REMDAIHNAK IH THUTHUP

(The Secret of Peace)

Filipi 4:1-9

Duhdawtmi zumtu u le nau pawl, kum thar sungah kan lut zo vekin kan thinlung, ruahnak thar thawn kan lut cio koding tiah ka zum. Zumtu kan nun ah “Remdaihnak” thawn kan khah thei ding hi a thupi zet. Hi thu thawn thazang lak cio dingah ka lo sawm duh. Filipi 4:1-9 sung kan siar tikah remdaihnak/daihnak (peace) ngah thei dingin a dotdot kaiso vivo ding a ṭulzia Paul in a sim. Pathian hnen ih a ra mi a dikmi remdaihnak ngah theinak dingah dot 6 tiang kai vivo a ṭul zia, himi dot 6 kan kai lo ahcun Pathian parih kan tuah ṭulmi kan pelh, kan tlolh lawng si loin kan hnaṭuanpi le zumtu unau pawl khal kan tuahmawh theimi a si.

Himi remdaihnak  hi Pathian in zumtu pawl hnenih a pekmi a si. Himi kan thlau ter ahcun; (1) Mai’ zawn lawng kan ruat thlang (2) Kan sualnak kan thup duh. (3) Ziangkim sunralnak kan tong thei (4) Kan thin tawi, thinheng ol, midang kan relsia, soisel duh cuang. (5) Mahte lawng um khalle kan phun supso ih ziang tik khalah kan lung a kim thei lo. (6) Pawlkom aw hnakin ṭhenṭhek ding lawng kan duh. (7) Kanmah lawng kan um (loneliness). Pathian thawn kan hlat aw vivo ih nehnak nun a hlo vivo. Sunralnak a tam vivo. Kan thinlung sungah remdaihnak a um thei nawn lo. Curuangah “Remdaihnak ih thuthup” hi kan theih cio a ṭul.

Minung ih ruahban lomi remdaihnak kan ngah theinak dingah “Daihnak Siangpahrang” (Is. 9:6) cu kan thinlung sungah kan neih a ṭul. Kan cohlang a ṭul. Cuih remdaihnak kan ngah theinak ding dot (6) pawl cu:

(1) Bawipa sungah hnget zetin ding ringring ding (v. 1)

(2) Thinlung hmunkhat dingah zuam ding (vv. 2-3).

(3) Cat loin lungawi ding (v. 4)

(4) Lungnemnak thawn nung ding (v. 5)

(5) Thlacam nun nei ding (vv. 6-7).

(6) Pathian thu sungah nung ding (vv. 8-9).

(1) Bawipa sungah hnget zetin ding ringring ding (v. 1)

          Zumtu kan nunah Pathian thawn dikzet in pehzomnak nun kan neih ding a thupi zet. Kan pehzomnak a cat ahcun Pathian hnenih a luangmi remdaihnak khal a cat ta ding a si. Curuangah Pathian sungah hngetzetin ding ringring a ṭul. “Hngetzetin ding” timi hi Grik ṭong in “stekete” ti a siih pehzomnak, a fekmi, a zuammi tiah sullam a nei.`

(2) Thinlung hmunkhat dingah zuam ding (vv. 2-3)

          Remdaihnak kanngah theinak ding a dot 2 nak cu Pathian le minung, minung le minung  karlak ah thinlung hmunkhat ret ding hi a ṭul a si. Paul in kawhhran sungih a rem aw lomi Euodia le Sintekhe te pahnih hnenah “Bawipa ih duhnak thlunin nan thinlung hmunkhat dingah zuam uh” tiah a forh hngai. Remawknak a um lo ahcun Khrih ih ruangpum a simi kawhhran sungih  kut, ke pawl hna a ṭuan thei nawn lo ding. Curuangah ziangvek pawlkom le kawhhran ah kan um a si khalle pakhat le pakhat lungrual in thinlung hmunkhat neih thei zuam ringring ding a ṭul. Pakhat le pakhat ngaithiam awknak nei ding a ṭul. Ka palh a siih tiah tangdor nun thawn remdaihnak tuah kan ṭul. Kan hmuh daan bangrep theinak dingah kan buaipimi a um asile reltlang, ron aw tlang in remdaihnak ngah thei dingah kan zuam a ṭul a si.

