“Tlap le nget ih a siatsuah theinak le rukru pawlin an bauh ih an ruk
theinak hi leitlun ah nan sumsaw khawl hlah uh. Tlap le nget ih a
siatsuah thei lonak le rukru pawlin an bauh ih an ruk thei lonak vancung
ah nan sumsaw cu khawl sawn uh. Ziangahtile nan sumsaw umnak ah nan
thinlung khal a um ve ding,” (Mat. 6:19-21).
Hi leitlun ah a nungmi kan zatein kan neih theimi sumsaw phunhnih a um. Cuih kan neihmi sumsaw in kan nunnak kha a ṭhat lam ah in thlenpi thei vekin siatsuahnak lam khal in thlenpi thei. Kan khawlmi thilri sumsaw pawl in kan nunnak parah thu tampi a rel. Kan sumsaw umnak hmun tinkim ah kan thinlung khal a um ringring. Kan thinlung duhnak hi khuitawk ah ret kan duh? Thinlung duhnak hrekkhat pawl cu hi khawvel leitlun lawngah a um. Sikhalsehla Pathian in vancung sawn ah kan thinlung duhnak retter in duh timi hi kan tarlangmi Baibal ca ih sim duhmi a si.
1. Leitlun sumsaw khawl lo ding.
Mi zovek khal len le nomnak thawn a um duh lo kan um lo ding. Curuangah minung hmuahhmuah in lennak le nomnak hrangah sumsaw harsazet in kan hawl cio. Himi leitlun sumsaw hi ziangtluk in mi thinlung a neh thei kan ti a sile Bawi Jesuh in ‘bawi pahnih a rian thei lo’ ti tiangin a simmi a si (Mat. 6:24). Minung thinlung sungah sumsaw hawl le khawl hi thubuai ah kan ruat cio lo. Sumsaw tampi hawl in kan khawl thei tik lawngah nunnuam in kan um thei ding ti cu kan thei cio. Mi hrekkhat in sumsaw hi ṭhat lonak ih hrampi tiah an ruat ṭheu. Sikhalsehla Baibal cun cutin a sim lo. Sumsaw duhnak lawng hi ṭhat lonak ih hrampi a sizia lawng a simmi kan hmu thei.
Sumsaw duhnak hi buainak a suahpi thei. “Ziangahtile paisa duhtuk cu sualnak phunkip thoktu hram a si. Mihrek cun paisa neih an duhtuk ruangah kan zumnak an tlansan ih riahsiatnak in vei tampi an thinlung a kuaiter,” tiah Paul in a sim (1 Tim. 6:10). Sumsaw neihnak dingin, leitlun sumsaw ngah theinak dingin ziangvek thil ṭha lo tuah ding khalah ral ṭhatnak in pek. Cumi cu sumsaw hi kan bawi ah a cang. Curuangah Bawi Jesuh in ‘bawi pahnih a rian thei lo’ a tinak cu a si. Hi leitlun kan nun sungah leitlun sumsaw hawl hi a sual lo. Sikhalsehla cuih sumsaw lawng ruatin kan khawl ih bawi dinhmun ah kan ret ahcun kan nunnak ah buainak tampi a ra ko ding. Cumi cu theithiam in fimkhur zetin sumsaw hawl daan kan thiam a ṭul.
2. Vancung sumsaw khawl ding.
Pathian in hi leitlun sumsaw kha hawl hlah uh a ti lo, khawl hlah uh tiah a ti sawn a si. Hawl hlah uh timi cu cuih leitlun sumsaw le thil lawng hawl, cuih thil lawng thinlung ah ret, cuih thil parah thinlung bun kha a si. Cumi cun kan nunnak in siatsuah thei. Curuangah Pathian in leitlun sumsaw kha vancung sumsaw ah thleng tahrat in hawl dingah in duhsak a si. Leitlun thilri cu rukru in a ruk thei, a siat thei. Sikhalsehla vancung sumsaw cu zokhalin an ruk thei lo ih a siat thei fawn lo.
