“Cun an thinlung mit a vangter ih Ca Thianghlim ih simmi kha an thei thei,” (Luka 24:45).
Mi tampi cun cabu kan siar tikah a netnak lam hi kan duh zet ṭheu. A hleice in cabu ṭha kan siar tikah a net daan hi siar nuam kan ti cio. Mi hrek cun a thuhla kan thei cia thluh zo tiah a netnak siar nawn loin khal kan tanta ṭheu. Thuanthu lole zuknung hrekkhat cu a netnak ah kan duhzawng le kan ruahsanmi vekin a net ṭheu. Sikhalsehla a hrek cu kan ruah lomi thu in a net ṭheu. Himi Luka cabu a cemnetnak khal hi kan ruah ban lomi thu in a net ve. Cumi cu Jesuh Khrih sunglawizet in vancung ah a kai thu si loin tirhthlah pawl Jerusalem khua sungah lungawinak thawn an kirsal thu hi a si (Luk. 24:50-52). Bawi Jesuh in an thinlung mit a vangter hnu lawngah an nun daan a thleng thluh a si.
1. Ṭihphannak a hlo ter.
Luka cabu nettabik bung kan siar tikah ṭihnak thu tampi kan hmu thei. Nunau pawl thawhsal ni zing pit ih thlan an feh tikah thlankhar lung phengpi a rak ṭhawn aw zo. Thlan sung an lut tikah Jesuh ih ruak cu an hmu nawn lo. Cuih tlunah mipa pahnih an hmu tikah an ṭih ngaingai. Thlan sungah Jesuh a um lo tikah, “Hinah a um nawn lo,” tiah an sim. Culawng si loin Jerusalem khua ih tirhthlah hleikhat pawl hnenah Jesuh Khrih rin lopin a lang tikah an ṭih ngaingai (Luk. 24:1-7; 36). Cutin thuhla a um nain a netnak ah tirhthlah pawlih lungawinak thu kan hmu thei (Luk. 24:52). Thinlung mit vang hnu ahcun ṭihnak pawl a hlo thluh a si.
2. Pathian kan hnenah a um.
Tuini mi tampi in Pathian cu vancung ah a um. Jesuh cu vancung ah a um. Himi Baibal caang ih simmi khal Jesuh Khrih vancung kainak thu a si. Pathian cu hmun hnih ah hmakhat te ah a um thei lo. Pathian kan hnenah a um timi a si thei lo, ziangahtile kan hmu thei lo pi, tiah an ruat. Mi tampi in Bawipa Zanriah thu khalah Sang kan eimi le Sabit kan inmi hi Pathian in in umpi timi hi a thu lawng a si. Asinain Jesuh Khrih cu vancung ah a um zo ruangah leitlun ih kan hmanmi Bawipa Zanriah ah a um ve lo tiah an ruat. Baibal ca sungih ngan ciami Pathian ih zaangfah duhdawtnak thu pawl cu Jesuh Khrih ah a famkim thluh a si. A si, Jesuh Khrih in an “thinlung mit a vang ter” hnu lawngah Baibal ca sungih sim cia mi a thok ihsin a zate’n an theifiang thluh sal. Pathian cu kan hnenah a um ringring a si.
3. Thinlung mit vang hnu ah.
Jesuh Khrih thawn netabik an um tlang caan lawngah tirhthlah pawlin an Bawipa ih thu an theifiang lai a si. “An thinlung mit a vangter” hnu lawngah Pathian thutak an theifiang thei tinak a si. Kum thum sung Jesuh Khrih dungthluntu pawl khal “an thinlung mit vang” hnu lawngah an thlunmi Jesuh Khrih cu zo a si, timi an theifiang sal. Kum reipi zumtu a si rero zomi pawl teh ziangruangah kan lungawi thei ngaingai lo a si pei? Lungawi thei lo dingih dawnkhamtu teh ziang a si? Puarthaunak a si maw? Zumfek lonak a si maw? Mai’ zawnlawng ruatnak a si maw? Ṭihphannak a si maw? Sualnak ruangah a si maw? Pathian kan biak kan ti ih lungawinak kan nei lo a sile Pathian hnenah thinlung tangdor le thinnem in thla kan cam a ṭul.
Thunetnak.
Tuini kan biakmi Pathian hi “hinah a um lomi Pathianယ” a si lo, kan hnen ah a um ringringtu “Immanuel Pathian” a si. Jesuh Khrih kan hnenah a um ringring timi cu leitlun fimnak thawn kan langter thei lo men ding. Sikhalsehla Baibal ih simmi vekin “thinlung mit a vangter” lawngah kan theifiang thei a si. Cumi cu Bawi Jesuh ih simmi a si. Himi thu ruangah tirhthlah pawl khal riahsia nawn loin lungawinak thawn an khat theinak cu a si. Bawipa Zanriah ih kan hmanmi cu Jesuh Khrih ih taksa le thiisen taktak a si lo tiah kan ruat a si khalle Jesuh Khrih in, “Himi hi ka taksa a si, himi hi ka thiisen a si” a timi kan zum (Luk. 22:19-20). Baibal ih simmi pawl cu thutak hlir a si, thuphan le phuahcop thu a um lo. Cuih thutak pawl cu thinlung mit vang tik lawngah kan theifiang cio ding a si.
Duhdawtnak le duhsaknak thawn,
Rev. Dr. Hrang Hmung, DMin, PhD.,
Toungphila, Kalaymyo, Myanmar.
