MIFIM SI KAN CU ZO.

Atu kan san ah fimthiamnak hi a sang tuk zo. Nitin ser tharmi thil a phunphun a suak thar ringring. Cumi sungah kan theih ban lomi thil tampi a um ko ding. Kan thei ban cawk nawn lo. Pathian thu khal hi khuahlan kum thawng tampi lai ihsin an sim cia rero zomi a si. Atu khalah sim a si rero lai. Hitin sim le phuannak ah mi tampi hip theinak dingah thu a phunphun hmangin simphuang san a si. Zirhsual tampi a thleng thei. Curuangah fimkhur zetin thleidan thiam ding kan ṭul. Mi aa vekin um a theih nawn lo, mifim si dingah napin zuam kan ṭul ding. Mifim kan si theinak dingah kan ṭulmi ziang a si ti theiin zirh awknak tampi lakin Baibal ih sim le zirh duhmi hi ṭhate’n kan theifiang a ṭul ding. Kan theifiang deuh theinak dingah Socrates ih thuhla tawite thawn a tanglam vekin tarlang ka tum hnik ding.

Vei khat cu Grik ram Athens khua ah mifim rinsantlak si a duhzettu mino tlangval pakhat a um. Cu pa cu an khua ih mifimbik tiah mi zapi ih an upatmi Socrates hnenah a feh. Mifim rinsan tlak a si theinak ding ziangtin a tuah ding ti thei duh ah thu a sut.

Socrates cu khawruahnak lam thu ah thinlung takin a sim a rel ṭheu na’n caan tampi ahcun daite ih um duhtu a si. Cuih mino pate ih thu suhmi cu sawn lohli loin tipi kap ah a fehpi. Vei tampi ah Socrates in ka ih ṭong rero hnakin mah rori hmuhtonnak ihsin fimnak ngah theinak dingah mi a zirh ṭheu.

          Tipi kap an thlen tikah hnipuan phoih loin tipi sung lam panin a feh. Mino tlangval pa khal a hnen rat dingin a ko. Ngam dok, ngam lo dok in cuih tlangval pate cun a thlun ve. Tidai hngawng tiang thuknak hmun an thlen tikah Socrates in cuih mino tlangval cu rin lo laiah tidai sungah a lu in a nam. Mino tlangval pa khal a ṭang, a cangvai ve nasa. Sihmansehla Socrates cun a thlah duh lo. Reizet tidai sungah a hnim hnu ah a thaw thawt thei loin a thih hlante ah a thlah sal. Mino pa khal thaw thawt ding thli hawpin napin a ṭang. A ka sungah cite ti mallai a lut bet ih a buai ngaingai. Socrates in thah i tum si lo maw? tiah thinhengzet in Socrates to a tum. Culaifangah Socrates cu tipi kap ah a thlengsal zo. Tipi kap a thlen ve tikah thinheng zetin, “Ziangruangah tidai sungah i hnimthat tum?” tiah a hei sut. Socrates cun a thusuhmi sawn loin thu a hei sut sal ve. “Tidai sungih thaw thawt na sam zet laifangah na nun sungih na duhbikmi ziangso a si?” a ti.

Mino tlangval pa cun sawn lohli ding a thei lo. A ruat ṭha hnu ah, “Thli hawp ding hi ka ṭul bik. Thaw ka thawt theinak dingah thli hi ka ṭul bik” tiah a sawn.

Cutikah Socrates in, “A si, tidai sung na um laiah thawthawt ding na ṭultuk vekin fimnak khal cuvek in na duhtuk asile ni nikhat ah mifim rinsantlak pakhat na cang tengteng ding” tiah a sawn.

          Tuisun zumtu pawl khalin thusimtu tampi ih anmah le ti thei daan a phunphun hmangin in zirhmi cu ngai nuam ti menin ka thlun pang lo ding a ṭul. Baibal ih zirhmi diktak kan theifiang theinak dingah simfiangnak pawl ṭhate’n kan zoh a ṭul. Kan Falam ṭongte’n simfiangnak hna ṭuan rero mi hi thapek cio in a suakmi cabu pawl khal thupizet in lei le siar cio ding kan ṭul. Cutikah mi aa bangin mi ih an phuahcop thuphan pawl kamnal zutzo le thusim thiam zet pawlih bum reromi kan si nawn lo ding. Kanmah rori mifim dinhmun cuh in theih duhmi theifiang dingin kan zuam a ṭul. Kan ṭulmi ziang bik a si ti thei in zuam nasa ding kan ṭul. Kan ram, kan miphun sungah mifim tampi kan ṭul. Mi ih bum rero mi mi aa kan tam tuk pang le kan ram a siat leh ding. Pathian ih pekmi sia le ṭha thleidan thiamnak fimnak kha a hmanzia kan thiam a cu zo. Mumal nei lem lo, tongkam nal zutzo ih sim le bummi ah tang pang lo dingah fim kan cu zo. Khristian kan can hnu kum 100 kan lan zo vekin pitling dinhmun cuhin mi aa sinawn loin, mifim si kan cu zo. Kan zate, kan miphunpi in mifim ah kan can thluh theinak dingah Pathian in thluasuah in pe cio hram seh. Amen.

Duhdawtnak le duhsaknak tumpi thawn,

Rev. Dr. CJ Hrang Hmung

PhD in Dev. Adm. student

Philippine Christian University

Manila, Philippine.