PATHIAN BIAKTU INNSUNGSANG

Baibal Caanghril: “Bawipa a ttihzahtu pawl le A thupekmi vekih a nungtu cu mi lungawi an si. Na ttuan man theitlai khopkham in na ei ngah ding; Mi lungawi le mi neinung na si ding” (Saam 128:1-2).

           

Tuini ah innsang tampi in hlawhtlinnak kan ngah theinak dingah a phunphun in kan zuam cio. Innsang ih a umtu zate in hna a phunphun ttuanin sumsaw ngah theinak dingah kan tawlrel. Nuntu khawsaknak remcang in, hnattuan dinhmun (rank) sangzet nei in, sumsaw thilri tampi neiih faate pawl fimthiamnak sangzet an nei ruangah a hlawhtlingmi innsang an si thluh cuang lo men ding. A hlawhtlingmi innsang, Pathian a ttihzahmi innsang cu thluasuah a phunphun an co a si tiah Saam 128 sungah fiangtein a simmi kan hmu thei.

           

Innsang sungtel pawlin Pathian thu qhate’n ngai in Pathian thu thlun in kan um ahcun kan umnak khuapi, khuate, inn le ram ah thluasuahnak a um ding a si (Daan. 28:1-14).Pathian a qihzahtu innsang ih tuah ding a thupibikmi cu Pathian biakkhawmnak hi a si. Innsang khawmnak, Baibal siarnak, thlacamnak pawl hi innsang tin in nitin neih dingmi kan tirawl qhabik a si.

           

Innsang thlacamkhawm neih ruangah ziangmi hlawknak kan ngah thei pei? tiah thusuhnak a um qheu. Hlawknak kan ngah theimi tampi a um tiah innsang thlacamkhawm a nei ringringtu pawlin an tep cio mi par ihsin an sim ttheu. Bawipa a ttihzahtu pawl le A thupekmi vekih a nungtu cu mi lungawi an si. Cumi pawl cun an innsang ah thlacamkhawmnak an nei ringring.

           

Innsang thlacamkhawm neih ruangah kan co ngahmi pawl cu a tanglam vekin an si.

1. Thlarau thazaang in ngah ter thei.

            Innsang sungtel pawlih kan tonmi harsatnak pawl tuar theinak dingah Pathian hnen ihsin a cakmi thazang kan ttul a si. Kanmah le pumpak cio kan tonmi harsatnak cu hlawm aw in thinlung takin thla kan cam tlang. Cuticun nitin thazaang thar kan ngah thei. Cuih thazang cu innsang thlacamkhawm ihsin kan ngah theimi a si.

2. Remdaihnak laksawng kan co ngah thei.

            Nupi, pasal, faate hrangih thinharnak, riahsiatnak, tawlrel ding a harsami buainak pawl hmuahhmuah cu innsang thlacamkhawm tikah Pathian hnenah ap ding a ttul. Thinlung thuktthunnak nei loin zumfeknak thawn thla kan cam tlang ding a ttul. Cutikah thinphang beidong ding hnakin remdaih hnangamnak kan ngah thei ding a si.

3. Innsungsang ah lungrualnak a um ter.

            Joshua in “Kei le ka innsang cun Bawipa kan biak ding a si,” (Josh. 24:15) a timi kan zoh tikah Joshua tei’ innsang ah lungrualnak a umzia kan hmu thei a si. Lungrualte’n Pathian an biakkhawm thei.

4. Faate pawl Pathian thu kan zirh thei a si.

      Tirhthlah pawl in zumtu hmaisa pawl cu nitinte’n biakinn ah siseh, inn ah siseh thuzirhnak thawn caan an hmang tiah Tirhthlah 6:42 sungah kan hmu thei. Kan faate pawl biakinn ah zarh khat vei khat Sunday school kai in Pathian thu an zirmi lawng hi a famkim lo. Curuangah nu le pa pawlin inn lam ihsin nitinte’n Pathian thu an zirh thei ringring ding hi a thupi ngaingai a si.