April 2, 2016|Saturday|10:30pm.
Mi tampi cun cabu kan siar tikah a netnak lam hi kan duh zet ṭheu. A hleice in cabu ṭha kan siar tikah a net daan hi siar nuam kan ti cio. Mi hrek cun a thuhla kan thei cia thluh zo tiah a netnak siar nawn loin khal kan tanta ṭheu. Thuanthu lole zuknung hrekkhat cu a netnak ah kan duhzawng le kan ruahsanmi vekin a net ṭheu. Sikhalsehla a hrek cu kan ruah lomi thu in a net ṭheu. Himi Luka cabu a cemnetnak khal hi kan ruah ban lomi thu in a net ve. Cumi cu Jesuh Khrih sunglawizet in vancung ah a kai thu si loin tirhthlah pawl Jerusalem khua sungah lungawinak thawn an kirsal thu hi a si (Luk. 24:50-52). Bawi Jesuh in an thinlung mit a vangter hnu lawngah an nun daan a thleng thluh a si.
1. Ṭihphannak a hlo ter.
Luka cabu nettabik bung kan siar tikah ṭihnak thu tampi kan hmu thei. Nunau pawl thawhsal ni zing pit ih thlan an feh tikah thlankhar lung phengpi a rak ṭhawn aw zo. Thlan sung an lut tikah Jesuh ih ruak cu an hmu nawn lo. Cuih tlunah mipa pahnih an hmu tikah an ṭih ngaingai. Thlan sungah Jesuh a um lo tikah, “Hinah a um nawn lo,” tiah an sim. Culawng si loin Jerusalem khua ih tirhthlah hleikhat pawl hnenah Jesuh Khrih rin lopin a lang tikah an ṭih ngaingai (Luk. 24:1-7; 36). Cutin thuhla a um nain a netnak ah tirhthlah pawlih lungawinak thu kan hmu thei (Luk. 24:52). Thinlung mit vang hnu ahcun ṭihnak pawl a hlo thluh a si.
2. Pathian kan hnenah a um.
Tuini mi tampi in Pathian cu vancung ah a um. Jesuh cu vancung ah a um. Himi Baibal caang ih simmi khal Jesuh Khrih vancung kainak thu a si. Pathian cu hmun hnih ah hmakhat te ah a um thei lo. Pathian kan hnenah a um timi a si thei lo, ziangahtile kan hmu thei lo pi, tiah an ruat. Mi tampi in Bawipa Zanriah thu khalah Sang kan eimi le Sabit kan inmi hi Pathian in in umpi timi hi a thu lawng a si. Asinain Jesuh Khrih cu vancung ah a um zo ruangah leitlun ih kan hmanmi Bawipa Zanriah ah a um ve lo tiah an ruat. Baibal ca sungih ngan ciami Pathian ih zaangfah duhdawtnak thu pawl cu Jesuh Khrih ah a famkim thluh a si. A si, Jesuh Khrih in an “thinlung mit a vang ter” hnu lawngah Baibal ca sungih sim cia mi a thok ihsin a zate’n an theifiang thluh sal. Pathian cu kan hnenah a um ringring a si.
3. Thinlung mit vang hnu ah.
Jesuh Khrih thawn netabik an um tlang caan lawngah tirhthlah pawlin an Bawipa ih thu an theifiang lai a si. “An thinlung mit a vangter” hnu lawngah Pathian thutak an theifiang thei tinak a si. Kum thum sung Jesuh Khrih dungthluntu pawl khal “an thinlung mit vang” hnu lawngah an thlunmi Jesuh Khrih cu zo a si, timi an theifiang sal. Kum reipi zumtu a si rero zomi pawl teh ziangruangah kan lungawi thei ngaingai lo a si pei? Lungawi thei lo dingih dawnkhamtu teh ziang a si? Puarthaunak a si maw? Zumfek lonak a si maw? Mai’ zawnlawng ruatnak a si maw? Ṭihphannak a si maw? Sualnak ruangah a si maw? Pathian kan biak kan ti ih lungawinak kan nei lo a sile Pathian hnenah thinlung tangdor le thinnem in thla kan cam a ṭul.
Thunetnak.
Tuini kan biakmi Pathian hi “hinah a um lomi Pathianယ” a si lo, kan hnen ah a um ringringtu “Immanuel Pathian” a si. Jesuh Khrih kan hnenah a um ringring timi cu leitlun fimnak thawn kan langter thei lo men ding. Sikhalsehla Baibal ih simmi vekin “thinlung mit a vangter” lawngah kan theifiang thei a si. Cumi cu Bawi Jesuh ih simmi a si. Himi thu ruangah tirhthlah pawl khal riahsia nawn loin lungawinak thawn an khat theinak cu a si. Bawipa Zanriah ih kan hmanmi cu Jesuh Khrih ih taksa le thiisen taktak a si lo tiah kan ruat a si khalle Jesuh Khrih in, “Himi hi ka taksa a si, himi hi ka thiisen a si” a timi kan zum (Luk. 22:19-20). Baibal ih simmi pawl cu thutak hlir a si, thuphan le phuahcop thu a um lo. Cuih thutak pawl cu thinlung mit vang tik lawngah kan theifiang cio ding a si.
Duhdawtnak le duhsaknak thawn,
Rev. Dr. Hrang Hmung, DMin, PhD.,
Toungphila, Kalaymyo, Myanmar.
April 2, 2016|Saturday|10:30pm.
No comments:
Post a Comment