Caanghril:
“Amah sungah
nan hram cu thuuk zetin bun uhla nan nunnak cu amah parah inn bangin sak uh;
zirh zomi nan si vekin nan zumnak ahcun cak sinsin uh; cule lungawinak in khat
uh” (Kolose 2:7).
Baibal siarbet
ding: Kolose 2:5-7.
Zumtu mi piang thar
kan nunnak hi nikhat hnu nikhat zawnruah awknak, seherh awknak pawl a kiam
deuhdeuh. A lenglam a phaw lawngin piangthar dinhmun ah kan um. Kan thinlung
sung muril cu a lawng bembem. Cumi cu tthaten kan zohfel awk sal a ttul a si.
Paul in zumtu mi piang thar pawl parih a thinlung umtu daan pawl kan zoh tikah
anmah thawn hmunkhat ah um lo hman sehla serherhnak a nei ringring. Duhdawtnak
a reh thei lo. Zawnruahnak thawn a khat thei ringring. A zumnak kha Jesuh Khrih
ah hram thuk zetin a bun-aw ruangah a si. Cumi thu ruat salin kanmah le kanmah
zohfelnak nei in zirnak nei cio ding hi a thupi ngaingai.
1. Seherhawknak.
Kolose 2:5-7 ah
Paul in zumtu pawl pariah serherhnak a tthanso mi thu a sim. Khristian pawl hi
kan ruangpum cun hmundang dangah kan um nain kan thlarau cu hmunkhat si thei
ringring a ttul. Khrih sungih rinsannak kan neihmi cu hmunkhatah hnget zetih
umkhawm thei ringring ding hi a thupi. Paul ih ruangpum cu hmundang ah um ko. Sihmansehla
a thinlung le a thlarau cu Kolose zumtu pawl hnenah a um ringring, a caam
ringring. Minung hi kan duhdawtmi pawl thawn kan tthen awk tikah kan thinlung
cu an hnenah a caam ringring vekin Paul thinlung sungah a duhdawtmi kawhhran
thawn thlarau in a umpi ringring. Jesuh Khrih an zumnak ah pumkhat an si ruangah
thinlung hmunkhat ah a rettu cu Khrih ih thlarau a si (Rom 8:9). Cutikah
thinlung hmunkhat ah umtu pawl cu kan lung a awi thei ding. Khristian ah cang
zo hnu cun daitein um men a theih nawn lo. Bawipa Jesuh ah kan hram cu thukzet in
bun ding a thupi. Cuitlun ah kan nunnak cu Jesuh Khrih parah inn bangin hram
thukzet ah bun in sak dingmi kan si. Cumi cu nitin kan Khristian nun ah nunpi
ding a ttulmi a si. Efesa Kawhhran hnenah Paul in hi thu thawn a bang awmi hitiin
a sim; “Pathian in kan ttuan ding hrangih a rak timtuah ciami hnattuan ttha ttuantu
dingah Khrih Jesuh sungin kannih cu siamtharmi kan si,” a ti (Efe. 2:10).
2. Lungawiternak.
Jesuh Khrih in
in duhdawt ih a nunnak kan hrangah Pathian lungawi tertu rimhmui peknak le
raithawinak ah a pek awk vekin kan nunnak khal hi duhdawtnak in in uk ding a
thupi. Hlan ahcun kannih pawl hi khawthim sungah kan rak nung. Asinain Bawipai’
minung kan si zo ruangah atu cu tleunak sungah kan um. Curuangah tleunak ih
minung bangin nung dingmi kan si (Efe. 5:8). “Curuangah nan nun daan ahhin
ralring uh. Miaa bangin nung hlah uh; a fimmi bangin nung uh,” tiah Paul in
ralrinnak a pek (Efe. 5:15).
Zirhnak
dik lotu pawl cun a phunphun in an leem, an bum hngai. Ttongkam mawizet an
hmangih mi thinlung lut zet dingin an sim thiam. Asinain Kolose zumtu pawlcu
zumfeknak thawn hnget zetih an ding thei ruangah Paul cu a lungawi ngaingai. “Hnget
zetin nan dintlang” timi zawnah hin ralkap dinhmun in a simmi a si. Ralkap timi
cu ttuanvo an pekmi pawl kha fel tein a ttuan ih a tlunlam bawi pawlih fialnak
vekin daithlang loin an ttuan. Cuvekin mibumtu le leemnak tampi an tong ko nain
hnget zetin Jesuh Khrih zumnak ah an ding thei. Curuangah Paul in lungawi thu a
sim hngai a si. Kolose Kawhhran hrangah a thupi bikmi cu zumnak cak sinsin neiin
lungawinak nun neih ringring ding hi a si (Kol. 2:7). Cuticun
Thlarau thawn nitin tthanlennak kan nei thei dingih Satan le zirhnak dik lo
pawl in siatsuahnak a tuah thei hrimhrim lo ding a si. Pathian rinsan in a
tuahtu hrangah Pathian ih ti thei lo zianghman a um lo (Luk. 1:37).
3. Khrih thawn pehzomnak
“Khrih
Jesuh cu kan Bawipa a si tiih nan pom ngah zo ruangah” a timi hi zumnak lam
thawn pehpar in simmi thu a si. Kolose 1:15-20 sungah Jesuh Khrih cu
ziangzongza hnakin a thupi vekin Kolose khuami pawl in an Bawipa an an cohlang
zo ruangah Khrih thawn pehzom in an nung thlang. Jesuh Khrih cu Bawipa tiah an
ko mi ttongfang hi Thukam Hlun san ihsin an rak hman rero zomi ttongfang a si.
