Baibal Caanghril: “Cuih tikcu hrawngah
baptisma petu Johan cu Judea peng ramtthing ah a ra thleng ih thu a sim.
‘Vancung Uknak a nai zo a si. Nan sual siir aw uh,’ tiah a ti” (Mat. 3:1-2).
Siarbet ding: Matthai 3:1-12.
December thla a
thlen cun zumtu tampi cu Christmas hrangah timtuahnak kan nei rero thlang.
Tukum Christmas hrangah ziangmi pawl a ttul ding? ziangvek in kan tuah ding?
timi pawl ruat in a ttulnak vekin kan timtuah rero cio ko lo maw? Eiin hrangah,
hnipuan sinfen hrangah le thu dangdang tampi hrangah timtuahnak kan nei cio ko
ding. Minung lawngin cutin timtuahnak kan nei a si lo. Pathian khal in
Christmas hrangah timtuahnak a nei cia thluh zo a si. Christmas timi cu leitlun
misual pawl rundam dingah van sunlawinak tanta in misual pawl in hawltu
rundamtu Jesuh Khrih suahnak caan a si. Minung zate rundamnak kan co theinak
ding hrangah a si. Pathian in a sersiammi minung zate in Vancung uknak a nai zo
timi thu theiin mah le sualnak pawl kha siir cio ding hrangah a siih Baptisma
petu Johan hmanin timtuahnak a nei a si.
1. Pathian ih timtuahnak.
Bawipa amah rori
in Christmas hrangah timtuahnak a rak nei cia. Cuticun “Tikcu tinmi a thlen
tikah Pathian in a Fapa a run thlah. Nunau sung ihsin a suak ih Judah daan
hnuai ah a nung. Cumi cu daan hnuai ih a ummi pawl tlen dingah le Pathian fa ih
kan can theinak dingah a si,” a ti (Gal. 4:4). Hinah kan hmu theimi cu Pathian
in “tikcu tinmi” a neiih cuih tikcu caan a kim hlan lo a hngak, timi a si. Ziangkim
ah Pathian in caan khiahmi a nei ih a caan khelin hna a ttuan ringring. Rundamtu
Jesuh Khrih hi leitlun a rat hlan caan reipi ihsin Profet pawl, Siangpahrang
pawl a thlah hngai ih Fapa ratnak ding lamzin a rak sial cia, a rak timtuah cia
zo a si. Leitlun santhuanthu tiang (BC ihsin AD ah) thleng ttheh koin a timtuah
hnu ah Fapa a hrinnak ding hrangah a tawlrel a si. Christmas sunglawizet ih kan
hman theinak ding hrangah Pathian in kum reipi sung timtuahnak a rak nei cia zo
a si. Jesuh Khrih cu kannih misual pawl hawl dingah le rundam dingah Pathian ih
timtuah cia vekin a rung ttum a si.
2. Baptistma petu Johan hmangin timtuahnak.
Pathian in a
fapa Jesuh ratnak ding hrangah netabik profet a simi Baptistma petu Johan
hmangin timtuahnak a nei cia. Cuih profet thawn thuthang thupizet pakhat a rak
keng. Cuih thuthang cu rundamnak thuthang cohlang theinak ding hrangah thinlung
sungah “sual sirnak neih ding” hi a si. Thinlung a hakzetmi minung kha
“thinlung kekkuai” in “misual ka si” tiah kan cohlang aw dingih cuihsin “sual
sirnak” kan neih a ttul. Cutik lawngah “keimah” timi a hlo dingih thinlung sangka
kan ong aw thei ding. Jesuh hrangah kan thinlung sangka kan ong a ttul. Johan
ih thuthang phuanmi cu thuneihnak thawn a si. Pathian ih huham cahnak a tel.
Amah hnen a pantu mi pakhat cio ih an sualnak pawl a phuangsak thluh. Culawng
si loin Pathian thutthennak thu khal ral tthazet in a phuang thluh. Cutin
thinlung timtuahnak an nei lo ahcun Messiah naute cohlang ding a ol lozia khal
fiangzetin a sim cia thluh. Johan ih a phuangmi thupibik cu ‘Vancung Uknak a
nai zo a si. Nan sual siir aw uh,’ timi hi a si.
