UNAU PAHNIH

Khua pakhat ah unau pahnihte an um. Cuih unau pahnih cun nu le pa ih roh tami loram kha hmunkhatte’n an thlo tlang. Upa sawn cu innsang thawn a siih nauta sawn cu tlangval a si. Hite unau pahnih cun lo hna an ttuanmi sungih a ngahmi pawl an zuar ih bangrep in an tthen aw ttheu.


Vei khat cu nauta sawn tlangval pa in hiti’n thu a ruat: “Kei hi mah lawng um ka si. Sumsaw cem dang ciamco ding zianghman ka nei lo. Ka u thawn bangrep ih tthen awk ringring hi a dik lo a si. Kei hrangah malte lawng ka neih khal le a ngah ko sisi…” ti in. Cuticun zantin a fang-inn ihsin fang dip khat a lakih a thupte’n a upa ih fang-inn ah a va thunsak ringring. 

Cu hrawngah a upa khal thu a ruat ve. “Kei cu innsang ka nei ih ka kum upa tik khalah tuamhlawmtu nufa ka nei. Ka naupa cu amah lawng a siih a harsat caan ah tuamhlawmtu a nei si lo. Curuangah kan unau in thilri bangrep ih kan tthen aw hi cu a dik lo a si” tiah a ruat. Curuangah zantin fang dip khat cu a fang-inn ihsin a lakih a naupa ih fang-inn ah a va thunsak ringring.

Cuticun kum le caan a rei vivo thlang. Zantin an fang-inn ihsin fang dip khat an lak ringring na’n an fang-inn ih fang pawl amahkel ih a um ringring an hmu tikah an unau in an mang a bang ngaingai. Ziangruangah hiti’n thil a cang thei timi le an thei veve si lo.

Asinain zaankhat cu a zaanthimzet a siih an unau hnih in an tuahkel an tuah laiah an pah aw. Cuticun thil um daan an unau in an theifiang ngah sal.

An unau pahnih cun an phurmi fang dip an thlak veve ih napi’n an pom aw ta pan lo maw.

Toungphila, Kalaymyo.
Dec 28, 2014.
 
(Hminsin: “More Sower’s Seeds” cabu sungih Cangantu thei lo (Anonymous) ih nganmi “Two Brothers” kha remcang zawngih lehmi a si).