Kan Lairam ah Pathian thuthangṭha a thlen hnu kum 100 kan lan zo. Khristian kan sinak khal kum 100 a kim zo. Hlanlai ah kan Laimi ih kan uar awknak bik cu miphun dang lakah rintlak sinak kan neihmi hi a si. Hlan ih Laimi pawl cu dingfel zetin an nung ih rinsan a tlakmi, thuphanper lomi, mirelsiat hmang lomi tiah miphun dangih theihmi le rintlan nun neimi kan si. Curuangah kan Laimi hminsinnak khalah “Vapual” hi kan rak cuangter.
Asile
atu Khristian kan si hnu kum 100 a kim hnu ah ziang kan bang? Miphun dang pawl
in teh rintlak miphun ah in hmu hrih maw? Kan thei cio vekin tuisun ah Laimi
pawl hi leitlun khuazakip le hmuntinkim, ramtinkim ah kan thleng ve zo.
Sikhalsehla kan thlennak ram le hmun tampi ah zovek miphun hman in rintlak ah
in hmu nawn lo. Cucu poi ka ti zetmi a si. Pathian thu sungah kan um deuhdeuh
kan ti ko na’n thuphan rel hmang, mi hrokhrawl le mi relsiat a hmangtu kan si
riangri ṭheu. Kawl thufim an sim bangin, “kan ka cun Pathian kan thlah lo; kan
tuahmi cu thu lolak hlir” in a khat thlang ko lo maw? Pathian fa ka si, kan ti
aw kona’n satan fa lehlam maw kan rak si ziar. Kan ram, kan miphun ih nun daan
hi bum-awknak lawngin a khat thluh zo, tihi kan hmuh ciomi a si ko. Poi na ti
ve lo maw?
Cucu
ziangruangah a si pei? Nun tel loin hmurka lawngih piangthar kan tamtuk ruangah
a si. Baibal sungah “thuphan per hmaisabiktu cu satan a si” tiah a um (Seem.
3:13). Satan cu “thuphan bawipa” a si. Curuangah kan Bawipa Jesuh Khrih in
thuphan sim hmang pawl hnenah, “Nannih cu satan nan pa ih faate nan si...”
(Joh. 8:44) a ti.
Thu
ṭhate’n thu kan ruat asile thuphanper, mibum hmang le relsiat awknak in kanmah
le kanmah khal kan thin kan har ter. Nikhat khat ah a langsal dingih kan tuar
leh ding tiah thinphang in in umter sawn a si. Thufim sungah, “Thuphan in
nunnak caantawite a nei. Thudik cu kumkhua in a nung ringring” (Thuf. 12:19) a
ti. Cuih tlunah, “A dik lomi theihpitu cu hremnak in a luat lo ding. Thuphan a
simtu cu a siatral ding,” timi khal kan hmu (Thuf. 19:9).
Thuphanper
le mirelsiat hi mi zovek khalin olte’n kan hmang ngam hluahhlo ṭheu. Poi kan ti
lem lo. Pastor siseh, Zirhtu pawl siseh, Evangelist pawl, sumdawng le acozah
hnaṭuan pawl khal in siseh, kan hmang vutvo ṭheu ih nuam kan ti men. A dik lomi
thu parah kanmai’ ruahnak vekin sim le rel hi kan ka a thawzet in kan thei.
Cutiih
kan ṭong, kan rel ol tuk ṭheu ruangah midang hrangah ziangtluk thinnatnak a
thleng, ziangvek a cang ti khal kan ruat lem lo. Kan “lei” hi kan ralring thiam
lo. “Lei” hi a fatezet na’n mi a siatsuah theinak cu a tum zet (Jeim 3:1-12).
Kan Lai ṭongṭhimnak ah, “ṭong kamkhat siapi man” tiih a um kha kan thei
ringring a ṭul nasa.
Ṭongkam
ralring lo le suup aw loin a dik lomi thuphan simnak ruangah thihnak tiang a
thlenpi thei. Thungai ih a rak cang dahmi thu pakhatte ka tarlang hnik ding.
