LEI IH THIL TITHEINAK

SERMON No (7), February 14, 2016

LEI IH THIL TITHEINAK

“Na ṭongkam in na nunnak a himter thei vekin siatnak khalah a siatter thei. Curuangah na ṭongkam ruangih a ra thlengmi thil pawl cu na tuar thei a ṭul” (Thufim 18:21).

Minung kaa sungih a ummi lei hi a fate zet nain thuhla tumpi a suahpi thei. Mi a porh thei ih mi a siatsuah thei. Mi a khaisang thei ih mi a namthlak thei. Kan pipu mifim pawlin, “Ṭongkam khat Siapi man” tiah an ti. Kan ṭongmi ṭongkam hi ralring kan thiam lo ahcun minung thinhennak a suah ter thei ih siapi kuan ṭul tiang in thlenpi thei. Curuangah kan lei hi fimkhurzetin kan hman thiam ding a thupi ngaingai. “Lei” ih sinak dinhmun zohin thazaang kan lak dingmi pawl zoh hrih uhsi.

1. Minung ih lei timi cu.

Vei tampi ah kan lei hi kan hmang sual ṭheu ruangah midang siatsuahnak a petu ah a cang ṭheu. Curuangah Jeim in, “Kaa sungih lei cu a hrem theitu ngaingai zohman an um lo. Lei cu a ṭha lomi a siih uk theih lomi a si; mi that thei tur a nei. Kan lei cu kan Bawipa le kan Pa Pathian thangṭhatnak ah kan hmang ih cule amah ih hmuihmel cuangih a tuahmi kan milaipi pawl camriamnak ah kan hmang lala. Thangṭhatnak ṭongkam le camriamnak ṭongkam cu kan kaa pakhat sung ihsin a suak. Ka u le ka nau tla, hi bangtuk in si ding a si lo,” a ti (Jeim 3:8-10). Saam cangantu khalin, “Nang cun midang siatsuah ding na ngaihtuah. Na lei cu lumehnak namte vekin a hriam. Cat loin thuphan na per ringring. A ṭhami hnakin a siammi na duh sawn ih, thudik hnakin thudik lo na tlaihsan sawn a si. Maw thuphanper pa, na ṭongkam in midang thinlung natter khi nuam na ti zet,” a ti (Saam 52:2-4). Kan lei hi kan kilkhawi thiam a ṭul ngaingai.

2. Kan Lei kan ralrin ding.

Kan lei hi thilṭha a suahpi dah lo ruangah ralrinpeknak pawl khal kan hmu thei. Kan lei kan ralring lo ruangah Baibal in hmang thiam dingah zirhnak a phunphun a nei. Thufim ngantu in, “Tam deuh na ṭong le tam deuh na sual ding. Mifim na si ahcun na ṭong suup aw” (Thuf. 10:19). “Mifim pawlih lei in fimnak a karh ter, mi aa pawlih kaa in aatnak a suahter… Zaangfahnak ṭongkam in thinlung a nungter sal. Asinain zaangfahnak um lo ṭongkam cun thinlung a kuaiter,” (Thuf. 5:2,4). Jeim khalin hitin ralrin dingah a sim ve: “Biaknak lam ah ka taima a si a titu nan um maw? Nan hmurka nan uk thei lo ahcun nan zumnak a parih nan taimaknak cu santlai lo a si ih nanmah le nanmah a bum awtu nan si,” (Jeim 1:26).

3. Kan lei hman daan ding.

Pathian in kan lei ziangtin hmanter in duh? Cumi cu Baibal sungah hitin a sim: “Cungnungbik Bawipa in simthiamnak lei i pek. Thabaangmi pawl thacak tertu dingah, Ziangahtile ka beng i var ter. I zirh dingmi thei theitu dingah,” (Is. 50:4). “Cuticun na dingnak cu ka than ding ih, sun nihlawh in ka lo thangṭhat ding,” (Saam 35:28). “Maw Bawipa, na seemsuahmi hmuahhmuah in, an lo thangṭhat ding ih, na minung pawlin lungawi thu na hnenah an sim ding. Na uknak sunlawi zia le na cah zia cu annih in an sim ding. Cuticun mi hmuahhmuah in mangbangza na tuahmi le na uknak huham sunglawi cu an thei ding,” (Saam 145:10-12). Curuangah kan lei hi a hman daan kan thiam a ṭul ngaingai.

4. Baibai ih zirh daan.

Kan ṭong daan le kan lei hman daan thawn pehpar in Baibal in ziangtin in zirh, timi kan zoh ta pei. “Ka u le ka nau tla, nannih pakhat le pakhat relsia aw hlah uh,” (Jeim 4:11). “Thuphan per nawn hlah uh. Pathian zumtu pakhat le pakhat thutak kan sim-aw fingfing ding; ziangahtile Khrih ruangpum sungah kan zatein sungtel ciar kan si,” (Efe. 4:25). “Duhdawtnak thinlung kengin thudik kan sim kan rel sawn peiih kan lu a simi Khrih sungah a phunkim in ṭhang ding kan si,” (Efe. 4:15). “A lei le a kaa a kil theitu cu harnak in a luat ding,” (Thuf. 21:23).

Thunetnak.

Kan lei hi a thupi tuk timi cu kan thei cio. Kan hman sual ahcun midang siatsuahnak petu tur a si. Curuangah kan lei, kan ṭongkam kan suup aw ding a ṭul. Kan lei cu thabangmi pawl tha caktertu dingah, zirhtu dingah, Pathian thangṭhatnak dingah, Pathian uknak sunlawizia le a cah zia sim dingah, relsia aw lo ding, thuphan per lo ding, thutak simnak dingah le duhdawtnak thinlung kengin thudik sim dingah kan hmang cio hram pei.

Duhdawtnak le duhsaknak thawn,

Rev. Dr. CJ Hrang Hmung, PhD.

Camkhat Frederick, Maryland, USA.

Feb. 13, 2016|Saturday|10:00pm.