Leitlun hnin dumdo
tiang ral neh theizettu ralbawi mak tara Napoleon a thihzikte ih a ṭongmi ṭongkam
pakhat te hin nun in sim zetin ka thei.
A simmi cu:
“Ka lo sim ding. Alexander, Caesar, Charlemagne le kei in ram tumzet kan dinsuah. Sikhalsehla cuih ram pawl hi hnek awcop ih dinmi a si. Jesuh Khrih lawngin a dinmi ram hi duhdawtnak parah hram bunin a din ruangah tuini ah a dungthluntu tampi a hrang thi ngam in an um.
Kei hi veikhat laiah ralbawi, ralkap thawng tampi ka hoha ih thu ka pek.
Asinain atu ka kiangah zianghman a um lo.
Kei hi veikhat laiah continent pathum ka do neh ih ka uk thei.
Asinain atu ka ke retnak ding hmunte hman ka nei nawn lo.
Jesuh cun keimah hnakin nehnak nasazet a co.
A hnenah ralkap pakhat hman a um lo.
Leilung ram pakhat te hman a uk dah lo.
Sikhalsehla a uknak ram cu minung thawng tampi thinlung sungah a um thei a si." a ti.
A dikmi duhdawtnak hi hriamhrei hnakin a hriam ih minung zate ih thinlung le thlarau tiang ah hmun a lak thei.
Minung pakhat hnen ihsin a dang pakhat hnenah pesawng vivo a thei ih sullam a neizetmi khal a si fawn.
Tulai zumtu tampi cun mai' sinak cawisang duh ah midang kan namthlak ttheu. Mah le mah khaisang duh ah midang kan vuakthlak ttheu. Mah hnakin midang laar sawn ding hi kan duh lo, kan iksik kan ti ding maw.. mah lawng thupi tukih kan ret ruangah a si sawn pei???
Napoleon ih simmi bangin Jesuh ih neihmi duhdawtnak dik hi kan hrangah a thupibik a si, timi hi kan theih cio ahcun a tthatnak in kan hmu thluh thei ding nan...
"Atu ahcun a hmun ringringmi thil pathum an um ih zumnak, ruahsannak le duhdawtnak an si; himi lakah a tum bikmi cu duhdawtnak a si" (1 Kor. 13:13).
Himi thu te in na hrangah ziang tal tthathnemnak a lo pe maw?
Duhdawtnak le duhsaknak thawn,
Dr. CJ Hrang Hmung, PhD.
August 29, 2013
Manila, Philippines
siar man hla tuk aw.
ReplyDelete