A THIANGMI LE COHLANTLAKMI

Baibal Canghril: “Cuti a si ruangah ka u le ka nau tla, a tam zetmi Pathian ih in zaangfahnak ruangah  hin nan ruangpumpi cu a thiangmi le cohlantlak raithawinak bangtukin Pathian hnenah pe uh, tiah ka lo dil. Cumi cu Pathian hnenih nan pek dingmi biaknak taktak cu a si” (Rom 12:1).

Zumtu pawl nitin kan nunnak ah kanmai’ duhnak vekih nung loin Pathian duhmi le cohlanmi vekih nung ding hi a thupi zetmi a si. Cumi thawn pehpar awin Paul in kan ruangpumpi cu a thiangmi le cohlantlak raithawinak bangtukin Pathian hnenah pe uh, tiah in forh a si. Baibal ca sungah Pathian in cohlantlak a timi tampi a ummi sungin a tanglam ih thu pawl hmangin thazaang kan lak tlang hrih ding.

1. A duhnak vekin thlun ding.

Pathian duhnak vekin thlun ih nung ding hi Khristian nun ah a thupi zetmi pakhat a si. Pathian cu a lenglam raithawi peknak hnakin amai’ thupek vekih nung hi a duhsawn a si. Tuini zumtu tampi cun peknak, kawhhran sungah tuah dingmi pawl, biakpeknak pawl kha thupi zetin kan tuah ttheu ko. Asinain Pathian ih duhnak thlun hnakin kanmai’ duhnak vekin kan tuahmi a tam sawn. Pathian ih duhnak pawl cu Baibal ca sungah famkim zetin a sim thluh zo a si. Pathian duhnak vekih nung timi cu kan nunnak ah Pathian ih duhnak kha kan thinlung takte’n thupibik ah ret khi a si. Siangpahrang Saul ih nun kan zoh tikah Pathian thu ngai hnakin amai’ duhnak vekin raithawi ding kha thupi sawn ah a ret. Curuangah Pathian in a hnong a si. Culawng si loin “Saul hi siangpahrang ih ka can ter cu ka sir aw ngaingai” a tiih siangpahrang sinak ihsin a hnong (1 Sam. 15:11). Profet Samuel hmangin, “Khuimi so Bawipa in a duh sawn? Amah ih thu thlun maw, a si lole saserh peknak le thawinak so? Tuu a ttha bikmi thawn a hnenih raithawi hnakin amah ih thu thlun cu a ttha sawn a si” a ti (1 Sam. 15:22). Cuticun Pathian in thildang ziangkim hnakin a thu thlun hi a duh sawn tiah kan hmu thei. Jeremiah 7:22-23 sungah Pathian in, “Izipt ram ihsin nan pu le nan pa pawl ka hruaisuak laiah mei-ur thawinak le thawinak dangdang tuah ding zianghman thu ka pe lo. Sikhalsehla thukham pakhat ka pek: Ka thu ngai uh tiah thu ka pek a si. Ka thu nan ngai ahcun keimah hi nan Pathian ka si dingih nannih cu ka minung nan si ding” a ti. Curuangah Pathian ih thu thlun hi a thupi zet a si, tiah kan hmu thei.

2. A dikmi tuah ding.

Thufim ngantu in, “Bawipa in thinlung ttha lo pawl a hua. Asinain thildik a tuahtu pawl cu a duh” a ti (Thuf. 11:20). Thinlung ttha lo pawl cu minung in kan duh lo vekin Pathian khalin a hua. Pathian ih duhmi cu ziangvek lamzin ah kan zawh, ziangvek thil dik kan tuah timi parah a um. Pathian in, “Atu ah nan hril dingah nunnak le thihnak, a si lole Pathian thluasuahnak le camsiatnak ka lo pek ih nan hrilmi theihpitu ah lei le van ka ko a si. Nunnak hril uh. Cuticun nanmah le nan tesinfa pawl nan nung ding” tiah a ti (Daanpek. 30:19). Cuihtlun ah Bawi Jesuh khalin a kaumi le a fiakmi lamzin pahnih thuhla a sim hnu ah a fiakmi kotka sungah fehin nung dingah in forh a si (Mat. 7:13-14). Kan hrilmi le kan tuahmi pawl in kan nunnak sungah thlengawk-nak nasa zet in a thleng thei a si. Saam cangantu cun mi ttha lo pawl le misual pawl ih lamzin thlun lo dingah ralrinnak in pek. Zawh ding hman si loin an lakih tel lo dingah in sim (Saam 1). Ziangahtile cubang pawl thawn kan pawlkom tikah siatralnak ah in fehpi thei ruangah a si.

3. Rin tlakin nung ding.

Thufim sungah, “Bawipa in thuphan pertu pawl a hua. Asinain miding rintlak pawl cu a lawm” a ti (Thufim 12:20). Thuphan pertu cu Pathian in a hua, minung khalin kan hua. Miding rintlak timi hi a thupi zetmi a si. Pathian kiangah a ding ngahtu pawl cu zo pawl an si kan ti a sile amah a rinsantu pawl an si (Thup. 17:14). Thutak ih nung rintlaknak cu Pathian biaknak khalah a thupi zetmi a si (Joh. 4:24). Paul in a fapa tlukih a duhdawtmi Timote hnenah rintlak ih nung dingah le midang thu zirh sin theitu pawl hnenah kawhhran hruai theitu ding pawl hnenah ap dingah a forh hngai a si (2 Tim. 2:2). Thuphuan sungah, “Thihnak tuar ding a si hmanah ka hrangah rinsan tlak in um uhla nan neh man ah nunnak suilukhuh ka lo pe ding” a ti (Thup. 2:10).

Thunetnak.

Paul in Pathian ih duhmi le cohlan tlakmi pawl hi ziangmi pawl an si timi kan theifiang theinak dingah kan thinlung thleng a ttul zia Rom 12:1 sungah fiangzetin a sim hngai a si. Duhdawtmi zumtu u le nau pawl, nitintein kanmah le kan nunnak cio kha cekfel awk sal in Pathian ih duhmi le a cohlanmi nun thiang thawn kan nung theinak dingah Baibal ca siar ringring in Pathian duhnak ziang a si timi kha thei in nung cio dingah a thupi ngaingai a si. Pathian hnenah cat loin kan nunnak ap ringring uhsi.

Duhdawtnka le duhsaknak thawn,

Rev. Dr. CJ Hrang Hmung, PhD.,

December 5, 2015|Saturday|11:30 pm.

Salt Lake City, Utah, USA.