BAWIPA IN SITER IN DUHMI PAWL

Baibal Caanghril: “Bawipa amah in a tthami le tuahter in duhmi cu in sim zo. Siter in duhmi cu: A dingmi tuah le zaangfahnak tlaihsan le tangdorte in Pathian thawn fehtlang khi a si” (Mikah 6:8).

Nitin kan nunnak ah zumtu diktak kan si ahcun Khristian nun daan dik thawn nung thiam ding hi a thupi ngaingai. Khristian nun ih kan nun tikah Pathian in a dingmi lamzin ah in hruai vivo ding a si. Pathian in amah a zumtu pawl kha siter a duhmi pawl tampi in a sim ttheu. Israel pawl thuanthu sung kan zoh tikah Pathian in siter a duhmi tampi a um. Cumi sungin Profet Mikah khalin Pathian in a minung pawl siter a duhmi pawl a sim ve. Cuih thuthawn pehpar aw in kan nunnak ah Pathian ih tuahter in duhmi Profet Mikah hmangin in simmi thu pawl kan zohtlang ta hrih ding.

1. A dingmi tuah ding.

Pathian a zumtu taktak kan si ahcun Pathian hmai ah dingnak thawn nung cio ding kan ttul ngaingai. Ziangahtile kan biakmi Pathian in, “Dingnak cu ka duh ih puarthaunak le thiisen luannak cu ka hua a si” a ti (Isa. 61:8). Dingnak thawn nung timi cu midang parah duhdawtnak kan nei theinak le felzet ih kan nunnak in langter dingmi a si. Bawi Jesuh in, “Na innhnen kha nangmah na duh awk vekin na duhdaw pei” a ti. Duhdawtnak kan nei tik lawngah kan innhnen kan duhdawt thei ding a si. Nitin kan nunnak ah dingnak thawn kan nung dingih midang parah duhdawtnak kan nei thei ringring ding hi a thupi ngaingai a si. Profet Amos khalin, “Dingthluk lairelnak cu tivapi bangin luang sehla felnak cu a kaang dah lomi ti bangin luang sawn seh” a ti (Amos 5:24).

2. Zaangfahnak tlaihsan ding.

Pathian hmaiah a dingmi zohman kan um lo. A hleice in minung cu sualnak sungah a pil hlo zo mi kan si ruangah dingnak kan tuah thei hrimhrim lo. Sikhalsehla Pathian in amai’ hmuihmel kengin in sersiammi kan si ruangah a nunnak liam tiangin in duhdawt (Joh. 3:16). Cumi cu Pathin ih zaangfah lainatnak ruangah a si. Paul in, “Ziangahtile nannih cu Pathian zaangfahnak zaarah umnak in rundam nan si. Hi rundamnak cu nan ttuannk ruangih nan ngahmi a si lo, Pathian ih laksawng a si” tiah a simfiang (Efe. 2:8). Zaangfahnak timi cu kan phu lo cingin kan comi a si. Kan tling lomi parah thu in tthen lo ih Pathian ih zaangfahnak sawnin mi famkim ah in tuah sawn. Curuangah zumtu pawl nitin kan nunnak ah cuih zaangfahnak cu tlaisan in kan nung ding a thupi ngaingai a si.

3. Tangdor in Pathian thawn fehtlang ding.

Kan nunnak kan zohkir sal tikah porh awk dingmi zianghman kan nei hrimhrim lo. Sikhalsehla kan nunnak caantawite sungah ziangkim nei thluh, thil ti thei thluh vekin a ttul lo piin kan hngal, kan porh aw ttheu. Kan nunnak hi caan tawite sung a si timi hi kan hngilh pang ttheu. Saam cangantu cun, “Kan nun tawizia siar daan in zirh awla, cule mifim ah kan cang ding” a ti (Saam 190:12). Bawi Jesuh in puarthau le porh aw loin tangdorte ih nung dingah in zirh a si (Mat. 20:26-28). Amah rori khal Bawi a si ko nain a dungthluntu pawlih ke a kholhsak hngai (Joh. 13:4-10). Piter in, “Nan zatein tangdornak thawn thuam aw uhla pakhat le pakhat bawm aw uh. Ziangahtile Ca Thianghlim in, ‘Mi hngal pawl cu Pathian in a dodal ih tangdormi cu mithmai ttha a pek a si’ tiah a ti. Curuangah a cakmi Pathian ih kut hnuai ah tangdorte in um uhla amah in caan a kim a ti tikah a lo khaisaang leh ding” a ti (1 Pit. 5:5-6). Tangdorte in Pathian thawn feh tlang ding hi a thupi ngaingai a si.

Thunetnak.

A tlun ih kan tarlangmi thu pathum pawl hi zumtu nitin kan nunnak ih nunpi dingah Pathian in a dilmi pawl a si. Cuih thu kan theifiang cio dingah a thupi ngaingai. Himi pawl siar lo Pathian in a dang thawinak in dil lo a si, tiah Profet Mikah in a simfiang zo a si. Curuangah zumtu pawl nitin kan nunnak hi Pathian ih pekmi a si ti theithiam in ap-awknak thawn a hnenah kan pan ringring ding hi a thupi ngaingai a si.

               

Duhdawtnak le duhsaknak thawn,

Rev. Dr. CJ Hrang Hmung, PhD.,

Camkhat Laurel, Maryland, USA.

November 28, 2015|Saturday|11:30 pm.