“PATHIAN KAN LAMIH A TTAN CUN…”

(Kum thar hrang thazaang laknak – 2016) “PATHIAN KAN LAMIH A TTAN CUN…”

“Pathian kan lamih a ttan ahcun zoso in dodal thei ding?” (Rom 8:31).

Leitlun thil le ziangkim thawn thazaang peknak ngah ding na hawl ahcun na hmu dah hrimhrim lo ding. Bawi Jesuh in, “Leilung ihta si uh cila leilung in ka ta tiah a lo duhzet hai ding. Sikhalsehla leilung ihsin ka lo hril zo ih a ta nan si nawn lo. Curuangah leilung in a lo huatnak cu a si,” a ti (Joh. 15:19). Bawi Jesuh ih simcia zo bangin kan tong dingmi cu kanmah in dodaltu pawl lawng an si. Sikhalsehla kan theih ding a ttulmi cu cumi pawl hnakin kan Pathian cu a tum sawn a si. Curuangah cupawl in in dodal khal le Jesuh Khrih thawngin kan hrangah zianghman a poinak a um lo.

Paul ih nunnak kan zoh tikah hmun tinkim ihsin dodalnak a tong ti a fiang zet. A fehnak khua le ram a luhnak hmun tinkim ah Judah siseh, Zentail siseh, zumtu dang pawl in siseh Paul kha an dodal ttheu. Sikhalsehla Paul cun Pathian ah hnget zetin a um thotho. Ziangvek thuhla a tong khalle amah a kotu Jesuh Khrih ih fialmi hnattuan kan ttuan tiah a theifiang aw. A hnenah Pathian a um ringring ti a theifiang ruangah ruah ban lonak hmun ihsin ziangvek hremnak le harnak a tong khalle hnget zetin a ding thei.

Johan khalin Pathian ih umpinak le kilkhawinak thu thawn pehpar aw in, “Ka faale tla, nannih cu Pathian faate nan si; profet dik lo pawl tla nan neh zo, ziangahtile nan sungih a ummi Thlarau cu khawvel mi pawl sungih thlarau hnakin a cak sawn,” a ti (1 Joh. 4:4). Pathian kan rinhnget taktak ahcun ziangvek harsatnak le dodalnak kan tong khal le kan hnget thei ringring ding. Ziangahtile amah a rinsantu pawl cu Pathian in a kilveng ringring timi cu a fiangzet ruangah a si. Kan nehnak cu hi khawvel in in cohlang le cohlang lo timi parah a um lo. Kan nehnak cu Pathian ih duhnak le a thil titheinak par liolio lawngah a um a si.

Isaiah 55:11 sungah Bawipa in, “Ka kaa sungih a suakmi ttongkam cu cubangtuk a si ding. Zianghman tuahsuak loin ka hnenah a kir lo ding. Tuah dingih ka tummi hmuahhmuah cu a tuah ttheh ding,” a ti. Pathian ih in fialmi cu a thu nung le a ttongkam pawl phuan ding hi a si. Cumi cu kan phuan tengteng dingmi a si. Asinain hlawhtlinnak timi cu Pathian ih remruatnak parah a um. Pathian in a tumtahmi pawl cu a famkim ter tengteng ding timi kan theifiang a ttul. Kan hrangah hnemnak in pekmi cu hihi a si: Pathian kan lamih a ttan cun zoso in dodal thei ding?

Paul ih nun kan zoh tikah a zir ringringtu a si. Cathiam sang pakhat a siih ttong thiamzet a si fawn. Sikhalsehla Paul in, “Ka u le ka nau tla, nan hnenah ra in Pathian thuthup ka phuan tikah ttongkhun le minung fimnak ka hmang lo,” a ti (1 Kor. 2:1). Paul in a simmi thuthangttha pawl hmual a neihmi hi amai’ ttong thiam ruangah a si tiah a ruat hrimrhim lo. Himi thuthawn a sim betmi cu, “Thungai ti ahcun Apollos cu zoso a si? Paul cu zoso a si? Kannih cu zumtu nan sinak dingah Pathian riantu lawng kan si. Bawipa ih ttuanvo in pekmi kha kan ttuan fingfing a si. Kei in a ci ka tuh ih Apollos in ti a toih, asinain a tthantertu cu Pathian a si,” a ti (1 Kor. 3:5-6). 

Sualnak sungih a hlo cuahco mi pawl hnenih thuthangttha kan phuan tikah kan phurrit pawl a zaang ter ngaingai a si. Rundam an ngah ding cu kanmai’ cahnak in a si lo. Pathian cun phuang ding lawng in fial a si. A dang hmuahhmuah cu Pathian ih ttuanvo a si.

Pathian fa le pawl, Pathian in thazaang in pekmi cu lak cio uhsi. Hlawknak ngah dingah Pathian in in ko. Thlarau tampi runsuak dingah in ko. Jesuh Khrih lawng hi rundamtu umsun a si timi khihhmuhtu dingah in ko a si. Tthanso tertu cu Pathian a siih a kut sungah a um. A si, “Pathian kan lamih a ttan ahcun zoso in dodal thei ding?” Ziangahtile Immanuel Pathian kan nei a si. San a cem hlan tiang kan hnenah a um ringring ding.

Duhdawtnak le duhsaknak thawn,

Rev. Dr. CJ Hrang Hmung, PhD.,
Camkhat Salt Lake city, Utah, USA.
December 31, 2015 (Thursday).