Sumsaw tampi a neitu milian tlangval pakhat cu Bawi Jesuh hnenah ra in kumkhua nunnak a duhnak thu, cuih kumkhua nunnak ngah theinak dingah ziangmi tuahṭhat a ṭul tiah thu a sut. Cuih milian pa ih a duhmi cu atu nunnak a si lo, kumkhua nunnak a si. Kumkhua nunnak cu Pathian hnen vancung ih ummi a siih cuih hmun ah um a duh thu a simnak a si. Bawi Jesuh in, “Mi famkim sin a duh ahcun va feh awla na neihmi hmuahhmuah zuar tahratin na ngahmi tangkca cu mi farah pawl va ṭhen aw; cuticun vancungah hlawnthil na nei ding. Cuih hnuah i thlun aw,” a ti (Mat. 19:21). Ziangruangah Bawi Jesuh dung thlun dingin vancung sumsaw a ṭul? A si, Bawi Jesuh umnak hmun cu hi leilung ah si loin vancung ah a si ruangah leitlun sumsaw hman a theih lo. Kan thinlung hi Bawi Jesuh thawn hmunkhat ah um ringring ding a ṭul a si.
Thunetnak.
Kan thinlung sungah leitlun sumsaw lawngin a khat ih cuih thil lawng kan duh ahcun kan thinlung khal cuih hmun ah a um ding. Kan thlarau nun khal hi khawvel thil lawngin a khuh thluh ding. Curuangah leitlun sumsaw cu vancung sumsaw ah kan thleng a ṭul. Cutik lawngah Bawi Jesuh ih dungah kan thlun dingin kan thinlung duhnak le kan nunnak khal a hnenah a um ding a si. Cuticun Bawi Jesuh cu kan nunnak ih Bawibik ah a cang ding. Curuangah leitlun sumsaw lawng hawlin kan khawl lo pei. Vancung sumsaw ah thleng tahrat ih khawl dingah Bawi Jesuh in a duh a si. Bawipai’ duhnak vekin vancung ah kan sumsaw khawl cio uhsi.
Duhdawtnak le duhsaknak thawn,
Rev. Dr. Hrang Hmung, DMin., PhD.,
Toungphila, Kalaymyo, Myanmar.
April 9, 2016|Saturday|9:30pm.
Hi leitlun ah a nungmi kan zatein kan neih theimi sumsaw phunhnih a um. Cuih kan neihmi sumsaw in kan nunnak kha a ṭhat lam ah in thlenpi thei vekin siatsuahnak lam khal in thlenpi thei. Kan khawlmi thilri sumsaw pawl in kan nunnak parah thu tampi a rel. Kan sumsaw umnak hmun tinkim ah kan thinlung khal a um ringring. Kan thinlung duhnak hi khuitawk ah ret kan duh? Thinlung duhnak hrekkhat pawl cu hi khawvel leitlun lawngah a um. Sikhalsehla Pathian in vancung sawn ah kan thinlung duhnak retter in duh timi hi kan tarlangmi Baibal ca ih sim duhmi a si.
1. Leitlun sumsaw khawl lo ding.
Mi zovek khal len le nomnak thawn a um duh lo kan um lo ding. Curuangah minung hmuahhmuah in lennak le nomnak hrangah sumsaw harsazet in kan hawl cio. Himi leitlun sumsaw hi ziangtluk in mi thinlung a neh thei kan ti a sile Bawi Jesuh in ‘bawi pahnih a rian thei lo’ ti tiangin a simmi a si (Mat. 6:24). Minung thinlung sungah sumsaw hawl le khawl hi thubuai ah kan ruat cio lo. Sumsaw tampi hawl in kan khawl thei tik lawngah nunnuam in kan um thei ding ti cu kan thei cio. Mi hrekkhat in sumsaw hi ṭhat lonak ih hrampi tiah an ruat ṭheu. Sikhalsehla Baibal cun cutin a sim lo. Sumsaw duhnak lawng hi ṭhat lonak ih hrampi a sizia lawng a simmi kan hmu thei.