“Jehovah” Pathian timi cu Hebru ttong in “Bawipa” an rak ti vekin Jesuh Khrih
kha Bawipa a si ve. Paul ih sim duhmi cu Jesuh Khrih kha Bawipa le rundamtu ah
nan co zo ruangah amah thawn pehzom in nun ding a ttul timi hi a si. Khrih
thawn an tthen awk ahcun an zumnak khal a pial thei. Kolose khua ih a simmi
thuthangttha cu Jesuh Khrih kha a si. Zirhsualtu pawlih buainak an suahpimi
khal cu Jesuh Khrih thu ahhin a si. “Amah thawn pehzom aw in nung uh” a timi cu
Jesuh Khrih cu an Bawipa le rundamtu ah an pom zo hnu ahcun Khrih thawn pehzom
in nung ringring ding a ttul, tiah sim duhmi a si. Jesuh Khrih a zumih rundamtu
ih a pomtu pawl lawngin Jesuh Khrih dung ah an thlun thei ding (Ko. 3:1; Efe.
4-5). Khrih thawn pehzomnak a neitu pawl cu nun thar ah an nung ih cahnak thawn
an khat thei. Jesuh Khrih cu an nuannak laifang ah a ret theitu pawl in Khrih
Jesuh ih dung ah tthatein an thlun. Dungthlun timi cu kan thlunmi pa zum le
rinsan hi a si. Khrih thawn pehzom in a nungtu pawl cu Kolose khuami lawng si
loin zumtu hmuahhmuah hi khuivek hmun kan thleng khalle Jesuh Khrih dungthluntu
kan sinak kha kan ziaza, kan nun daan in langter dingmi kan si.
4. Hram thukzet bunnak
Paul
in Kolose khuami zumnak thu a fiangter tikah thuqhimnak pawl a hmang hngai.
Pakhatnak
cu thingkung hmangin thutthimnak a pek. Thingkung kan cin tikah leilung ttha
sungah hram thukzet a bun ahcun ruah le thlisia a ra khal le a tlu mai lo.
Leilung ttha a simi Khrih ah hram thukzet kan bun a ttul. Cuticun zirhnak dik
lo in ziangtik khalah in bum thei lo dingih hnget zetin kan ding thei ringring
ding (Mat. 13:5, 20-21).
Pahnihnak
ah inn saknak in tahtthimnak a pek hngai. Jesuh Khrih parah sakmi inn cu lungto
parih sakmi inn vek a si. Lungto parah sakmi inn cu thlisia tilet a rat tikah a
hram a fekzet ruangah a tlu men lo. Sikhalsehla vunnel parah inn a saktu cu thlisia
le tilet a rat tikah a siat thluh. Jesuh Khrih parah zumnak inn sak ding kha a
sim duhmi a si. “Zirh zomi nan si vekin” a timi cu Kolose khuami Epafras in a
rak zirhmi Jeuh Khrih zumnak ah fek tein nan ding pei ih zumnak inn nan sak
pei. Thlisia le tilet a simi zirhnak dik lo dangdang a rat tik khalah ziangtik
khalah nan tluk thei lo dingih nan fek thei ding, a ti duhmi a si.
Thunetnak.
Lungawinak
thu hi Kolose cakuat bung pali sungah vei 7 lai kan hmu thei (Kol. 1:3, 12;
2:7; 3:15-17; 4:2). Zumtu hrangah lungawi thusim hi a thupi zetmi a si. Lungawi
menmen a ngah lo ih cuih lungawinak neihmi kha Pathian hnenah phuan ding a
thupi. Pumpak lungawinak lawng si loin Kawhhran khalin lungawi thu sim ding a ttul.
Paul cu thawng sungah a um ko nain Jesuh Khrih duhdawtnak a ruah tikah a lung a
awi tuk. Curuangah thir cikcin thawn a um cingin lungawi thu a sim ringring.
Thla a cam tikah Pathian hnen lungawi thu a sim thei ringring. Thingkung vekin
hram thukpi in bun uh. A fekmi inn vekin hnget tein ding uh. Bawipa in kan
hnenah in umpi timi kha theifiang uhla zianghman in a hnin thei lomi zumnak nei
cio uh. Cubangtuk dinhmun nan thlen ahcun Bawipa hnenah lungawinak sim ding a
cem thei dah lo ding, a ti thei. Zumtu nunnak ah hram thukzet bun ding hi
ziangtik lai khalah a thupi zetmi a si. Kolose kawhhran khal zirhnak dik lo
dangdang ruangah zumnak dik ihsin an pial sual lonak ding hrangah zumnak hram
thukpi ah bunin fek tein an ding theinak dingah Paul in thazaang a pek hngai.
Cun ziangvek dinhmun kan thleng khalle Pathian hnenah lungawi thu a sim theitu
zumtu kan si cio ding a thupi ngaingai.
Zumtu mi
piangthar pawl kanmah le kanmah kan sut aw hnik pei? “Kan hram bunmi a thukzet
maw? Zohnen ah hram kan bun???”
Duhdawtnak le duhsaknak
thawn,
Rev. CJ Hrang Hmung, PhD., DMin.,
Camkhat Laurel, MD, USA.
September 20, 2015|Sunday|00:10 am.
No comments:
Post a Comment