PATHIAN DUHMI

SERMON No (2), January 10, 2016

PATHIAN DUHMI

Baibal Caanghril: “Nan hnen ihsin a ṭunghmunmi duhdawtnak a si ka duh, ramsa ih raithawinak a si lo. Keimah in theih ding a si ka duh, mei-ur thawinak a si lo” (Hosea 6:6).

Pathian kan biak tikah a thupimi pakhat cu Pathian theihfiang ding hi a si. Cutin kan theifiang theinak dingah Pathian ih duhmi theih a ṭul. Minung pakhat le pakhat rualpi aw in kan nel-aw zet tikah ziang a duh, ziangmi a duh lo timi kan theisak a ṭul. Innsang kan din tikah caan a rei vivo cun kan duhmi kan theisak aw thei. Sikhalsehla zumtu kan sinak a rei zet thlang nain Pathian duhnak kan theifiang thei lo. Thei ding khal kan tum lo. Cumi cu Pathian thawn kan nel awk lo ruangah le tisa duhnak sawn thupi ih kan ruah ruangah a si ko ding. Kan nunnak ah Pathian thawn nel-aw in a duhmi ziang a si timi thei dingah kan zuam a ṭul a si.

1. Raithawinak hnakin a ṭunghmunmi duhdawtnak.

Baibal sung kan siar tikah raithawinak hi Pathian thawn pawlkomnak hrangih tuahmi a si tiah kan hmu thei. Pathian le minung karlak ih a ummi sualnak timi hlonhlonak ding hrangah a si. Sikhalsehla minung pawlin Pathian fialmi hi thungaithlak in tuah loin tiduhdah in kan ṭuan men ṭheu. Raithawinak kan tuah rero nain kan thinlung cu Pathian duhnak taktak kan nei lo. Pathian kan duhdawt kan timi hi ruah tlak a si. Pathian fialmi vekih kan nung duh lomi khal hi ralrin ding kan ṭul thlang.

Bawi Jesuh in kan unau thawn kan rem awk lo ahcun thawinak tuah lo dingah, unau kan rem awk hnu lawngah thawinak tuah ding tiah in zirh (Mat. 5:23-24). Kan unau pawl parah duhdawt zaangfahnak kan neih hmaisa a ṭul. Pathian pekmi kan unau kan duh lo, thlarau hlo zawnruahnak kan nei lo ahcun Pathian hmaiah cohlantlakmi kan si hrimhrim lo ding. Ziangtluk thilṭha kan tuah khalle Pathian duhmi a ṭunghmunmi duhdawtnak thinlungput thawn tuahsuak ding hi a thupi a si.

2. Mei-ur thawinak hnakin Pathian theihnak.

A hmaisa kan sim zo vekin thawinak timi cu Pathian thawn nel-awk theinak dingah a si. Pathian thawn naihzetih kan nun theinak ding hrangah a si. Pathian in a hrangah biakṭheng tuahin amah kan biak ahcun cuih hmun ah amah a ra dingih thluasuah pe dingah a simmi a um (Suah. 20:24). Sikhalsehla Pathian hnenah mei-ur thawinak pekin kan biak rero ko nain Pathian theihnak le nel-zet ih kan um thei lo hi ziangruangah a si pei tiah mah le mah suh aw ding kan ṭul thlang.

Tuini zumtu pawl cu biakinn ah kan feh, Pathian kan thangṭhat, ahlu kan pek, thangṭhat hla kan sak, thuthangṭha ngai in thazaang kan lak cio. Sikhalsehla kan nunnak kan zohsal tikah Pathian duh vekin kan nung taktak lo. Pathian thawn kan nel-awk taktak thei lo. Pathian cun amah duhmi vekih tuah in amah thawn kan nel-awk ding hi a duhmi a si. Biakkhawmnak hrangah caan pek ding a thupi zet vekin Pathian duhmi thei in amah thawn nelzetih kan nun ding hi a thupizetmi a si.

Thunetnak.

Curuangah kan thinlung tak thawn Pathian zumin a ṭunghmunmi duhdawtnak kan neih a ṭul. Culawngah Pathian thawn kan nel aw thei ding. Pathian kan nel tikah a sersiammi kan minungpi pawl kan duhdawt taktak thei ding. Pathian duhmi theiin kan tuahsuak thei ding. Pathian duh vekin kan nung thei ding. Curuangah, “Tuu a ṭhabikmi thawn a hnenih raithawi hnakin amah ih thuthlun cu a ṭha sawn a si,” (1 Sam. 15:22) timi Baibal caang kha mang in Pathian duhmi vekin kan nung ding a ṭul thlang a si.

Duhdawtnak le duhsaknak thawn,

Rev. Dr. CJ Hrang Hmung, PhD.,

Camkhat Salt Lake city, Utah, USA.

January 8, 2015|Friday|3:30pm.