PATHIAN HNENAH LUNGAWINAK

Baibal caanghril: “Bawipa thawn nan pehzom awknak ahhin nan lungawi ringring hram uh. Ka nolhsal hrih ding: nan lungawi hram uh!” (Fil. 4:4)

Kan umnak hi leitlun kan zoh tikah nikhat hnu nikhat natnak a karhzai vivo. Thubuai a suak deuhdeuh. Lungawi ding thu theih ding hi a mal sinsin. Lungawinak ziangtluk kan hawl rero khal le hmu ding a um lo deuhdeuh. Hnangamnak thu a mal vivo. Hnihsuakza zuknung pawl zohin siseh, capoh thunuam relnak in siseh, kan lungawi thei taktak lo. Pathian thu sung lawngah lungawinak a umzia hi Bawi Jesuh ih in zirhmi a si. Cumi lungawinak umzia pawl kan zoh tlang hrih pei.

1. Leitlun ih lungawinak.

Zokhal thilttha kan duh cio. Cuih kan duhmi thilttha kan ngah tikah kan lungawi zet. Kan hnattuanmi le tumtahmi a hlawhtling tikah kan lungawi zet. Mi tampi cun nitin kan nunnak ah lungawi ih hni thei ringring dingah a phunphun in kan hawl. Thufim sung kan siar tikah, “Hnihnak aw in riahsiatnak aw a thup thei. Sikhalsehla lungawinak a cem tikah riahsiatnak cu a taang ringring ding,” timi thu kan hmu thei (Thuf. 14:13). Leitlun lungawinak cun hmakhatte sung lungawinak a pek thei konain a hmun ngaingai lo. Thufim cangantu Solomon tlukin nomnak a duhtu le a hawltu hi leitlun ah zohman kan tong lo ding. Sikhalsehla Solomon in hi leitlun ah nomnak le lungawinak taktak a tong lo. Cumi cu ziangtin kan thei thei? Thusimtu a ngan tikah, “Zianghman an si lo, zianghman an si lo. Thil hmuahhmuah hi zianghman an si lo,” tiah a thu a thok a si (Thusimtu 1:2). Curuangah hi leitlun ahhin lungawinak diktak a um lo. Ziangtluk kan hawl rero khalle kan tong dah hrimhrim lo ding timi cu a fiangzet a si.

2. Bawipa hnenih lungawinak.

Bawi Jesuh in zumtu 72 a hrilih khuakip le hmunkip ah mi 2 ciar a thlah hngai. Cupawl cu lungawizet in an ra kir sal ih, “Bawipa, na hmin in ramhuai pawl kan dawi tikah kan thu an ngai a si,” an ti (Luk. 10:17). Asinain Bawi Jesuh in, “Thlarau ttha lo in nan thu an ngai ruangah nan lungawi hlah uh; nan hmin vancung ih ngan cia a si ruangah nan lungawi sawn uh,” a ti (Luk. 10:20).  Cuih tlunah hitin a cangmi hi anmai’ thil ti theinak ruangah si loin Pathian duhzawng ih a cangmi a sizia khal fiangtein a sim hngai (Luk. 10:21).

Minung timi cu kan ttuanmi hlawhtlin caan a um vekin kan hlawhtling lo caan khal a um thei. Bawi Jesuh ih sim duhmi cu kan ttuanmi le hlawhtlinnak zoh in kan lungawi ahcun ziangtik khalah kan nun muril taktak ah lungawinak a um lo ding, timi hi a si. Habakkuk in, “Theipi in rah a nei lo ih Sabit hri ih sabit a rah lo hmanah, Olif kung ih olif rah an siat ttheh ih, Lo in rawl a suah lo hmanah, Tuu pawl an thihfai ttheh ih, caw inn tla an lawng ttheh hmanah, ka lungawi in ka thin a nuam thotho ding. Ziangahtile Bawipa Pathian cu i runtu a si. Cungnungbik Bawipa in thazaang i pe. Zukneng bangin ka ke a fekter, tlangsang parh himte in i ret,” tiah a sim (Hab. 3:17-19). A tuahmi tinkim ah hlawhtlinnak a ngah lo hi lungawiza a si lo. Sikhalsehla a lungawinak cu Pathian ah a ret top ruangah a lungawi theinak a si. Cumi cu Bawi Jesuh in a dungthluntu pawl hnenah a zirh duhmi khal a si.

Thunetnak.

Zumtu pawlih kan lungawinak cu Bawipa thawn kan pehzom awk ringring ruangah a si. Lungawinak taktak cu Bawipai’ hnen lawngah a um a si. Kan nunnak caan tawite sungah Bawipa in in uk ih amah thawn kan pehzom ringring ahcun lungawinak a si sawn. Tirhthlah pawl khal Bawi Jesuh thu an sim ruangah Khonsil upa pawlin fungfek thawn an vuak, mualpho in an um tiah riahsiatza ngaingai a si. Sikhalsehla Bawi Jesuh hrangah ningzah mualpho tuar dingin ruah an si ruangah an lung a awi zet (Tirh. 5:40-41). Leitlun thilri le ziangkim in kan nun lungawinak taktak a pe thei lo. Leitlin thilri pawl ih pek theimi lungawinak cu hmakhatte hrang lawng a si. Sikhalsehla Bawipa hnenih lungawinak cu a famkimmi a si. Curuangah Paul in, “Bawipa thawn nan pehzom awknak ahhin nan lungawi ringring hram uh. Ka nolhsal hrih ding: nan lungawi hram uh!” tiah fiangzetin a simnak a si (Fil. 4:4). Bawipa hnen lawngah lungawi ringring cio uhsi.

Duhdawtnak le duhsaknak thawn,

Rev. CJ Hrang Hmung, Ph.D.,

Camkhat Salt Lake, Utah, USA.

December 26, 2015|Saturday|3:10 pm.