KHRIH IH RAL THU AH RALRIN PEKNAK

Baibal Caanghril: “Ka faale pawl, ni netnak a nai zo. Khrih ih Ral a ra ding ti nan thei; atu-ah Khrih ih ral tampi an lang zo ih curuangah neta bik caan a nai zo ti kan thei.....  Asinain nannih cu Khrih ih Thlarau Thianghlim a lo burh zo ruangah nan zatein thutak theitu nan si. Nan hnenih cakuat ka ngan hi thutak nan theih lo ruangah a si lo; thutak nan thei ih thuphan cu thutak ihsin a ra dah lo ti khal nan theih ruangah a si sawn" (1 Johan 2:18-21).

Kan Baibal ca thianghlim kan siar tikah atu kan san hi san sia a ti. Kan san kan zoh tikah siatnak lam kan pan rero. San netabik lam kan lut rero ti cu el theih a si lo. Kan leilung ah remdaihnak hnakin buainak a suak deuhdeuh. November 14, 2015 zan khalah France ram Paris khuapi ah misual (ISIS) pawlin mi 100 lenglo an that ih an ti. Ram tinkim ah buainak a suak rero. Cuvekin biaknak lam khah zirhnak dik lo tampi a suak. Cumi pawl ralrin theinak dingah Johan in a simmi pawl hi zoh in thazaang kan lak cio dingah ka lo sawm.

1. Ni netnak a nai zo.

A tu kan san hi netabik san a si. Ni netnak cu a tu hi a si thlang. Jesuh Khrih hi leitlun ah a veikhatnak a rat tikah san netnak hram a thok. Cuvek in Jesuh Khrih a ratsal tik ah ni netnak a cem leh ding a si. Leitlun san thuanthupi cu mifim pawlin tthenhnih ah an tthen. Cumi cu Jesuh Khrih a rat hlan le Jesuh Khrih rat hnu caan tiah a si. Hi leitlun kan hmanmi nithla siarnak khal Jesuh Khrih rat hlan (BC=Before Christ) le Jesuh Khrih rat hnu caan (AD=Anno Domino) tiah tthen in a um. A tu hi Jesuh Khrih a rat hnu kum thawnghnih kan lan rero zo a si.

Jesuh Khrih a rat sal hlanah Khrih ih ral Anti Khrih a ra hmaisa ding (2 Thess. 2:1-4; 8; 1 Joh. 4:3). Sikhalsehla Khrih ih ral lole Anti Khrih a rat hlanah Anti Khrih fate tampi a ra suak ding. Cuih Anti Khrih tampi a rak suak zo (Mar. 13:5-6; 21-23). Cumi pawl cu zirhnak dik lo zirhtu pawl an si. Cumi pawl cun minung tampi kha an dung ah thlun dingin an thlem rero hngai.

2. Zirhsualtu Khrih ih ral pawl.

Cuih zirhsualtu pawl lole Khrih ih ral pawl cu Kawhhran ihsin an suak thluh ding. A hmaisa ah cumi pawlcu zumtu pawl thawn an um tlang nain zumfeknak an nei lo. Kawhhran thawn khal pehpar awknak an nei dah lo tiah Johan in a sim. Cuih zirhsualtu pawl cu a thok pek ihsin zumtu diktak an si dah hrimhrim lo.

Zumtu tampi in himi caang an siar tikah a tlukmi lole zumnak a hnongtu pawl tiah an simfiang ttheu. Veikhat hman zumnak a nei dah lo pawl tiin khal an simfiang ttheu. A dikmi zumtu cu an tlu, an sawn dah lo ding. A dikmi zumtu hrangah rundamnak a co ngahmi cu a thlau dah hrimhrim lo ding a si. A zumnak a dik lo ahcun zumfeknak a nei thei nawn lo ruangah rundammi a si lam kha a hnong ngah ta ding a si.

3. Kan zatein thutak theitu kan si.

A dikmi zumtu pawl cu a Thianghlimmi Jesuh Khrih ih hriakthihmi an si. Annih cu Thlarau Thianghlim ih hriakthihmi an si. Pathian in Jesuh Khrih kha Thlarau Thianghlim hmangin hriak a thih (Tirh. 10:38). Cubangtukin Jesuh Khrih khalin zumtu hmuahhmuah kha Thlarau Thianghlim a burh hngai. Cuih Thlarau Thianghlim cu thutak hmuhtu thlarau a si (Joh. 14:17). Curuangah cuih thlarau Thianghlim thawnin thutak kan thei theinak a si (Joh. 14:26). A dikmi zumtu pawl cu a dik lomi zirhnak an tuah dah lo.

Johan cakuat a siartu pawl cu thutak thei cia tu pawl an si. Cu pawl cu thutak an thei hrih lo ruangah Johan in ca a kuat hngaimi si loin an thei zo ruangah a kuat hngaimi a si sawn. Himi cakuat hi zumtu pawl hrangah kuatmi a si. Sikhalsehla zumtu pawl cu zirhtu dik lo pawlih thuphan permi le bumnak an tuar thei. Cutin thuphan le bumnak a tong ngah lonak dingah Johan in ca a kuat hngainak a si. Zirhtu dik lo pawl cu a dik lomi zirhnak pawl kha a dik zet vekin an zirh. Sikhalsehla cuih zirhnak pawl cu thutak zirhnak an si hrimhrim lo, timi kha Johan in a theiter duh a si.

Thunetnak.

Kan leitlun thilcangmi, dinhmun le um daan pawl zoh salin zumtu pawl ralrin ding kan ttul ngaingai thlang. Daithlang ih um ding a ngah nawn lo. Zirhnak dik lo tampi a lut ih zirhsualtu pawlin nitin in thlem rero fawn. Pathian thutak kan nun sungah kan nei taktak lo ahcun hloralnak a suahpi mai ding. Zumtu pawl kan nunnak Pathian thawn pehzomnak thlauthla lo dingin kan kaihnget a ttul. Pathian kanmah thawn a um ringring (Immanuel) ti theiin amah thawn nitin pehzom in kan um ringring cio dingah ap-awk ringring kan ttul. Cuticun Khrih ih ral in in neh thei dah hrimhrim lo ding a si.

Duhdawtnak le duhsaknak thawn,

Rev. CJ Hrang Hmung, DMin., PhD.,

Camkhat San Diego, California, USA.

November 15, 2015|Sunday|12:25 am