KHRIH A RATSAL HLAN AHHIN

SERMON No (6), February 7, 2016

KHRIH A RATSAL HLAN AHHIN.

“Sikhalsehla a netnak tiang a dinghnget theitu cu rundam a si ding. Cun miphun hmuahhmuah ih theih ṭheh dingah hi vancung Uknak thuthangṭha hi leilung tlun khuazakip ah phuan a si ding. Cuih hnuah a netnak cu a si ding,” (Matthai 24:13-14).

Zumtu pakhat cu a zumnak parah a nettiang hngetzetin ding thei ding a ṭul. Jesuh Khrih parah a netnak tiang rintlak in nung ding a ṭul. Leitlun ih a ummi minung zatein Jesuh Khrih cu mai’ pumpak rundamtu ah zum le cohlang in hnget zetih ding dingah le Jesuh Khrih a ratsal hlan ah rundamnak thuthangṭha cu simphuan ding a ṭul. Jesuh Khrih a ratsal ding thu cu Baibal sungin kan thei cia zomi a si. Zumtu zate in Jesuh Khrih a ratsal hlanah mi hmuahhmuah in thutak theih le rundam an si theinak dingah simphuan cio dingin Pathian in ṭuanvo in pek a si.

1. Jesuh Khrih a ra sal ding.

Jesuh Khrih ziangtikah a ra sal ding timi thusuhnak hi tuini ah mi tampi in an sut bikmi le an thei duh bikmi thu pakhat a si. Himi thu hi zumtu lawng si loin zum lotu pawl khalin an thei hiar zetmi thu a si. Ziangahtile Baibal ca kan siar tikah Jesuh Khrih ratsalnak ding hrangih a sim ciami thuhla um daan pawl a famkim phah rero thlang ruangah a si. Jesuh Khrih in siseh, Paul le Piter te khalin a rat salnak caan cu fifir vekin a si ding tiah an sim cio (Mat. 24:42-43; 1 Thess. 5:2; 2 Pit. 3:10). Rat ding tikcu caan thawn pehpar in Jesuh Khrih in “PA” siar lo vancung mi pawl khalin an thei lo tiah a simfiang cia (Mat. 24:36). Sikhalsehla zumtu hrekkhat pawl cun Jesuh Khrih hnak hmanin a rat sal ding caan an thei sawn ih an ruahnak an sim rero mi hi ralrin ding a ṭha. Jesuh Khrih hman ih thei lomi kha minung pawl in kan thei timi cu sullam a nei hrimhrim lo. Jesuh Khrih in a rat salnak ding thu thawn peh aw-in theih thei dingmi thuhla mallai a sim. Cumi cu hi leitlun ah a thleng dingmi harsatnak thu pawl lawng si loin leitlun a cem hlan lo a ram le a felnak thawn pehparmi thuthangṭha kha sim hmaisa a si ding. Cuihhnu ah a netnak a thleng ding a ti (Mat. 24:29-30).

2. Pathian ih huham.

Kan biakmi Pathian cu a nung ih huham cahnak thawn a khatmi kumkhua Pathian a si. Paul in, “Thuthangṭha hi ka zahpi hrimhrim lo; ziangahtile a zumtu hmuahhmuah rundamnak an ngahnak dingah Pathian ih huham a si. A hmaisa ah Judah mi hrangah a siih Zentail mi hrang khalah a si ve,” a ti (Rom 1:16). Curuangah thuthangṭha simnak hmuntin ah le a theitu pawl hnenah Pathian huham a thleng ringring a si. Kannih hi thuthangṭha phuangtu zumtu kan si ahcun huham nei Pathian ih faate pawl kan si. Pathian ih huham cahnak kan hmu theinak dingah Pathian huham a simi a thuthangṭha kha simphuang ding a ṭul. Filip in thuthangṭha a sim tikah Pathian huham a rung ṭum ih a ngaitu pawl sung ihsin khawsia pawl ringpi ih au phah in an suak ih mizeng le ke awl pawl tla an dam thluh (Tirh. 8:4-7). Thuthangṭha a theitu, a phuangtu kawhhran tinkim ah Pathian ih huham cahnak a cangvai ṭheu. Pathian cun thuthangṭha a phuangtu minung pawl thawn a huham cahnak thawn a tongtham ringring thei a si.

3. Thuthangṭha phuannak.

Paul ih nunnak le thuthangṭha phuannak hi ṭhen a theih lo. Jesuh Khrih thawn Damaskas lamzin parah an ton-awk ihsin thokin a nunnak zate ah thuthangṭha simphuannak lawng in caan a hmang. Curuangah, “Ziangahtile mi hmuahhmuah hnenah ṭuanvo leiba ka nei: mifim le mi-aa hnenah siseh, cathiam le zianghman thiam lomi hnenah siseh, leiba ka nei,” a ti (Rom 1:14). Himi thu kan zoh tikah Paul in minung pawl a hmuh daan hi menmen in a hmu lo, cuih pawl hnenah thuthangṭha simphuan ding leiba a neitu tiah amah le amah a hmu aw. Kan kiangkap innsang, kawhhran sung rualpi pawl lakah rundamnak thuthangṭha veikhat hman a thei dah lomi hnenah thuthangṭha simphuan ding ṭuanvo leiba kan nei cio. Zum lotu pawl hnenah thuthangṭha kan phuan cu an thin a heng ding tiah kan ruat ruangah kan um men ṭheu. Thungai ti ahcun Paul ih simmi vekin tikcu a rem khalah siseh, rem lo khalah siseh simphuang dingmi kan si (2 Tim. 4:2). Kan thusimmi an pom ih an zum taktak ahcun kan parah an lungawi ringring leh ding. Ziangahtile hi leitlunah Jesuh Khrih ih rundamnak thu hnakih ṭha sawn thuthang dang a um nawn lo ruangah a si.

Thunetnak.

Tuini mi tampi in kan sim ṭheumi cu tikcu caan ka nei lo ruangah, ka man lo ruangah tvp. tla an si. Sikhalsehla zumtu diktak cun tikcu caan a um ah siseh, um lo khalah siseh simphuan ding a ṭul. Caan remcang tikah, kan man tik lawngah ṭuan dingmi a si lo. Curuangah phuahlam kan hawlmi pawl cawl in Jesuh Khrih ratsal caan a nai timi theiin thuthangṭha simphuan ding a ṭul. A nettiang rinsan tlakin kan um a ṭul. Jesuh Khrih a rat ding hngakhlap in, a uknak ram thleng ding kan hmu duh ahcun zumtu kan zatein rundamnak thuthangṭha simphuang cio ding kan ṭul. Khrih a rat sal hlan ahhin Pathian ih huham cahnak ringin, thuthangṭha cu remcang ah siseh, remcang lo khalah siseh simphuang cio ding a thupi zet a si.

Duhdawtnak le duhsaknak thawn,

Rev. Dr. CJ Hrang Hmung, PhD.

Camkhat Battle Creek, Michigan, USA.

Feb. 6, 2016|Saturday|4:00pm.