5. Innsang khawmnak hmante’n kan tuah ruangah faate pawlin Pathian an duhdawt dingih an rinsan thiam ding.

            Faate pawlin Pathian cu an thinlung zate’n an duhdawt theinak dingah zirh ding a ttul, tiah Moses in Israel mi pawl hnenah a cah hngai (Daan. 6:4-7). Israel mi pawl khalin Pathian thupek vekin an thlun ih an faate pawl Pathian ttihzah duhdawt ih an rinsan theinak dingah napi’n an zirh hngai.

6. Innsang sungtel pawlin Khristian nun daan upat hna an thiam ding.

            Israel mi pawl in biakkhawm caan ah “Bawipa na Pathian cu…na thinlung zate’n na duhdawt pei” timi Baibal caang cu an cal ah tteem in, inn sangka parah cuih Baibal caang retnak bungte kha tongtham phah ih biakkhawmnak ah upat hna thiam dingah an zir (Daan. 6:8-9).

            Zumtu kan innsang khalah biakkhawmnak caan tuah in, thlacamnak khaante nei in, faate pawl kha biakkhawm daan kan zirh a ttul. Faate pawl tlawngkai ding an feh hlanah le tlawng ihsin an tlun tikah siseh, camipuai an tuah ding caan ah siseh thlacam saknak nei in Pathian biak daan tthate’n an nei theinak dingah kan zirh ringring a ttul.

7. Nitin Baibal siar kan zongsang thei ding.

            Tirhthlah 17:11 sungah, Berea khuami pawl cu nitin Baibal siarnak an nei thei ringring, tiah kan hmu thei. Cuvekin zumtu innsang sungtel pawl khal nitin Baibal siarnak nei thei ringring dingah forhfial awk ding kan ttul. Sungtel pakhat ciar in kan siarmi pawl hlawm aw in thazaang pek aw vivo dingah forhfial awk ding a ttul. Baibal cu Pathian ttongkam a siih Pathian ih thawkhummi a si ruangah cabu dang hnakin thupi sawn ah retin siar ringring ding kan ttul a si. Baibal kan siar ringring tikah kan zongsang vivo ding. Baibal siar ih a thawtnak khal kan tep ngah vivo ding. Nun in sim duhmi pawl khal kan theifiang sinsin ding.

8. Pakhat le pakhat upat awknak, tangdornak le lungawi-awton hna kan thiam thei ding.

            Innsang khawmnak ah nupi, pasal, faate hrangah thlaza camsak awk ding hi a thupi zet. Faate pawl khalin nu le pa tha in pek tiah Pathian hnenah lungawi thusimnak nei in, an ttawnttaihnak le an tisualmi parah Pathian hnenah ngaithiamnak dil dingah zirh awk thiam ding a ttul ngaingai.

9. Innsang ah Pathian thupibik ah ret thiam in rundamnak huham cahnak kan co ngah thei ding.

            Innsang sungah lungawi caan ah siseh, riahsiat ninghan caan ah siseh, nitin Pathian hmaiah khukbil in thlacamnak caan kan nei thei ringring ahcun Pathian ih kutcak le huham cahnak cu kan co tengteng ding a si.

Thunetnak.

            Zumtu pawl, tuini ah kanmah le kan innsang ih Pathian biakkhawmnak kan neihmi pawl zohfel sal uhsi. Pathian ih tthatnak in kanmahte ciar in tep cio uhsi (Saam 34). Midang ih simmi men si hlah seh. Innsang sungtel pawl hmunkhat ah Pathian thawn pawlkomnak nei cio uhsi. Pathian hnen ihsin remdaihnak le thin hnangamnak famkim kan co tengteng ding a si. “Bawipa a ttihzahtu pawl le A thupekmi vekih a nungtu cu mi lungawi an si. Na ttuan man theitlai khopkham in na ei ngah ding; Mi lungawi le mi neinung na si ding” (Saam 128:1-2).

Duhdawtnak le duhsaknak thawn,

Rev. CJ Hrang Hmung, PhD., DMin.,

Camkhat Salt Lake, Utah, USA.

October 10, 2015|Saturday|6:33 pm.