DIL DING, HAWL DING, KING DING

SERMON No (5), January 31, 2016

DIL DING, HAWL DING, KING DING.

“Dil uh, nan ngah ding. Hawl uh, nan hmu ding; king uh, nan hrangah sangka on a si ding. Ziangahtile a diltu hmuahhmuah cun an ngah ding, a hawltu hmuahhmuah cun an hmu ding ih a kingtu hmuahhmuah hrangah sangka cu onsak a si ding,” (Mat. 7:7-8).

Himi Baibal caang hi zumtu zate zikzik in kan ngah ciomi le zumtu pawl lakah a laar zetmi a si. Pathian hnenih thlacam ding thu thawn pehpar aw in Bawi Jesuh amah rori ih ṭongmi Baibal caang a si. Thlacamnak timi cu Pathian thawn biak-sawn awknak a si. Pathian in a faate pawl thawn pawlkom le biak-sawn awk a duh ruangah lamzin in onsakmi kha a si.

1. Dil ding.

Pathian in minung pawlih kan ṭulsammi kha kan dil hlan ihsin a theicia thluh ko nain kan ka ihsin ṭongsuak ih dilmi a duh. Mitcaw Bartimia cu Bawi Jesuh hnen a thleng tikah ziang lo tuahsak ding na duh, tiah Bawi Jesuh in a sut. Jesuh cu ziangkim theithluhtu a si ko nain Bartimia in a ṭulmi simsuak ding kha a duh (Mar. 11:46-52). Curuangah kan ṭulmi pawl kha Pathian hnenah dilsuak ding a thupi. Pathian cu kan dilmi hnak hmanih a ṭhasawn hman pe theitu a si (Efe. 3:20).

“Dil uh” a ti tikah kutdawh bangin dil ding kha a si lo. Thih le nun tiang dil ding khal a si lo. Biaknak daan vekih dil ding khal a si lo. Fapa in a pa hnenah rinsannak le ralṭhatnak tumpi thawn a dil vekih dil ding kha a si. Hi khawvel pa pawlcun faate in nga a dil tikah rul a petu ding zohman a um lo vekin vancung kan Pa cun a ṭha sawn in pe thei timi rinnak thawn dil ter in duh a si (Mat. 7:9-11). Kan dilmi hnakih ṭha sawn in pe thei timi zumnak, rinsannak thawn kan dil a ṭul. Dil uh, nan ngah ding tiin Pathian in thu in kam tikah a faate pawl hnenah pek ding a siang tuk ruangah a si timi kha kan hngilh cio lo pei.

2. Hawl ding.

Pathian thawn thlacam caan hmang hi Pathian mithmai hawl le Pathian thawn thukzet ih caan hmannak a si. Cuih tlunah Pathian ih in nunter duhmi a duhnak hawl khal a si. Pathian thawn caan kan hmang deuhdeuh le Pathian thawn kan nel-aw sinsin dingih kan parah Pathian ih siter in duhmi pawl khal kan fiang deuhdeuh ding. Ton a theih laiah Pathian hawlin thlacam ding a ṭul (Is. 55:6). Ziangahtile Pathian kan ton thei lo caan, ziangtluk kan ko khal le in awi duh lo caan a thleng lai ding (Amos 8:11-13). Curuangah thla kan cam tikah Pathian kan ton thei caan ah Pathian thawn caan hman daan kan thiam a ṭul. Caan pekin thla kan cam ahcun kan nunnak ah kan hawlmi, kan ṭulmi pawl khal a famkim ding a si.

“Dil uh” timi hmun ah cawl men ding a si lo. Kan dilmi kan ngah lo ahcun kan hawl a ṭul tikha kan thei cio a ṭul. Bawipai’ ṭongkam cu “dil uh” timi ah a cem lo ih “hawl uh” tiah a bet. Baibal ca hi kan duhnak zawnte lawng kan siar ahcun beidonnak a suak ter thei ih sunralnak tiang kan theih lo lai ah in thlen thei. Ziangah kan ngah lo a si pei, timi thu hi Baibal sungah kan hawl a ṭul. Kan thinlung a ṭha lo ih tisa nomnak hrang lawngah kan dil ahcun kan dilmi kan ngah lo ding (Jeim 4:3). Pathian duhnak thlun duh lo ih thla kan cammi hi Pathian thinheng tertu sawn a si (Thuf. 28:9). Thlacammi vekin kan ngah lo ahcun ziangruangah a si timi kha Baibal sungah kan hawl sal a ṭul a si.

3. King ding.

Bawi Jesuh in thuṭhimnak pakhat a sim. Nikhat ni ah mi pakhat cu a ṭulmi a um ruangah a rualpi inn ah zanṭim laiah a feh. Mi zapi ih caan a si ko nain a rualpa ih inn sangka cu catbang loin a king. A rualpa in kan itthat zo. Curuangah thaizing ah ra aw tiah a ti ko nain a cawl duh cuang lo. Sangka a king thotho. Cuticun netabik ah a tho ih a ṭulmi cu a pek a si, a ti (Luk. 11:5-8).

Cuvek ṭhiamṭhiam in kan nunnak ah veikhat veihnih cu a pit bembem, lamzin a ongmi a um lo, pakhat khat in dawnkham ringring vekin a um caan a um ko ding. Cuvek caan ahhin Pathian hnenah beidong loin thlacam rero ding kan ṭul. Kan thinlung muril in zumfeknak thawn kan dil ahcun Pathian hnenah sangka kan king thawn a bang aw a si. Thlacamnak thawn sangka kan king ahcun a netnak ah vancung sangka khal in ong sak thluh ding. Kannih cun Pathian in sangka in on hlanlo king rero ding kan ṭul. Ziangahtile sangka a kingtu hrangah on sak a si ding tiah Pathian in thu in kam cia ruangah a si.

Thunetnak.

Bawi Jesuh ih simcia vekin kannih zumtu pawl cun Pathian hnenah dil cio uhsi. Ngah hlan lo dil cio uhsi. Hawl cio uhsi. Sangka king uhsi. Zumfeknak tumpi thawn kan dil, kan hawl, kan king ih Pathian thukam kan ngah, kan tong hlanlo beidong loin kan dil a ṭul. Tuni zumtu tampi cu nikhat nihnih hrawng kan dil, kan hawl, kan king ih zianghman a danglam lo tikah kan beidong lohli men ṭheu. Cat loih kan tuah ṭulmi cu beidong loin dil ding, hawl ding, king ding lawng a si.

Duhdawtnak le duhsaknak thawn,

Rev. Dr. CJ Hrang Hmung, PhD.,

CamkhatDes Moines City, Iowa, USA.

January 31, 2016|Sunday|1:30am.