemnak na ton caan ih na tlansuah duh lo a
si ahcun mualpho takin na siatsuah aw ding. Thlemnak cun dungtolh dingin le
Pathian duh lo zawng tuah dingin in hruai. Pathian hmin simsiat a sinak dingah
in fehpi. Thlemnak kan tonnak san cu Pathian thawn pehzom thei lo dingin le
hlat aw in kan um ding hi Satan ih a tumtahmi cu a si.
Curuangah zumtu ralring tein kan um hleiah thlemnak a si ti kan
theih ah cun hnong lohli thei dingah thlaza cam ringring kan ṭul.
Thlemtu hi a um men lo ih thlemnak khal kan hmai ah a um ringring a si, ti hi
ziangtik hman ah hngilh hram hlah uhsi.
2. Hniksaknak (James 1:12)
“Hniksaknak” cu Pathian hnenin kan hnenah a ra ṭheumi a si. Kan Pathian in thilsual a tuah dah lo,
a ṭhami le a famkimmi lawng a
tuahtu a si. Curuangah hniksak ih kan ummi hi Pathian in thilsual a tuah
ruangah a si lo. Kanmah zumtu lam sawn in hlawknak kan ngah theinak dingah in
bawmtu a si sawn. Curuangah Jeim 1:2-3 ah, “U le nau pawl, nan hnenah hniksak
harsatnak a thlen tikah mi vannei kan si tiah ruat aw uh; ziangahtile nan
zumnak in cubangtuk hiksak harsatnak nan neh tikah tuar theinak a ra ti nan
thei”, ti ah in ti. Vei tampi ah hniksaknak timi hi kan hrangah duh um lo le
harsa zet vekin a ra lang ko. Sikhalsehla kan hrangih kan hmuh thei lonak
hmunah thilṭha thup aw in a um
ringring a si.
Baibal in ziangruangah hniksaknak nan tong khal le lungawi uh a
tinak a si pei? Hniksaknak hi ziangruangah kan tong ṭheu
a si pei? “Kan nun pitling le famkim theinak ding hrangah a si,” ti hi Baibal
ih in simmi a si. Kan hrangih thilṭha a
si ruangah kan tongih Bawipai’ duhzawng le lungkimmi a si ruangah kan tongmi a
si. 1 Piter1:7 ah, “Curuangah nan lungawi uh! Harsatnak a phunphun nan tonmi
ruangah can tawite sung riahsia in um hman uhla lungawi in um thotho uh!
Ziangahtile hi harsatnak nan tuarmi cu nan zumnak a ngai maw ngai lo ti theihnak
dingah a si. A siat theimi sui hman meisa in hniksak a si ṭheu.
Cubangtuk in sui hnakih a sunglawi sawnmi nan zumnak cu harsatnak a tuar suak
theitu si dingah hniksak a ṭul
ve a si. Cule Jesuh Khrih a lang Ni ah thangṭhatnak
le sunlawinak le upatnak nan ngah ding a si,” in ti.
Cuih tlunah1 Piter 4:12 sungah, “Ka duhdawtmi ka rualle uh, a
harsazet hniksankan nan tuar ruangah hin mangbangin um hlah uh; zohman ih an
ton dah lomi harsatnak kan parah a thlengce tiin ruat hlah uh. Khrih ih tuarnak
a hlawmawmi nan si ruangah nan lungawi sawn uh. Cutiin nan ti asile a
sunlawinak a lang tikah nannih cu lungawinak in nan khat ding,” in ti hrih a
si. Pathian faate cu a lem kan um lo ruangah hniksaknak hin kan nunnak diktak a
sizia a langter ṭheu. Cuih nunnak diktak
cu zum lotu pawl hmai ah kan langtger dingmi a siih Pathian sunglawinak kan
langternak khal a si.
Hniksaknak kan ton tikah Pathian in
tumtahmi a nei ringring ti hi kan hngilh lo a ṭul.
Job 23:13-14 ah, “Pathian cu a thleng aw dah lo; zohman in an dodal thei lo
dingih a tuah duhmi cu zohman in an kham thei lo ding. Kan hrangih tumtahnak a
neihmi pawl a kimter ding. Cuih tumtahnak tlunah tumtahnak dang tampi a nei,”
ti kan hmu thei. Pathian in in hniksak tikih tumtah a neihmi cu kan sinak
taktak langter a duh ruangah a si. Tuar theinak kan neih ding a duh. Cuticun
hman tlak kan si thluh thei ding a duhmi a si.
Thunetnak
Curuangah zumtu pawl hniksaknak kan
ton tikah phunzai mai lo ding a ṭul
ngaingai. Kan tonmi hi sualforhnak/thlemnak a si maw? hniksaknak sawn a si?
timi hi theifel ding kan ṭul.
Pathian in kan parih tumtahnak a neihmi pawl kha theifiang kan tum sawn ding a ṭul.
Cumi kan theihfiang theinak dingah thinlung tak in thlacam kan ṭul.
Cuticun Pathian in fiangzetin in
theihter ko ding. Nitin kan nunnak ah zumtu rinsantlak kan siih
lungawimi kan si ringring theinak dingah hniksaknak hi kan tong sawn a si ti
kan thei cio ahcun kan hna a ngam ko ding. Kan nunnak hmangin Pathian a
sunglawi sinsin ding.
Casiartu nan zate parah Pathian
thluasuahnak catbang loin thleng ringring seh! Amen.
Duhdawtnak
le duhsaknak thawn,
Rev.
Dr. CJ Hrang Hmung
PCU, Manila, Philippines.
No comments:
Post a Comment