3. Siirnak thinlung thawn timtuahnak.
Pathian fapa
Jesuh Khrih hi leitlun a ratnak hi minung sinak ih rikhiah pawl, ttawnttaihnak
pawl, sambaunak pawl lak ihsin ‘famkim nun’ kan nei theinak ding hrangah a si.
A hlomi pawl hawlsuak in kumkhua nunnak sungah luhpi ding hi Bawi Jesuh ih
hnattuan tumbik a si. Mi dam lo pawlin siibawi an ttul. Misual kan siih kanmah
tein kan run aw thei lo, rundamtu kan ttul. Curuangah misual kanmah pawl thawn
thihnak, phumnak tuar dingah a rung ttum. Misual kanmah pawl hrangah
ningzahnak, harsatnak le rethei zonzainak pawl in tuarsak thluh dingah a si.
Cutin rethei zonzainak le harsatnak phumkim thawn a khatmi cawrawl einak kuang
sung ihsin thinglamtah par tiang leitlun a nunnak pawl hi misual pawl kumkhua
thihnak ihsin kan luat theinak ding hrangah a si. Bawi Jesuh in hitin a tuarnak
pawl hi amai’ sualnak ruangah a si lo. Minung pawl kan sualnak ruangah a si.
Curuangah misual ka si ti thei-aw in siirnak thinlung taktak kan nei cio a
ttul.
Thunetnak.
Pathian ih timtuahmi Christmas hi olsam zetmi le man nei lomi Christmas a si lo. Minung nunnak sungah duhdawtnak, zaangfahnak, zawnruahnak pawl lawng si loin a neihmi ziangkim thawn sualthim khur thukpi sung ihsin runnak ding hrangah a si. Curuangah Christmas caan leitlun daan in eiin hrangah timtuahnak, laksawng pek dingih timtuahnak pawl kan neih cio ding hi a ttulzetmi an si ko. Sikhalsehla cumi pawl hnakih a thupibikmi pakhat cu “Sual siirnak nei ding” hi a si. A hlomi pawl hawl dingah le rundam dingih a rung ttumtu Jesuh Khrih kha siirnak thinlung taktak thawn kan hmuak ngah cio ding a thupi ngaingai. Cutin a si lo ahcun a ra dingmi “Christmas” hi kan hrangah a lak men a si pang ding. Misual pawl hrangah a ra kan ti ko nain kan sualnak kan thei awk lo ahcun siirnak thinlung kan nei thei lo ding. Cutikah Christmas hi kan hrangah sullam a nei lo pang ding. Curuangah zumtu pawl ih kan thinlung sungah Pathian ih in ret sakmi a dikmi siirnak thinlung thawn a hmai ah kuun in kan um thiam a ttul ngaingai.
Pathian ih timtuahmi Christmas hi olsam zetmi le man nei lomi Christmas a si lo. Minung nunnak sungah duhdawtnak, zaangfahnak, zawnruahnak pawl lawng si loin a neihmi ziangkim thawn sualthim khur thukpi sung ihsin runnak ding hrangah a si. Curuangah Christmas caan leitlun daan in eiin hrangah timtuahnak, laksawng pek dingih timtuahnak pawl kan neih cio ding hi a ttulzetmi an si ko. Sikhalsehla cumi pawl hnakih a thupibikmi pakhat cu “Sual siirnak nei ding” hi a si. A hlomi pawl hawl dingah le rundam dingih a rung ttumtu Jesuh Khrih kha siirnak thinlung taktak thawn kan hmuak ngah cio ding a thupi ngaingai. Cutin a si lo ahcun a ra dingmi “Christmas” hi kan hrangah a lak men a si pang ding. Misual pawl hrangah a ra kan ti ko nain kan sualnak kan thei awk lo ahcun siirnak thinlung kan nei thei lo ding. Cutikah Christmas hi kan hrangah sullam a nei lo pang ding. Curuangah zumtu pawl ih kan thinlung sungah Pathian ih in ret sakmi a dikmi siirnak thinlung thawn a hmai ah kuun in kan um thiam a ttul ngaingai.
Duhdawtnak le duhsaknak thawn,
Rev. CJ Hrang
Hmung, Ph.D.,
Camkhat Salt
Lake, Utah, USA.
December
12, 2015|Saturday|9:30 pm
No comments:
Post a Comment