DEH DING HAWLTU SATAN CU KAN NEH ZO

Caanghril: “Fimvarte in um uh! Ralringte in um uh! Nan ral Satan cu deh ding hawl ah a huuk reromi kiosa bangin a tawi a vak zok rero a si. Nan zumnak ah hngetkhoh uhla Satan cu do uh, ziangahtile leilung tlun khuazakipih a ummi Khristian unau pawl khal hi bangtuk in harsatnak hi an tuar rero ve a si ti kha nan thei” (1 Piter 5:8-9).

Minung pawl nitin kan nunnak ah do ding tampi kan nei. A hleice in zumtu pawl in ral do ding a phunphun kan nei. Zumtu pawlih ral cu khawvelmi zum lotu pawl lawng si loin Satan ih ral khal ttihnungza in an tuar thotho. Mi hrekkhat cun Satan ih donak an thei man lo. Kan thei lo dingin Satan cun a phunphun in in bum, in thlem ih in siatsuat. Ziangruangah innsang ah harsatnak, nom lonak tampi a suak ti khal kan ruah ban ttheu lo. Curuangah ralringtein um kan ttul. Satan kha fimvar zet in do kan ttul a si.  Nehtu Bawi Jesuh ruangah ziangkim parah nehtu kan si timi hi hngilh cio hlah uhsi.

1. Ralring in um ding

Satan in Pathian a hua ruangah Pathian ih duhmi minung pawl khal a hua zet. Curuangah siatsuah dingin a phunphun in a timtuah ih a  tawlrel. Hnaihnok thei dingin a phunphun in thu a ruat. Curuangah zumtu pawlin ralring zetin um ringring ding kan ttul. Ziang tinkim ah timtuah in um ringring ding kan ttul. Bawi Jesuh in, “Cutiin a ni le a caan nan theih lo ruangah ralringte in hngak uh” a ti (Mat. 25:13). Nitin kan nunnak ah ti luala ih um men ding kan si lo. Ziang ruat lem loin kan um ahcun Satan duhnak thang sungah kan awk/tlak pang thei. Satan ih thlemnak dungah olte’n kan tla pang thei. Cuticun Satan in kan thinlung a luahsuak pang ahcun a duhduh in in fehpi thlang ding. Duhhiarnak a phunphun, thlemnak a phunphun thawn in lem ding. A netnak ah kan thlarau lam nun tiang a siatsuah thei ding a si.  

           

2. Fimvarte in um ding.

Piter cun nitin kan nunnak ah fimvarte in um dingah in forh. Paul khalin, “Curuangah midang pawl bangin itthat ding kan si lo; itthat loin fimhring tein a nung dingmi kan si. Minung cu zanah an itthat; zanah zu an ri. Sikhalsehla kannih cu sunih mi kan siih fimvar zetih a um ding kan si” a ti (1 Thes. 5:6-8). Daithlang ih um lo ding hi a thupi. Aa zet ih um ding khal kan si lo. Ziang kan tuahmi kipah ralringzet in, thuhla um daan zoh thiam phah in kan um a ttul (Mat. 26:41; Luk. 12:37; Thup. 16:15).

           

3. Satan cun Pathian a dodal.

Satan cu Pathian ih ral a si ruangah kannih zumtu pawl ih ral khal a si. Satan cu deh ding hawl ah a huuk dumdo mi kiosa vekin a tawivak rero, tiah ralrinnak in pek. A thlennak kip ih ummi zumtu pawl siatsuah ding lawng hi a ruat. A bum thei mi pawl cu Pathian dodal ve dingah a sawm tengteng ding. Zumtu pawl cu Pathian thawn hlat theinak dingah a phunphun in a zuam rero. Tleunak sungin thimnak sungah kirter a duh ngaingai.  Curuangah fimkhur in ralringzet kan ttul a si.

           

Satan cu kiosa vek a si ruangah zumnak thazang a malmi cu a deh tengteng ding. Zum lotu pawlih pa hi Satan a si, tiah Khrih in ralrinnak in pek cia a si (Joh. 8:44). Satan ih mi thlem daan phun (4) a um. Cupawl cu:

(i) Tisa duhhiarnak (Joh. 2:15-16);

(ii) Mi nunnak that (Mat. 13:19; 1 Pit. 5:8; Job. 1:9-11);

(iii) Thudik eelnak (Joh. 8:44; 1 Joh. 3:8);

(iv) Thuphan per le mi bum (2 Kor. 4:3-4; 11:13-15), tla an si.

4. Satan cu kan do ding.

A sile zumtu pawl ih kan tuah dingmi ttuanvo cu ziang a si? Kan ralpa Satan kha kan do ding a si. Himi kan ral Satan do dingah thu ah ttuanvo (2) kan nei.

      (i) Satan caan kan pek lo ding. Curuangah kan do ding. Zumnak thazaang kan cak tikah ziang tinkim ah Pathian duhzawng in kan nung thei. Satan ih mi bum daan kan thei ngah thei. Cutikah fimkhur zet le ralring zet in do neh ding kan ttul. Satan ih bumnak sungah kan tla pang ahcun kan cem tamai ding a si.

(ii) Leitlun khuaza ramkip ih a ummi zumtu pawl hmuahhmuah Satan ih hniksaknak an tuar thluh. Nangmah lawngin na tuar lo. Curuangah zumtu zate in Khrih ah kan hngat awk ahcun Satan cu nehcia a si. Ziangahtile Bawi Jesuh in Satan ih huham cahnak le thuneihnak a neh thluh zo.

Thunetnak

Curuangah zumtu nitin kan nunnak ah ralring tein kan um ding. Fimvar in kan nung ding. Kan ralpa Satan cu kan do ding. Kan ralpa Satan kha tikcu caan ttha kan pe lo ding (Efe. 4:26-27). Deh ding a hawltu Satan cu Bawi Jesuh in a neh cia mi a si. Pathian duhnak thlun in Satan kha kan do ding. Jeim cun, “Curuangah Pathian duhnak a thluntu si uh. Satan kha do uhla a tlan mai ding” a ti (Jeim 4:7).

Duhdawtnak le duhsaknak thawn,

Rev. CJ Hrang Hmung, PhD., DMin.,

Camkhat Salt Lake, Utah, USA.

October 17, 2015|Saturday|11:33 pm.