“Nun ka lo sim laiah ṭhatein ngai uh. Ruahnak ṭha ka lo pe ding ih ka
fimnak kha ka lo seu ve ding a si… Asinain ka thu a ngaitu pawl cu an
him ding ih, ṭihphannak zianghman an nei lo ding” (Thuf. 1:23, 33).
Nun sim awk timi hi kan ṭhatnak ding hrangah a si. Minung kan si ahcun nun sim awk a ṭul. A sia le a ṭha, a dik le a sual tvp. kan theifiang theinak dingah nun simmi pawl vekin thu ngai a ṭul. Cuticun kan nun in rem vivo dingih rinsantlak mifim ah in cang ter thei ding. Pathian in nun in sim, thu in simmi pawl khal hi Amai’ hrangah a si lo. Kanmai’ hrang dingah a si. Pathian in in duhdawt ruangah sualnak sungah kumkhua thi men ding in siang lo. Curuangah duhdawtnak thawn nun in sim ṭheu. Cumi cu ṭha tein kan ngai ding a thupi ngaingai. Pathian kan duhdawt taktak ahcun a simmi thu pawl hi kan ngai hrimrhim ding a ṭul a si. Pathian thu kan ngai taktak ahcun a lak a si dah hrimrhim lo. Thufim ngantu cun Pathian thu a ngaitu cu (1) an him ding, (2) ṭihphannak an nei lo ding, a ti.
1. An him ding.
Hi leitlun khuitawk hman ah himnak a um lo kan ti ahcun kan palh lo ding. A ṭhangso zetmi America ram ah kan um khalle a him cuang lo. Buainak le harsatnak phunkim lak ihsin kan luat thei cuang lo ding. Natnak a phunphun a karhzai vivo ih ziangkim ah himnak a reh vivo. Sikhalsehla Baibal in Pathian thu a ngaitu pawl cu an him ding, a ti. Cumi cu Pathian ih thukam pakhat a si. Bawi Jesuh in inn saktu pahnih thu tahṭhimnak a simmi sungah a thu ngai in a thluntu cu lungpi par ih innsaktu mifim vek a siih thu ngai duh lotu cu mi-aa vek a si, a ti (Mat. 7:24-27). Lungpar ih sakmi inn cu ziangtluk ruah sur in, ti a lian ih thlipi in a nuai ciamco khalle a hnget khoh a si. Thungai ih sakmi inn a si ruangah cuih inn cu a him. Thu ngai duh lotu cu himnak um loin a tlu ih a siatbal thluh mai a si. Thungainak hi a thupizet. Bawi Jesuh sungah kan nun tungdin theinak hi thungainak ruangah a si. Bawipai’ thungai cu kan nun himnak a si.
2. Ṭihphannak an nei lo ding.
Bawipai’ thungai ruangah “ṭihphannak a um lo,” a ti lo. Ṭihphannak cu a um ko ding nain “ṭihphannak an nei lo ding,” a ti. Ṭihphan ding tampi a um, in hnaihnok ko ding nain Bawipa ih humhimnak hnuai ah kan um ruangah ṭihphannak kan nei lonak a si sawn. Saam cangantu in, “A thimmi thihnak horkuam sung zawh hman ningla, Mawi Bawipa, ka ṭih lo ding, ziangahtile nang cu ka hnenah na um. Na talhtum le na kianghrol in ka hna in ngamter,” a ti (Saam 23:4). Hnangamnak cu Bawipa in in pek lawngah kan nei thei ding. Bawipa in, “Zianghman ṭih hlah, na hnenah ka um a si. Keimah cu na Pathian ka si, zianghman in lo phangter hlah seh…” a ti (Is. 41:10). Ṭihphan ding cu a um ko ding, sikhalsehla Bawipa thawn kan um tlang ruangah ṭihphannak kan nei lo ding a si.
Thunetnak.
Ṭhatnak ding hrang ahcun nun simmi pawl ṭhatein ngai a ṭul. Zokhal mah le mah kan theifiang awk taktak thei lo. Kan palh lam khal kan thei aw lo. Curuangah Bawipa in nun in sim tikah ṭhatein kan ngai a ṭul. Bawipai’ nunsimnak kan ngai ahcun kan hrangah siatralnak a um lo ding. Kan hrangah himnak le hnangamnak a si sawn. Thufim ngantu ih “Nun ka lo sim laiah ṭhatein ngai uh. Ruahnak ṭha ka lo pe ding ih ka fimnak kha ka lo seu ve ding a si… Asinain ka thu a ngaitu pawl cu an him ding ih, ṭihphannak zianghman an nei lo ding” (Thuf. 1:23, 33) timi kha ṭhatein cing ringring in Bawipa ih thu hi ngai in thlun cio uhsi.
Duhdawtnak le duhsaknak thawn,
Rev. Dr. Hrang Hmung.
