HARSATNAK THU AH PATHIAN MINUNG PAWLIH HMUH DAAN

Hi leitlun minung kan zatein harsatnak a tong dah lotu zohman kan um lo. Kanmah le tawk cio harsatnak kan tong thluh. Minung kan siih sualnak thawn a tthen theitu zohman kan um lo. Ziangahtile Pathian sersiammi minung pawlin sersiam pek ihsin thokin Pathian duh lonak tuah in kan nung zo ruangah a si. Curuangah minung kan zatein sual man thihnak co ding kan si. Himi harsatnak thu thawn pehpar aw in Pathian minung pawlin ziangtin an nung cio timi thu hi a tawinak in zohin thazaang lak cio uhsi.

1. Moses ih tuar daan.

Moses hi Isreal hruaitu hmuahhmuah lakah a sunglawibik hruaitu pakhat a si. A nunnak thuhla kan zoh tikah a sentet ihsin harsatnak thawn a khat. Nom caan tampi a um ko nain a miphun Israel mipi hrangah siangpahrang Faro inn ih nomnak hmuahhmuah a tansan. Pathian ih kawhnak vekin a nung ih harsatnak tampi a tuar. A mipi Israel pawl a hruai tik khalah harsatnak tampi a tong. Sikhalsehla Hebru cangantu in hitin a ngan: “Moses cu a hung upat hnu ah Izipt siangpahrang fanu ih fapa tiih kawh a duh lonak cu a zumnak ruangah a si. Caan tawite sung sualnak sungah nunnuamih um hnakin Pathian minung pawl thawn harsatnak tuar a hril sawn. Messiah hrangih nautarnak tuar cu Izipt ram sungih lennak hmuahhmuah hnakin a man sawn tiin a ruat; ziangahtile a hmuitinmi cu hmailamih ngah dingmi tuarman laksawng a si” a ti (Heb. 11:24-26).

2. Job ih tuar daan.

Job ih nunnak kan zoh tikah Pathian lungkimnak vekin Satan ih siatsuahnak nasazet a tuar. A neihmi sumhnam le ziangkim a sungral thluh. A faate pawlkhal an thi thluh. A taksa ruangpum ah hmasia thawn besia zetin a um. Sikhalsehla cuih harsatnak a tuarmi parah Pathian a rinsan ih a cawisang. “Cutikah Job cu a tho ih riahsia in a hnipuan a thlek qheh. A sam a meetkolh qheh ih leilung ah bok tahrat in, ‘Lawngfangkheh in ka suak ih lawngfangkheh in ka thi ding. Bawipa in i pek ih a tu ah a lak sal. A hmin thangqhat si ko she’ tiah a ti. A hnenah hibangtuk thil a thleng ko nain Job cun Pathian a mawhthluk lo ih Pathian hmaiah a sual lo” (Job. 1:20-22).

3. Tirhthlah pawlih tuar daan.

Bawi Jesuh a thih hnu ah a dungthluntu tirhthlah pawl cu rundamnak thuthangqha phuang in khuaza ramkip ah an feh. Cutin an feh an phuang tikah olzet le nuamzet in an phuang thei lo. Harsatnak tampi an tong. Sikhalsehla cuih harsatnak parah an bei a dong lo, an riah a sia lo, lungawitein an tuar thei a si. “Tirhthlah pawl cu an ko ih fungfek in an vuak ih Jesuh hmin in thu sim nawn lo dingah thu an pek hnu ah an thlah. Tirhthlah pawl cu Khonsil upa pawl hnen ihsin an suah tikah Jesuh hrangah ningzah mualpho tuar dingin ruah an si ruangah an lung a awi zet. Cule nitinte in Messiah Jesuh ih thuthangqha cu Biakinn ah siseh, mi inn ah siseh cat bang loin an zirh ih an sim vivo” (Tirh. 5:40-42).

4. Stefen ih tuar daan.

Tirhthlah pawl bawntu dingih hrilmi pawl lakah Stefen khal a tel ve. Anih hi zumnak le Thlarau Thianghlim in a khatmi pa a si. Judah biaknak puithiam sang le mipi pawlin Jesuh Khrih thuthangqha a phuang ruangah an thin hengin lungto thawn an deng that. “Lungto in an den rero laifah Stefen cun Bawipa a ko ih, ‘Bawipa Jesuh, ka thlarau run la hram aw!’ tiah a au. A khuk a bilh ih, ‘Bawipa, an sualnak hi ciing ringring hram hlah aw!’ tiah napi in a au. Cutiih a au qheh vetein a hnuk a cat. Cutiih Stefen an thah cu Saul khal a lung a kim ve” (Tirh. 7:59-60).

5. Paul ih tuar daan.

Saul a si laiah Paul cu Stefen thahnak thu ah a lungkimzettu a si. Sikhalsehla Jesuh Khrih thawn an tong aw hnu ah a nunhlun a cem ih nunthar sungah a nung. Cuticun Jesuh Khrih ih thuthangqha phuangtu rinsantlak pakhat ah a cang. A nun sungah Jesuh Khrih ruangih a tuarnak pawl hi relcawk loin a tam. Sikhalsehla cuih a tuarnak le hremnak, harsatnak pawl parah a bei a dong lo. A tuarmi pawl a zoh tikah, “A tuih caanih harsatnak kan tuari hi kan hnenih a lang lai dingmi sunlawinak thawn cun qhim tlakah ka ruat hrimhrim lo” a ti (Rom 8:18).

Thunetnak.
Minung kan nunnak cu harsatnak thawn a khat. Zumtu kan nunnak ah harsat tuarnak a tam sinsin. Biaknak thu ah nautat kan tuar. Soiselnak, hnonnak le harsatnak a phunphun kan ton tiah nitin thuthang pawl kan zoh tikah kan hmu thei. Sikhalsehla a tlunih kan tarlangmi khuahlan zumtu diktak pawl cu a tuar daan an thiam ih Pathian sunlawinak an langter. Moses, Job, Tirhthlah pawl, Stefen le Paul lawng si loin zumtu mi tampi cu tuarnak a phunphun, tuar daan a phunphun karlakah nitin kan tlangleng. Sikhalsehla Pathian ih lungkimnak in kan tuar a si tiah theiin Bawipa hrangah tuar thiamtu kan si cio ding hi a thupi ngaingai a si.

Duhdawtnak le duhsaknak thawn,

Rev. CJ Hrang Hmung, Ph.D., DMin.,

Camkhat Midland, Texas, USA

October 25, 2015|Sunday|2:56am.