(3) Cat loin lungawi ding (v. 4)

          Pathian hnenah cat loin kan lungawi ding hi a thupi zet. Cutik lawngah a dikmi remdaihnak kan congah thei ding a si. Paul hi Filipi 4:4 a sim laiah thawnginn sungah a um. Harsatnak tampi a nei. Asinain a thinlung sungah remdaihnak thawn a khat. Cuih a neihmi remdaihnak vek kha zumtu pawl neihter a duh. Cutiih neih theinak dingah cun Pathian hnenah cat loin lungawi ding a thupi ngaingai.

(4) Lungnemnak thawn nung ding (v. 5)

          “Mi hmuahhmuah hnenah nan lungnem uh” timi ah “lungnem” hi Grik ṭong in “epieikes” a siih “neemnak”, “thu ṭhate’ ruat ih hnaṭuan”, “midang zawnruah thiam” timi sullam a nei. Efesa 4:2-3 ah, “Thinlung neemnak nei uh; tangdor le thinsau in um uh. Duhdawtnak nan neihmi kha pakhat le pakhat nan zawiawk theinak ding langter uh. Thlarau in a lo pekmi pumkhat sinak kha ṭunghmun dingah hmunkhat ih a lo ṭemkhawmtu ih remnak in hmunter uh” timi thu khal kan hmu thei.

(5) Thlacam nun nei ding (vv. 6-7)

          “Remdaihnak dik” kan ngah duh ahcun “Thlacam nun” neih ding a thupi ngaingai. Curuangah Paul in donhar loin thla nan cam ringring le minung ruah ban lomi Pathian ih daihnak in nan thinlung le nan ruahnak cu Khrih Jesuh ah himte in a kilkhawi ding, a ti (4:6-7).

          Donhar ding thuhla tampi a um ko ding. Asinain cumi pawl lansuah theinak dingah ziangkim ah lungawi thusimnak neih ding a thupi. Thlacam hi zumtu nun ah a thupibikmi a si. Zumtu ih kan muril cu thlacamnak a si. Baibal siarnak thawn ceem in nitin thazang thar kan lak ringring ding a ṭul ngaingai.

(6) Pathian thu sungah nung ding (vv. 8-9)

          Pathian thu sungah kan nung tik lawngah hnangam daihnak kan ngah thei ding. (hla kan sak theumi pakhat cu… na thu sungah um a nuam… timi a si). Pathian thu sungah kan nung tik lawngah thil ṭha pawl kan ruat thei ringring ding. Kan thinlung sungah a cam ringring ding (4:8).

       William Barclay in, minung pawlin sui, ngun, hlawnthil, inn le lo, sinak, thuneihnak, hminthannak timi pawl lawng kan ruat tikah khawvel tisa duhnak sal ah kan tang. Khawvel mi bangin kan nung, a ti. Cumi pawl thawn Pathian thu sungah nung a theih lo. Pathian thu sungah kan nung theinak dingah cuih khawvel thil duhnak hmuahhmuah kan sup aw thei a ṭul.

          Pathian thu sungih nungtu kan si tikah Pathian duhnak ziang a si ti kha kan thinlung ah a caam ding. Cutikah kan nunnak hi: (1) Thutak sungih nun (2) upat tlak ih nung, (3) dingfelzet in nung, (4) thianghlim zet in nung, (5) duhnungza in nung, (6) porhtlak in nung (7) hminṭhatnak  timi pawl thawn kan famkim thei ding a si.

          A netnak ah Paul in, “Ka hnen ihsin nan ngahmi le nan zirmi vekin thlun tum uh. Ka ṭongkam in siseh, ka tuahnak in siseh, ka lo hmuhmi cu thlun uh. Cutin daihnak in petu Pathian cu nan hnenah a um ding,” (v. 9) tiah amai’ nun ihsin zir dingah in sawm. Hruaitu tampi cu kan thei cio vekin, “ka simmi vekin tuah aw, ka tuahmi vekin tuah hlah” timi hi a tam thei zet. Curuangah kanmah le pumpak nun hi ṭhate’n cekfel aw sal in, Filipi 4:1-9 sungah Paul ih simmi “Daihnak Thuthup” pawl thawn nitin kan nunnak ah nungpi thei cio dingah Pathian in thluasuah in pe cio hram seh. Amen.

Duhdawtnak thawn,

Rev. Dr. CJ Hrang Hmung

PhD Student

PCU, Manila.

Dec. 31, 2012