KHRISTIAN NUN IH TUAH TTULMI PAWL

Baibal Caanghril: “Himi ruang rori ahhin nan zumnak parah tthatnak bet tum uh; nan tthatnak parah theihnak bet tum uh; nan theihnak parah suup awk theinak bet hrih uh; cule suup awk theinak parah tuar theinak bet uhla nan tuar theinak parah Pathian ttihzahnak bet uh.  Pathian ttihzahnak nan neihmi parah unau tlaihsannak bet uh; cule Khristian unau tlaihsannak parah duhdawtnak bet uh.” (2 Piter 1:5-7).

Siarbet dingmi: 2 Piter 1:8-9; 1 Kor. 15:58.

Rundamnak kan co ngah hnu ahcun Pathian faate kan si thluh zo. Curuangah nitin kan nun daan ding hi remtthat vivo a ttul. Pitling nun kan nei theinak dingah kan nun daan ding le tuah ttulmi pawl tampi a um. Cumi thuthawn pehpar aw in Piter ih simmi thuhla pawl a tanglam vekin thazaang lak thar sal cio uhsi.

1. Zumtu pawlih kan tuah ttulmi pawl

2 Piter 1:5-7 sung kan siar tikah minung ih kan tuah ttulmi (7) pawl kan hmu thei. Cuih tuah dingmi pawl cu Pathian ih pekmi zumnak thawn komkhawm ih hman dingmi a si. Zumnak timi cu Pathian ih pekmi a si. Pathian hnen ihsin a rami a si. Zumnak kan neih hnu ah minung ih tuah ttulmi pawl cu:

(i) Tthatnak: Nitin kan nunnak ah thil ttha tuah dingmi tampi a um. Mi zovek par khalah tthatnak tuah in nung ding a thupi ngaingai. Midang parih thilttha kan tuahmi zohin Pathian ih sunlawinak a lang thei ding a si. Pathian faate kan si cio ruangah kan nunnak ah tthatnak in kan langter a ttul.

(ii) Theihnak: Pathian in minung pawl ziangkim thei theinak dingah thluak in pek. Cumi cu kanmah le tawk cio in tthanso ter ding kan ttul. A hleice in Pathian thu theihnak lamah kan tlaksam zia thei in a thu kan theifiang theinak dingah napiin zuam kan ttul.

(iii) Suup awk theinak: Minung pawl sualnak sungih in thlaktu cu suup thei lonak ruangah a si. Nitin kan nunnak sungah tisa duhhiarnak pawl hi suup thei dingah kan zuam nasa a ttul. Kan ttongkam, kan duhnak, kan thintawinak, tvp. in kan nun in siatsuah thei ruangah napi’n kan suup awk ding a thupi ngaingai. Pathian thu kan theih sinsin tikah suup awk theinak kan nei thei ding.

(iv) Tuar theinak: Minung cu misual kan si ruangah nitin tuar dingmi tampi kan nei. Bawi Jesuh cu sualnak zianghman a nei lo nain kan sualnak zate hrangah in tuarsak. Curuangah Bawi Jesuh ih tuarnak kha zoh in kan nunnak ah ziangvek a thleng khalle tuar theinak dingah kan zuam a ttul.

(v) Pathian ttihzahnak: Zumtu kan nunnak ah Pathian ttihzah ding hi a thupi bik a si. Pathian ttihzahnak kan nei ahcun tthat lonak, sualnak, tisa duhnak ziangkim kan hrial thei ding a si. Cuihsin ziangvek thil a thleng khalle tuar theinak kan nei vivo thei dingih Pathian ttihzahnak khal kan nun ah a luah thei ding.

(vi) Unau tlaihsannak: Minung timi cu unau sungkhat thawn tlangleng tlangmi kan si. Vei tampi ah kan unau sungkhat ziang siar loin duhtawk ih kan nun caan tampi a um. Kan harsat caan ah a naibik in ttanpitu le kan hrangah thla in camsak ringringtu pawl hi sungkhat unau lawng si loin zumtu unau pawl an si timi hi kan hngilh lo ding a thupi. Pathian kan ttihzan taktak ahcun mit ih kan hmu theimi unau pawl kan tlaihsan vivo ding.

(vii) Duhdawtnak: Pathian cu duhdawtnak a si. Pathian kan duhdawt hi amah in in duhdawt hmaisa ruangah a si. Curuangah kannih a sersiammi minung pawl khal pakhat le pakhat kan duhdawt awk ding a ttul. Pathian hmuihmel kengih sersiammi kan si thluh ruangah mi zovek par khalah duhdawtnak kan nei thluh a ttul. A tlunih tarlangmi hmuahhmuah in huap thluhtu cu duhdawtnak a si.

2. Jesuh a theifiangtu cu rah tampi a rah ding.

Khristian nun ih kan tuah ttulmi (7) pawl thawn a famkim theimi minung zohman kan um lo. Minung cun Jesuh Khrih fiangzetin kan theih taktak thei hrih lo ruangah kan nun a car cuahco ttheu. Cuticun a carmi thingkung bangtuk ah kan cang thei (c. 8). Jesuh Khrih a theifiang taktaktu cu rah tampi a rah thei ding. Rah a rah thei lotu cu Bawi Jesuh kha an theifiang taktak lo kan ti thei. Cubang pawl ih nunnak cu zianghman tthathnemnak a um lo.

Culawng si loin minung ih tuah ttulmi pawl kan neih famkim thei lo ruangah Jesuh Khrih kan hmu famkim thei lo. Mitcaw bangin kan um celcel. Nunnak ih huham, tumtahnak le a fehpi duhmi khal kan theifiang thei lo. Kan sualnak nun hlun cu Jesuh Khrih in a kholhfai zo ruangah mi thar ah kan cang zo na’n sualnak sungah kan pil thotho ih mi hlun ah kirsal kan duh ringring (c. 9).

Thunetnak.

Piangthar nun hi thil ol a si lo. Piangthar hnu ah ziangkim olsam le tlung zutzo dingah kan ruat ttheu hi kan palhnak a si. Naute suakpek cu zianghman tuah ttul loin nu le pa ih cawmdawl a ttul. Sikhalsehla a tthanglian vivo tikah amahte’n a nunnak hrangah tawlrel a ttul. Rundam fa kan si hnu ahhin Pathian thu sungih hnget zetin kan um theinak dingah le Khristian nun famkim kan nei theinak dingah tuah ttulmi pawl hi a ol lo ngaingai. Sikhalsehla ziangtluk harsatnak a um khalle tlu lo tein hngetzet ih kan ding thei dingah thazaang thar kan lak ringring ding hi a thupi ngaingai (1 Kor. 15:58).

Duhdawtnak le duhsaknak thawn,

Rev. Dr. CJ Hrang Hmung, DMin., PhD.,

Camkhat Seattle, Washington, USA.

November 21, 2015|Saturday|10:30 pm