KAN COMI LAKSAWNG SUNGLAWI

Baibal Caanghril: “A sunglawinak le a tthatnak co ve dingah in kotu Khrih kan theihnak ruangih Pathian ttihzahnak thawn kan nun theinak dingah kan ttulmi hmuahhmuah cu Pathian ih cahnak huham in in pe zo.Cutiin in tiamkam ciami a tum le a sunglawimi laksawng cu in pek ih cuih laksawng ruangah in siatsuah theitu leilung tisa hiarnak ihsin nan luat thei dingih Pathian a sinak khan nan ttawm aw thei ve ding” (2 Piter 1:3-4).

Minung pawl hi kan sualnak ruangah Pathian thawn pehzom thei lomi kan rak si. Sikhalsehla Bawi Jesuh cu minung sinak lakin kan hrangah rundamnak lamzin in ongsak. A zumtu pawl cu kumkhua nunnak kan co. Cuticun Pathian ih sunglawinak le a tthatnak cu kan co ngah ve a si. Rundam fa pawl cu nitin kan nunnak ah tthanlen pitling dingah Khristian nunnak ah kekar in nung vivo kan ttul. Kan co ngahmi laksawng sunglawi hi man a neiih hmual khal a neih theinak dingah kan kilhim a ttul. Curuangah leilung tisa hiarnak sungah pilhlo ter men loin Pathian sunlawinak le a tthatnak cu nitin kan nunnak ah langter dingah kan nunnak kan aw ringring ding a thupi ngaingai.

1. Khristian Nun cak le tthanso ter ding.

Piter in caang 3 nak ih a sim duhmi cu Khristian nun cahnak dingah le qhanso ter dingah a si (2 Piter 1:3). A hmaisabik ah Pathian in kan nunnak hrangah thianghlim dingfel theinak dingah lamzin dik ah in fehpi thei a si, timi cohlang ding a ttul. Cutin kan nun theinak dingah a huham cahnak hmangin a remruat thluh zo. Curuangah “kan ttulmi hmuahhmuah cu Pathian ih cahnak huham in in pe zo” tiah a tinak a si. Cuih huham cahnak hmangin in rundam ruangah kan nun thianghlim in dingfel theinak a si. A um daan cu a hmaisa bikah nunnak, cuihsin Pathian duhnak vekin nung hi a si. Pathian ih thuthangttha cu siatralnak, mawhthluknak le sualnak ihsin luattertu Pathian ih rundamnak hriamnam a si. Cumi cun kan nunnak in thleng terih a thinlung sungah a nungter a si. Khirstian nun hi a kel ih um ringring ding a si lo. Caksin dingah le tthanso thei dingah nitin zuampi a ttul a si.

2. Pathian kan theihnak kha famkim ter ding.

“A sunglawinak le a tthatnak co ve dingah in kotu Khrih kan theihnak ruangih Pathian ttihzahnak thawn kan nun theinak dingah” Pathian kan theihnak fimnak lawngin a famkim ter thei. Pathian huham cahnak ih a hrampi cu thianhlimnak a si. Pathian kan theihnak cu kumkhua nunnak ngahnak a si (Joh. 17:3). Pathian theih timi cu thianghlim nun tthanlennak a si. Pathian kan thei deuhdeuh a sile Amah kan bang deuhdeuh ding. Kan nunnak uktu dingah amah kha hmun kan pek ding. Cuticun Pathian in in uk dingih amah kan theihnak khal a famkim ding a si.

“Pathian theihnak” Piter cakuat ih a duh san bikmi tumtahnak a si. Curuangah:

1. A thimnak hmun ihsin tleunak sungah in hruai (1 Pit. 2:9).

2. Khrih ih rethei zonzai tuarnak thawngin a hnenah in hruai (1 Pit. 1:21)

3. Thluasuah kan don theinak dingah puanzar in ong sak (1 Pit. 3:9).

4. Kumkhua in thluasuah kan co theinak dingah in hruai (1 Pit. 5:10).

5. Pathian thu sungih um dingah in hruai (2 Pit. 1:3).

3. Pathian tiamkammi a tum le a sunglawimi laksawng in pek.

“Cutin in tiamkam ciami a tum le a sunglawimi laksawng cu in pek”. Baibal sungah Pathian thukam thawng sawmthum lenglo a um. John Bunyan cun, “Nunnak lamzintluan ah a tiamkam mi tampi cu hmun tinkim ah a ret thluh ruangah pakhat lole a dang pakhat cu kan co tengteng ding” tiah a sim dah. Pathian cu a tiamkam ciami par ah kim tertu a si. A tiamcia mi pawl a pelh dah lo.

Thu tiamkam pawl hi thil mankhung phun 7 a si, tiah Piter in a tanglam thu pawl simfiangnak a nei.

(a)    Zumnak cu sui hnakin a man a khung sawn (1 Pit. 1:7).

(b)   Jesuh Khrih ih thiisen cu a man a khungzet (1 Pit. 1:19).

(c)    A nungmi Lungto Jesuh Khrih cu Pathian lamah a man a khung (1 Pit. 2:4).

(d)   Hnongmi lungto khal a man a khung (1 Pit. 2:6).

(e)    Zumtu zate hrangah a man a khung (1 Pit. 2:7).

(f)     A siat thei lomi thil mankhung a simi thinlung nemnak cu Pathian hmaiah a man a khung (1 Pit. 3:4).

(g)   A netnak ah Pathian ih thukammi tinkim cu a man a khung thluh (2 Pit. 1:4).

Thunetnak.

Pathian ih tiamkammi pawl hi a sunglawi ih a man khal a khungzetmi an si, tiah Baibal sungah a um. Cumi pawl famkim zetin Pathian in kan co ding laksawng ah in pek. Cuih a tiamkammi pawl cun zumtu pawl kha khawvel duhhiarnak ihsin luatnak a pek. Hniksaknak tuar tik khalah luatnak lamzin a sialsak cia ih nehnak khal a pek cih. Tisa hiarnak a cak caan khalah Pathian ih tiamkam cia vekin nehnak huham a pek. Siatralnak ihsin luatnak ah a thlenpi thei a si. Pathian thawn pehzomnak a nei ringringtu pawl cu a tiamkammi pawl in thleng-awknak lamzin ah a hruai. Pathian ih duhnak thawn a khat vivo theinak dingah lam a hruai. Bawipa thu lawng ruatin a umtu cu Bawipa ih nun thawn an bang aw sinsin thei ding a si (2 Kor. 3:18). Cutin kan si theinak ding hrangah Thlarau Thianghlim in dot khat hnu dot khat in thleng vivo ding a si.

Duhdawtnak le duhsaknak thawn,

Rev. CJ Hrang Hmung, DMin., PhD.,

Camkhat Salt Lake city, Utah, USA.

November 7, 2015|Saturday|10:25 pm.