Sumsaw duhnak hi buainak a suahpi thei. “Ziangahtile paisa duhtuk cu sualnak phunkip thoktu hram a si. Mihrek cun paisa neih an duhtuk ruangah kan zumnak an tlansan ih riahsiatnak in vei tampi an thinlung a kuaiter,” tiah Paul in a sim (1 Tim. 6:10). Sumsaw neihnak dingin, leitlun sumsaw ngah theinak dingin ziangvek thil ṭha lo tuah ding khalah ral ṭhatnak in pek. Cumi cu sumsaw hi kan bawi ah a cang. Curuangah Bawi Jesuh in ‘bawi pahnih a rian thei lo’ a tinak cu a si. Hi leitlun kan nun sungah leitlun sumsaw hawl hi a sual lo. Sikhalsehla cuih sumsaw lawng ruatin kan khawl ih bawi dinhmun ah kan ret ahcun kan nunnak ah buainak tampi a ra ko ding. Cumi cu theithiam in fimkhur zetin sumsaw hawl daan kan thiam a ṭul.
2. Vancung sumsaw khawl ding.
Pathian in hi leitlun sumsaw kha hawl hlah uh a ti lo, khawl hlah uh tiah a ti sawn a si. Hawl hlah uh timi cu cuih leitlun sumsaw le thil lawng hawl, cuih thil lawng thinlung ah ret, cuih thil parah thinlung bun kha a si. Cumi cun kan nunnak in siatsuah thei. Curuangah Pathian in leitlun sumsaw kha vancung sumsaw ah thleng tahrat in hawl dingah in duhsak a si. Leitlun thilri cu rukru in a ruk thei, a siat thei. Sikhalsehla vancung sumsaw cu zokhalin an ruk thei lo ih a siat thei fawn lo.
Sumsaw tampi a neitu milian tlangval pakhat cu Bawi Jesuh hnenah ra in kumkhua nunnak a duhnak thu, cuih kumkhua nunnak ngah theinak dingah ziangmi tuahṭhat a ṭul tiah thu a sut. Cuih milian pa ih a duhmi cu atu nunnak a si lo, kumkhua nunnak a si. Kumkhua nunnak cu Pathian hnen vancung ih ummi a siih cuih hmun ah um a duh thu a simnak a si. Bawi Jesuh in, “Mi famkim sin a duh ahcun va feh awla na neihmi hmuahhmuah zuar tahratin na ngahmi tangkca cu mi farah pawl va ṭhen aw; cuticun vancungah hlawnthil na nei ding. Cuih hnuah i thlun aw,” a ti (Mat. 19:21). Ziangruangah Bawi Jesuh dung thlun dingin vancung sumsaw a ṭul? A si, Bawi Jesuh umnak hmun cu hi leilung ah si loin vancung ah a si ruangah leitlun sumsaw hman a theih lo. Kan thinlung hi Bawi Jesuh thawn hmunkhat ah um ringring ding a ṭul a si.
Thunetnak.
Kan thinlung sungah leitlun sumsaw lawngin a khat ih cuih thil lawng kan duh ahcun kan thinlung khal cuih hmun ah a um ding. Kan thlarau nun khal hi khawvel thil lawngin a khuh thluh ding. Curuangah leitlun sumsaw cu vancung sumsaw ah kan thleng a ṭul. Cutik lawngah Bawi Jesuh ih dungah kan thlun dingin kan thinlung duhnak le kan nunnak khal a hnenah a um ding a si. Cuticun Bawi Jesuh cu kan nunnak ih Bawibik ah a cang ding. Curuangah leitlun sumsaw lawng hawlin kan khawl lo pei. Vancung sumsaw ah thleng tahrat ih khawl dingah Bawi Jesuh in a duh a si. Bawipai’ duhnak vekin vancung ah kan sumsaw khawl cio uhsi.
Duhdawtnak le duhsaknak thawn,
Rev. Dr. Hrang Hmung, DMin., PhD.,
Toungphila, Kalaymyo, Myanmar.
April 9, 2016|Saturday|9:30pm.
No comments:
Post a Comment