JOHAN IH SIMMI DUHDAWTNAK

SERMON No (4), January 24, 2016

JOHAN IH SIMMI DUHDAWTNAK

Baibal Caanghril:

“Duhdawtnak timi cu hiti in a si: Kanmah in Pathian kan rak duhdaw ti a si lo, amah sawnin in duhdawt ih a Fapa a run thlah; cumi cu kan sualthlah raithawinak dingah a si... Pathian in in duhdawt a si ahcun kannih khal pakhat le pakhat duhdaw aw ve ding kan si…Pathian cu kan sungah a nungih a duhdawtnak cu kan sungah a famkim a si” (1 Joh. 4:10-12).

Duhdawtnak thawn pehpar awin Baibal sungah simmi tampi kan hmu thei. Pathian ih duhdawtnak ruangah zumtu ah kan can theinak khal a si. A hleice in Johan ih simmi duhdawtnak thu tampi a ummi sungin mallei kan zoh tlang hrih pei.

 

1. Pathian in in duhdawt.

Minung pawl in Pathian kan duhdawt hmaisa ti a si lo. Pathian in kanmah in duhdawt hmaisa ruangah a si sawn (1 Joh. 4:19). Minung hi misual kan si ruangah Pathian ih duhdawtnak cotlakmi kan si hrimhrim lo.“Sikhalsehla Pathian in ziangtlukinso in duhdawt ti cu a langter: misual kan si hrih na cingin kan hrangah Khrih cu a thi” (Rom 5:8). Ziangruangah Jesuh Khrih cu kan hrangah a thi?A si, Jesuh Khrih a thihnak cu minung pawl kan sualnak hrangah a si. Jesuh Khrih ruangah kan sualnak cu in ngaithiam ih kanmah ih sualnak lawng si loin mi hmuahhmuah ih sualnak khal ngaithiam an si (1 Joh. 2:2).

Pathian ih in duhdawtnak cu tahtthimnak menmen a si lo.In duhdawt taktak a si. Thungai kan sim ahcun kannih hi Pathian ih a huatmi a ral pawl kan si. Phundang in kan sim a sile Pathian ih duhdawtnak co tlak lomi kan si. Sikhalsehla Pathian in amah kan ttul ruangah siseh, amai’ hmuihmel kengih sersiammi kan si ruangah siseh, in duhdawtnak a si. Pathian ih duhdawtnak ziangtin kan thei thei? Kan sualnak in ngaithiam duh ruangah a Fapa neihsun a thlah ih kan hrangah sualthlahnak in tuahsak thluh a si. Curuangah misual kan si ko nain miluat ah in cangter a si. Cumi kan theifiang ngah cun Pathian ih duhdawtnak kan thei ngah tinak a si.

2. Pakhat le pakhat duhdaw aw ve ding.

Ziangruangah minung pawl pakhat le pakhat kan duhdaw aw ding a ttul? Pathian in in duhdawt ruangah a si. Pathian in amai’ hmuihmel kengin a sersiammi minung pawl in duhdawt ruangah a si. Jesuh Khrih in in duhdawt vekin kannih khal pakhat le pakhat kan duhdaw aw ding a ttul: “Keimah ih ka lo duhdawt vek hin nannih khal pakhat le pakhat duhdaw aw ve uh!” (Joh. 15:12). Duhdawtnak taktak ziang bangtuk a si ti kan theihnak cu hiti in a si: Khrih in kan hrangah a nunnak a pek. Cuvek thotho in kannih khal in kan nunnak cu kan unau pawl hrangah pe ve ding kan si (1 Joh. 3:16). Jesuh Khrih in a duhdawtmi minung cu kannih in teh duhdawt loin kan el thei ding maw? A si lole kan el ngam ding maw? Kan zatein Pathian hmuihmel a kengtu kan si thluh ruangah pakhat le pakhat kan duhdawt awk ding a ttul hrimrhim a si. Pakhat le pakhat huat aw rero dingmi kan si lo. Relsiat aw rero dingmi kan si fawn lo. Pathian kan duhdawt taktak ahcun kan minungpi pawl parah duhdawtnak thinlung kan nei ringring ding hi a thupi ngaingai a si.

3. Pathian cu kan sungah a nungih a famkim.

Zohman in Pathian cu an hmu dah lo (Joh. 1:18). A si, Pathian cu kan hmu tengteng ding a ttul lo. Pathian cu kan thinlung sungah a um. Kan thinlung sung ihsin in uktu a si. Kan hnenah a um ringring. Immanuel Pathian a si. Curuangah kan mit thawn hmu tengteng ding a ttulnak a um lo. Minung pawl pakhat le pakhat kan duhdaw aw ahcun duhdawtnak a simi Pathian cu kan sungah a um tinak a si (Joh. 14:23). Pathian in a duhdawtnak cu kan thinlung sungah a burh zo a si (Rom 5:5). Pathian thawn pehzomnak kan nei ti kan theifiang ih Pathian thu a thluntu kan si ahcun kan sungah Pathian duhdawtnak famkimin a um tinak a si (1 Joh. 2:5). Pathian cu ka hmu dah lo nain Jesuh Khrih ah a phuang lang aw zo. Atu ahcun vancung ram Pathian vorhlam ah a um a si.

Thunetnak.

Pathian cu duhdawtnak a si. Kannih minung pawl cu Pathian in a hmuihmel kengin in sersiam ruangah in duhdawt hleice. Minung pawl khal pakhat le pakhat relsiat aw loin duhdawt aw ding sawn kan si. Cuticun mit in kan hmu thei lo nain Pathian a umzia hi duhdawtnak in a langfiang vivo ding a si.

Duhdawtnak le duhsaknak thawn,

Rev. Dr. CJ Hrang Hmung, PhD.,

Camkhat Indianapolis, IN, USA.

January 23, 2016|Saturday|3:00pm.