TUIH CAAN

“Pathian ih simmi hi ngaihnik uh: Nan hnenih ka mithmai ttha ka langter caan ahcun nan aw ka thei; Nanmah ka lo rundamnak ni a thlen tikah ka lo bawm hai, a ti. Ngaihnik uh! Pathian mithmai ṭha ngah caan cu tuih caan hi a si; rundamnak co ni cu tuih ni hi a si,” (2 Kor. 6:2).

Tuini kan tikcu caan hi siatlam panin a feh rero. Kan ton dah lomi thilcang pawl, thubuai pawl thawn nitin kan tlangleng. Sikhalsehla mi tampi cu himi caan khalah Pathian thei duh loin khawvel nomnak le thilri hrangah caan an cemter rero. Zumtu hrekkhat pawl khalin caan a um lai ko. Atu cu leitlun nun tawite sungah nuamzetin ka um hrih ding. Neta ah Pathian thu hrangah caan ka pe leh ding tiah an ti ṭheu. Thatein kan ruatthiam a si ahcun caan ṭha tampi a um nawn lo timi hi a hleice in zumtu pawlin kan theih a ṭul ngaingai thlang.

1. A fiang lomi thaisun.

Hi leitlun ah minung ih kan can tikah mani, tuini le thaisun timi tikcu caan hi kan tan thluh cio. Thaisun timi hi veihnih khat ahcun ruahsannak thawn thleng lohli kan duh caan a um ṭheu. A caancaan ahcun thinbangnak le ton dingmi thubuai pawl ruatin thaisun hi thleng nawn lo sehla ka duh tiah thla kan cam caan khal a um ko ding. Curuangah Thufim ngantu in, “Thaizing thu ah tluang khawng hlah. Cuih ni in ziang a suahpi ding tin a thei lo,” tiah ralrinnak in pek (Thuf. 27:1). Thaisun ih kan ngah dingmi hlawhtlinnak, ṭhatnak, ṭuan dingmi pawl hi Pathian kut sungah an um thluh. Pathian in caan in remruat sak lo ahcun zianghman a cangsuak dah lo ding. Thaisun tampi hrangah eiin tampi khawlin zianghman ṭulmi ka nei nawn lo tiah a ti-aw tu milian pa cu Pathian in tuihzan rori ah na nunnak cem ding tiah thu a thleng. Cutikah cuih milian pa cu zianghman a ti thei nawn lo. Thaisun hrangah sumsaw lennak ziangtluk nei in, sinak dinhmun sang kan nei khalle sersiamtu Pathian in caan ṭha in pek nawn lo ahcun thil ziangkim hi a lak men ah a cang thluh (Luk. 12:16-21).

2. Tuih ni hi ni thupi bik a si.

Zumtu diktak cun thaisun hrangah donhar ding zianghman a um lo. Ziangahtile Bawi Jesuh in, “Curuangah thaisun hrangah donhar in um hlah uh; thaisun in donharnak amah tawkin a nei ve ding. Ni ni khat ih a phurhmi harsatnak tlunah a dang beetcih ding a si lo,” a ti (Mat. 6:34). Kan thleng hrih lomi thaisun hrangih donhar in kan um rero hi tuini hrangah thinbangnak men a si. Veihnih khat ahcun thaisun timi hi Satan ih bumnak tikcu caan khal a si thei. Satan in zumtu pawl thaisun ah nan hlawhtling ding, nan dam ding, nan ṭhangso ding tiah tuini kha ziang siar loin um dingah in thlem ringring ṭheu. Pathian cun tuini ah in hlawhtling ter duh. Tuini ah luatnak in pe duh. Curuangah “Pathian mithmai ṭha ngah caan cu tuih caan hi a si; rundamnak co ni cu tuih ni hi a si,” a ti (2 Kor. 6:2). Thaisun hi rundamnak caan ṭha a si lo.

3. Thaisun hrangih Pathian.

Pathian cu tikcu caan parah thuneitu a si. Pathian in tuisun le thaisun hi bangrep in a ret lo ih a ṭulnak vekin a thleng-aw ter. Veihnih khatah Pathian in thaisun ih a tuah dingmi hmu ban lo, zum ban loin harsatnak, thinbangnak hnuai ah kan thleng ṭheu ruangah cumi pawl cu hmu lawng kan hmu ih co ngah lo tampi kan um ṭheu. Elisha in, “Thaisun atu tikcu ah Samaria khua ih dawr ahhin sangvut ṭha bik cuai khat, a si lole barli sangvut cuai hnih cu ngun tangka fangkhat in nan lei thei ding a si,” a ti tikah tlangsuak bawi pakhat in a cang thei zik lo a ti ih a zum lo (2 Siang. 7:1-20). Pathian in kan nunnak hrangah ziangkim hin a kel in a ret ringring lo. Harsatnak sung ihsin thlengnak in tuahsak ṭheu. Cumi kan co theinak dingah zumfeknak kan nei a ṭul. Curuangah kan neihmi sumsaw, thilri parah puarthau ding a um lo. Thaisun hi kanmai’ neihmi a si lo. Thaisun ah ziang a cang ding tiah ruat in donhar ding khal a si lo. Tuini a uk ih kan hnenah a um ringringtu Pathian cu thaisun khalah kan hnenah a um ringring dingmi Immanuel Pathian a si (Mat. 1:23). Thaisun timi hmangin Satan ih bumnak thang sungah awk aw lo ding hi a thupi zet. Mah le mah bum aw in thaisun ihsin Baibal ka siar ding, thla ka cam ding, hna ka ṭuan ding tiah sim hlah aw. Thaisun a uktu Pathian in thleng-awknak a tuah tikah nikhat hnu nikhat ṭha sin dingin a tuah thei a si.

Thunetnak.

Tuih caante hi kan zate hrangah a man a khung zet. Tuihnu rei lo te ah ziang kan cang ding timi hi zohman in kan sim thei lo. Ziangtinkim hi Pathian ih duhnak vekin an cang rero lai a si. Jeim in, “Nan nunnak cu thaisun ah ziang a cang ding ti nan thei lo. Nan nunnak cu caan tawite sung a zaam ih a hlo salmi mero bangtuk a si. Curuangah Bawipa ih lungkimnak a um a sile kan nung hrih dingih cumi, khami kan tuah ding, tiah ti ding sawn nan si,” tiah a sim (Jeim 4:14-15).  Pathian mithmai ṭha ngah caan cu tuih caan hi a si; rundamnak co ni cu tuih ni hi a si. Tuih ni, tuih caan hi Pathian ih pekmi a mankhung zetmi caan a si tikha thei cio in Pathian hmin sunloih phahin nung cio uhsi.

Duhdawtnak le duhsaknak thawn,

Rev. Dr. Hrang Hmung, DMin., PhD.,

Toungphila, Kalaymyo.

March 11, 2016|Friday|10:30 am.