Tuluk thuruatthiam hminthang Confucius hi zankhat cu lam lengin a vak. Cule lamzin ah mi pahnih thawn an tong aw.
A hmaisapa in, “Confucius, nang hi ziangzongza ah na tawk, na thiam ngaingai. Thu tampi na ruat thei. Thu ttha tampi na khihhmuh vivo. Mi tampi in an lo upat ngaingai. Nang hi upat tlak na tling rori ko e” tiah a porh, a lawm ciamco. Cutikah Confucius in cupa cu a zoh ih a hni men. Zianghman a ttong lo.
Culaifangah a dang pakhat sawnin, “Confucius, nang hi zianghman na si hrimhrim lo. Midang pawl in na thuhla an theifiang lo ruangah an lo zohsang men. Thungaithlak in kan sim a sile nang hi zianghman theihmi na nei cuca lo. Zianghman lo mi menmen na si ko,” tiah a hmuhsuam, a nautat ciamco. Cupa khal cu Confucius in hni phah in a zoh men. Cuhnu ah Confucius cu a feh duhnak lam ah a feh vivo.
Cumi an si daan a thok ihsin a net tiang a hmutu a kiangih um vemi Ngakaitu pakhat in, Confucius hnenah a feh ih, “Nang cun a lo lawmtu khal zianghman na sim sal lo. A lo hmuhsuamtu khal zianghman na sim cuang lo. Ziangruangah so?” tiah a sut.
Cutikah Confucius cun hni phahin, “Anmah ih in lom ah siseh, in hmuhsuam ah siseh, keimai’ sinak ka neihciami cu zianghman a danglam cuang lo. In lawmmi kha ka porh aw khalle a mah kel, a tthangso cuang lo. In relsiat in hmuhsuam ruangah khal ka niam hleice cuang lo. Um thiam ding lawng a ttul ih a thupi. Cule an simmi pohpoh kha tikherkher ih lak ding khal a ttul lo. Kannih cu mi ih lom ding, hmuhsuam dingin hna ttuan rero kan si lo. Mai’ titheitawk suahin thil ttha tuah vivo ding hi a thupi sawn” tiah cuih ngakaitu cu a sim hngai.
Thilttha tiih na ruahmi pawl na tuah laiah a lo lawmtu an um ding vekin a lo relsiat nautattu khal an um ko ding. Ttha tiih na ruatmi cu tuah vivo sawn awla tthathnemnak tampi na tuah ngah sawn ding.
Duhdawtnak le duhsaknak thawn,
Dr. CJ Hrang Hmung, PhD.
Kalaymyo.
May 15, 2015
Ref. The Express Time, 13/5/2015.
No comments:
Post a Comment