PATHIAN IH TONGKAM

Baibal caanghril: “Pathian ih ttongkam pohpoh cu a dik a si; Amah cu humhimnak a hawltu hrangah ralphaw a si” (Thufim 30:5).

Pathian ttongkam kan ti tikah a tlangpi thu in Pathian ih thu kha sim duhmi a si. Pathian thu hi thusimtu pawlih sim le zirhnak in siseh, midang rualpi pawl hnen siseh thei theih a si vekin kanmah rori Baibal ca kan siarnak ihsin khal kan thei thei a si. Cuih Pathian ttongkam cu ziangtin kan rinsan thei ding? ziangmi tthathnemnak in pek thei? ziang in tuahsak thei? timi thu pawl thawn thazaang kan lak cio hrih pei.

1. Pathian ttongkam cu ziangtin kan rinsan thei pei?

Thufim ngantu cun, “Pathian ih ttongkam pohpoh cu a dik a si; Amah cu humhimnak a hawltu hrangah ralphaw a si” (Thufim 30:5) tiah fiangzet in a sim. A thil tuahmi hmuahhmuah cu Rintlak an siih an ding ttheh. A thukham pawl cu rintlak an si. Kumkhua in a hngetmi an siih felzet le dingzetih pekmi an si, tiah Saam cangantu khalin fiangzet in a sim ve (Saam 111:7-8). Pathian ih thu cu a rinsantu hrangah hmual a nei zet. Nun tharnak in petu khal a si. Piter cun, “A nungmi le kumkhua a hmunmi Pathian ih ttongkam thawngin hrintharmi nan si zo... Bawipa ih thu cu kumkhua in a hmun. Nan hnenih phuanmi thuthangttha cu hi thu hi a si” a ti (1 Pit. 1:23-25).

2. Pathian ttongkam in ziangmi tthathnemnak in pek?

Pathian thu, ttongkam a cohlang ih A thu vekin a nungtu hrangah sunralnak a um lo. Kumkhua nunnak in co ter sawn. Rundammi kan sinak in fiangter. Misual si cingin dingnak a cotu kan sinak in theifiangter. Curuangah Paul in Timote hnen ah, “Cuih Ca Thianghlim cu Khrih Jesuh na zumnak sungin rundamnak ah a lo thlentu, fimnak a lo petu a si. Ca Thianghlim hmuahhmuah hi Pathian ih thawkhummi a siih thutak zirhnak, zirhsual simhrinnak, a sualmi remsalnak ah le dingteih nitin nunnak ih zirhawknak ah a ttha” a ti (2 Tim. 3:15-17).

3. Pathian ttongkam in ziang in tuahsak thei pei?

Saam cangantu cun, “Na thu cu ka ke hrangah mei inn a siih ka lamzin hrangah tleunak a si” a ti (Saam 119:105). Johan khalin, “Nannih tla cu thu ka lo zirhmi thawngin nan thiang zo” a ti (Joh. 15:3). Profet Jeremiah in, “Maw Cungnungbik Bawipa Pathian, na hmin ih kawhmi ka si; na minung ka siih na ttongkam in ka thinlung cu lungawinak le thinnomnak in a khahter” tiah a nunnak ah Pathian ttongkam ruangih a comi thuhla a sim (Jere.15:16). “Na daan a duhtu pawl cu Humhimnak famkim an ngah. Zianghman in a bahter thei hai lo a si” (Saam 119:165). “Cuticun i nautattu pawl cu an thu ka sawn thei hai ding; Ziangahtile na ttongkam cu ka rinsan a si” (Saam 119:42), tiah Saam cangantu in Pathian ih ttongkam in a tuahsakmi pawl a simfiang hngai.

Thunetnak
Pathian ih ttongkam a si lole Pathian ih thu hi a zumih a cohlangtu hrangah a lak a si hrimhrim lo. Huham cahnak thawn a khatmi a siih zumtu ih nunnak a danglam ter thluh thei. Hebru cangantu cun, “Pathian ih thu cu a nungih a cak fawn. Kap hnih hriam ralnam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlang thei a si. Milai thinlung ih duhnak le ruahnak tla a thei thluh a si” a ti (Heb. 4:12).

Duhdawtnak le duhsaknak thawn,

CJ Hrang Hmung, Ph.D.,

Camkhat Salt Lake City, UT, USA.

October 3, 2015|Saturday|6:10 pm.