NU PUM SUNG IHSIN HRIL ZO

SERMON No (3), January 17, 2016

NU PUM SUNG IHSIN HRIL ZO

Bawipa in ka hnenh, “Na nu ih pum sungih ka lo seemter hlan ihsin ka lo thei zo ih na suah hlan ihsin miphun tampi hnenih profet si dingah ka lo hril zo a si,” i ti (Jere 1:4-5).

Kan biakmi Pathian cu ziangkim sersiamtu Pathian a si. Cuih Pathian cun kan seem hlan ihsin in thei cia thluh zo. Minung pakhat ciar parah Pathian in thleidannak zianghman a nei lo. Mi zovek khal hlawhtling ding le Pathian duh vekih nungin hi khawvel kan uk theinak dingah Pathian in a tawlrel cia ih sunral le siatsuah thluh dingah hril le sersiammi kan si lo. Sunral siatsuah timi cu minung pawlin Pathian ih remruatmi kan thei lo ruangah a siih kanmai’ duhnak lawngin kan nung duh ruangah sawn a si. Pathian ih duhnak cu ziangtluk harsatnak kan tong khalle thihnak hawrkuam sung kan zawh hman ah ṭihphan lo dingin in bawmtu Pathian a si (Saam 23).

1. Pathian ih retnak hmun thei dingah hawl ding.

Pathian in minung pawl hi kan sentet lai ihsin kan nunnak hrangah a timtuah cia thluh zo a si. Cumi cu Pathian thawn caan tamipi pawlkom in, a thunung thawn pawlkom in thei dingah kan zuam a ṭul. Minung tampi hi kan upa tikah ziang kan cang leh ding timi hi kan nauhak laiah a lang ṭheu. Jesuh khal a nauhak lai ihsin daan thiam le zirhtu pawl thawn biakinn ah Pathian thu an reltlang tiah kan hmu thei (Luk. 2:46). Baptisma petu Johan khal a nu pum sungih a um lai ihsin Jesuh nu Mary a rat a thei tikah a nu pum sung ihsin lungawi in a khir tiah kan hmu thei (Luk. 1:44). Nauhak laiah raldo aw, misual kai, mi dam lo tuamhlawm tivek pawl an lek daan zoh in a hrekkhat tluk cu an upat tikah an cang ngaingai. Curuangah kan sungah Pathian in ziangmi in retsak ih ziang dinhmun kan cang ding timi kha thei ngah dingin kan hawl a ṭul a si.

2. Ka tuah thei lo ding tiah el pang hlah.

Pathian in minung in ko taktak tikah kanmah le kanmah kan rin aw lo ruangah kan el ṭheu. Baibal caanghril kan siar tikah Pathian in Jeremiah kha a ko. Asinain Jeremiah in a el. A simmi cu ka no tuk hrih, ṭong thiammi ka si lo a ti (Jere. 1:6). Kan thei ṭulmi cu Pathian in in hmang duh tikah upa nauhak ti a um lo vekin a thiam e, thiam lo e timi a zoh lo. Pathian in in ko hnuhnu cu in hmang ding lawng a si mai. Moses khal a kum (80) ah Pathian in a ko tikah thusim thiam ka si lo, ka ṭong a fungih ka aw a hak fawn tiah a tiih a el (Suah 4:10). Tuini minung tampi cun phuahlam a phunphun hmangin kan el ṭheu. Phuahlam timi cu mi zaangzel pawlih hmang ṭheumi hriamnam pakhat a si. Pathian hnaṭuan sungah, khawhhran hnaṭuan sungah mino pawl cu an no tuk lai, upa pawl in ṭuan dingmi a si. Curuangah mino pawl hmun pek ding a cu hrih lo, rinsan an tlak hrih lo tiah an ti ṭheu ih hmun an kian duh lo. Asinain an paih lomi hnaṭuan pawl ahcun upa pawl ih ṭuan ding ahcun a cang lo ding, mino pawlih tuah dingmi a si, tiah an ti lala ih a netnak ah zianghman tuahsuak loin a um ṭheu. Tuini ah Pathian cun ziangvek khal in fial a sile “aw sisehlaw, ka tuah ko ding” tiah fial vekih a ṭuan taktak tu pawl lawng Pathian in a duh a si.

Thunetnak.

Kan sungih a ummi kan sinak hi a sang khal a si thei. Sikhalsehla Pathian in in hmang duh ahcun amah in ṭuanvo a lak thluh ding. Kan thinphang rero mi cu a lakmen a si. Pathian in kan si thei dingmi kha kan sungah in retsak ding a si. Amah in kan sinak in khaisang vivo ahcun a cang thei lomi zianghman a um lo. Cumi pawl kan sungah a ret theinak dingah kan tuah dingmi cu kan thinlung sangka kan ong a ṭul. Pathian in kan sungah a ret theinak dingah kham loin kan cohlang mai ding kha a ttul. Tuini mi tampi cun kan dinhmun le kan sinak lawng zoh awin a cang thei lo ding tiah kan ti ṭheumi hi Pathian ih duhnak kan el a si. Tuini rori ah Pathian in kan sinak dinhmun a retnak hmun kha thei in Pathian ih thil ti theinak le in hmannak kha cohlang ding lawng kan ṭul a si.

Duhdawtnak le duhsaknak thawn,

Rev. Dr. CJ Hrang Hmung, PhD.,

Camkhat Indianapolis, IN, USA.

January 16, 2016|Saturday|10:50pm.