Toungphila, Kalaymyo, Myanmar.
May 21, 2016|Saturday|10:10pm.
Nun sim awk timi hi kan ṭhatnak ding hrangah a si. Minung kan si ahcun nun sim awk a ṭul. A sia le a ṭha, a dik le a sual tvp. kan theifiang theinak dingah nun simmi pawl vekin thu ngai a ṭul. Cuticun kan nun in rem vivo dingih rinsantlak mifim ah in cang ter thei ding. Pathian in nun in sim, thu in simmi pawl khal hi Amai’ hrangah a si lo. Kanmai’ hrang dingah a si. Pathian in in duhdawt ruangah sualnak sungah kumkhua thi men ding in siang lo. Curuangah duhdawtnak thawn nun in sim ṭheu. Cumi cu ṭha tein kan ngai ding a thupi ngaingai. Pathian kan duhdawt taktak ahcun a simmi thu pawl hi kan ngai hrimrhim ding a ṭul a si. Pathian thu kan ngai taktak ahcun a lak a si dah hrimrhim lo. Thufim ngantu cun Pathian thu a ngaitu cu (1) an him ding, (2) ṭihphannak an nei lo ding, a ti.
1. An him ding.
Hi leitlun khuitawk hman ah himnak a um lo kan ti ahcun kan palh lo ding. A ṭhangso zetmi America ram ah kan um khalle a him cuang lo. Buainak le harsatnak phunkim lak ihsin kan luat thei cuang lo ding. Natnak a phunphun a karhzai vivo ih ziangkim ah himnak a reh vivo. Sikhalsehla Baibal in Pathian thu a ngaitu pawl cu an him ding, a ti. Cumi cu Pathian ih thukam pakhat a si. Bawi Jesuh in inn saktu pahnih thu tahṭhimnak a simmi sungah a thu ngai in a thluntu cu lungpi par ih innsaktu mifim vek a siih thu ngai duh lotu cu mi-aa vek a si, a ti (Mat. 7:24-27). Lungpar ih sakmi inn cu ziangtluk ruah sur in, ti a lian ih thlipi in a nuai ciamco khalle a hnget khoh a si. Thungai ih sakmi inn a si ruangah cuih inn cu a him. Thu ngai duh lotu cu himnak um loin a tlu ih a siatbal thluh mai a si. Thungainak hi a thupizet. Bawi Jesuh sungah kan nun tungdin theinak hi thungainak ruangah a si. Bawipai’ thungai cu kan nun himnak a si.
2. Ṭihphannak an nei lo ding.
Bawipai’ thungai ruangah “ṭihphannak a um lo,” a ti lo. Ṭihphannak cu a um ko ding nain “ṭihphannak an nei lo ding,” a ti. Ṭihphan ding tampi a um, in hnaihnok ko ding nain Bawipa ih humhimnak hnuai ah kan um ruangah ṭihphannak kan nei lonak a si sawn. Saam cangantu in, “A thimmi thihnak horkuam sung zawh hman ningla, Mawi Bawipa, ka ṭih lo ding, ziangahtile nang cu ka hnenah na um. Na talhtum le na kianghrol in ka hna in ngamter,” a ti (Saam 23:4). Hnangamnak cu Bawipa in in pek lawngah kan nei thei ding. Bawipa in, “Zianghman ṭih hlah, na hnenah ka um a si. Keimah cu na Pathian ka si, zianghman in lo phangter hlah seh…” a ti (Is. 41:10). Ṭihphan ding cu a um ko ding, sikhalsehla Bawipa thawn kan um tlang ruangah ṭihphannak kan nei lo ding a si.
Thunetnak.
Ṭhatnak ding hrang ahcun nun simmi pawl ṭhatein ngai a ṭul. Zokhal mah le mah kan theifiang awk taktak thei lo. Kan palh lam khal kan thei aw lo. Curuangah Bawipa in nun in sim tikah ṭhatein kan ngai a ṭul. Bawipai’ nunsimnak kan ngai ahcun kan hrangah siatralnak a um lo ding. Kan hrangah himnak le hnangamnak a si sawn. Thufim ngantu ih “Nun ka lo sim laiah ṭhatein ngai uh. Ruahnak ṭha ka lo pe ding ih ka fimnak kha ka lo seu ve ding a si… Asinain ka thu a ngaitu pawl cu an him ding ih, ṭihphannak zianghman an nei lo ding” (Thuf. 1:23, 33) timi kha ṭhatein cing ringring in Bawipa ih thu hi ngai in thlun cio uhsi.
Duhdawtnak le duhsaknak thawn,
Rev. Dr. Hrang Hmung.
Toungphila, Kalaymyo, Myanmar.
May 21, 2016|Saturday|10:10pm.
No comments:
Post a Comment