Khua pakhat ah nu le pa nei lo ngakṭah unau hnih te an um. A ṭapa cu kut-ke ṭha
lomi a si. A unu in an pumcawmnak hrangah dawr tumpi pakhat ah hna a ṭuan.
Nikhat ni ah a unu cu a hnaṭuannak ah rin lo le ruah lopi'n a dam lo. A
thazaang zate a cem thluh ih zianghman tuah thei, ṭuan thei loin a um. Cutikah
a hnaṭuanpi mipa pahnih in an zaangfahtuk ih an rak bawm. An inn ah an rak
tlunpi. Cumi cu innhnen le midang pawlin an hmu tikah ziang thuhla hman suhhlam
le zingzoinak nei hmaisa loin thu si lo pipi an rel, a phunphun in an relsiat
ih sual an puh. Nunau ṭha lo, hlawhhlang a si tiah an puh ciamco. Cuih thu cu a
ṭapa in a theih tikah a ningzak tukah zianghman thu ruat thei nawn loin amah le
amah a that aw ve mai. A farnu khal cuih thu a theih tikah thin na le riahsia
tukin amah le amah a that aw ve.
Cuih
unau hnihtei’ ruak vui khawmnak an tuah tikah an Pastor pa in hiti’n thu a sim:
“Vancung ah Pa Pathian in na tuu pawl khui ah an um tiah thu in sut tikah ka
sawn duh lo ding. A vei thumnak in sut tik lawngah, ‘Bawipa tuu pakhat hman ka
nei ual lo, cinghnia rual lawng ka nei so khaw,’ ka ti ding” ti in.
Curuangah
duhdawtmi zumtu u le nau, kan nun daan hi tuu rual vek maw kan si? cinghnia
rual sawn so? Pathian ih duh lomi thuphanper, sualpuh le relsiat hmang hi kan
ram ah a ciah thluh zo. Thuphan kan per ih mi kan relsiat ruangah kan hrangah
ziang so ṭhathnemnak a um? Thukham (10) sungah, “A dik loin midang sual na puh
lo pei,” (Suah. 20:16) ti’n a um. Ṭhat lonak in in uk nawn hlah seh. Ṭhat lonak
kha ṭhatnak in neh sawn uhsi (Rom 12:21). Mi pakhat dinhmun le sinak theifiang
loin thuphan ih relsiat le soisel awk kan hmang tuk hi kan ruat awk a ṭulzet.
Keimah ihsin thokin kan nun ṭhate’n kan cekfel, kan zohfel awk a ṭul tuk thlang
a si? Ziangtin nan ruat ve cio?
Kan
ram, kan miphun in kan pipu pawl Pathian thu a theih hrih lotu pawl san laiih
dingfel le rintlak an sinak kha laak tumsaal uhsi. Kan nun cio ah hmangin
fingkhawi sal uhsi. Pathian zumtu kan si vekin Pathian hmai ah siir aw in
thinlung duhnak taktak thawn nun hlan aw sal uhsi (1 San. 7:14). Mi iksik le
soisel nun si loin dingfelnak nun hi tharthawh sal uhsi. “Dingthluk lairelnak
cu tivapi bangin luang sehla felnak cu a kaang dah lomi ti bangin luang sawnseh”
(Amos 5:24). Atu kan dinhmun cio hi ziang kan bang? timi thu hi napin ruat phah
in pipu pawlih ro sunglawi hi kan nunnak cio ah lang thar sal thlang seh. Kan
ram, kan miphun le kan umnak hmun tinkimah Pathian sunlawinak langsawn thlang
seh!.......Amen.
Duhdawtnak le duhsaknak tumpi thawn…
Rev. Dr. CJ Hrang Hmung
Manila.
(“THUPHANPER LE MIRELSIAT hmangin um
nawn hlah uhsi” timi thulu thawn FBP
Cakuat, Vol. 4, May-June, 2004 ih ka rak ngan dahmi kha ka rem, ka bet salmi a
si).
No comments:
Post a Comment