Baibal Caanghril:
“Zianghman ttih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; ka lo hum dingih ka lo run ding” (Isaiah 41:10).
Baibal siarbet: Joshua 1:1-9
Thuhmaihruai
Israel thuanthu kan zoh tikah Moses in a hruai hngai ih Izipt sal ihsin a suahpi. Cule Kanaan ram lam panin a fehpi vivo ih Kanaan ram an thlen hlanah Moses a thi. Moses a thih tikah Israel mipi hruaitu dingah Joshua in ttuanvo a lak. Joshua hrangah cuih hruaitu sinak phurrit le ttuanvo tumpi a ttuansuak theinak dingah raltthatnak nei ding hi a ttul ngaingai thlang. Lai ttong in “ralttha” kan timi hi Mirang ttong in “Bravery” le “Courage” timi thawn an bang aw. Asinain himi Mirang ttongfang pahnih hi a sullam an bang aw deuh lo. “Bravery” timi cu thiisen cahnak thawn a pehparmi a siih “ttih lo, ngamnak” ti ah leh a theih. “Courage” timi cu ttih lo menmen lawng si loin thinlung sung ihsin a suakmi a siih “paralttha” tiin leh a theih ding. “Bravery” hi minung ruangrai cahnak thawn pehparmi a si deuh ih “Courage” cu thuruat theinak parah hram a bun tiah sim ka duh. Rin lopiin ral do ding a ttul tikah “Bravery” nei ding a ttul zet. Sikhalsehla ziangtik lai caan khalih kan ttul ringringmi cu “Courage” timi raltthatnak sawn hi a si tiah thuruat thiam pawlin an sim ttheu. Zumtu pawlih kan nunnak ah kan neih ding a ttulmi cu “Bravery” timi raltthatnak phun si loin “Courage” timi raltthatnak sawn hi a si.
1. Tumtah Hmuitinmi a neitu cu Paralttha a si.
Moses a thih tikah Moses ih dinhmun a cosawngtu Joshua hrangah tumtah hmuitinmi tumpi a nei. Cumi cu, “Cak le ralttha in um aw, ziangahtile ka lo pe ding tiah nan pu nan pa hnenih k arak kam ciami hih ram hi na lak tikah Israel mi pawl hi nangmah in na hruai ding” timi Pathian ih thupek a si (Josh. 1:6). Cuih thupek ruangah Joshua hrangah tuah ttuan dingmi hnattuan, hmailam nor vivo dingmi hmuitin pawl a nei. Mi pakhat cu a nunnak ah tumtah hmuitinmi a nei ahcun ziangvek hnaihnoknak, harsatnak, dawnkhamnak le buainak a tong khalle a thinlung sungih a ummi raltthatnak in a tumtah hmuitinmi thleng dingin a zuampi tengteng ko ding. Cuih tumtah hmuitinmi lam panin a feh vivo theinak dingah thinlung cahnak, sunglam cahnak pawlin raltthatnak a pek ringring ding a si. Joshua khal Pathian in umpi ringring timi a theifiang tikah tumtah hmuitinmi vekin a mipi a hruai vivotu paralttha a si.
2. Raltthatnak cu tuah dingih khiahmi parah hram a bun.
“Ka siahhlawh Moses cu a thi zo… Moses hnenih ka sim zo bangtuk in nan fehnak dingmi ram hmuahhmuah cu nanmah ka miphun hnenah ka lo pe zo a si…” tiah Pathian in a sim (Joshua 1:2-9). Joshua cu thucah vekin Thukham cabu a simi Ca Thianghlim a siar ringring peiih a nganmi vekin nunpi dingah Bawipa in a fial. Raltthatnak thawn a khatmi pawlih thlun dingmi a si lole tuah dingih khiahmi thu a um ringring. Tumtah hmuitinmi nei timen hi a tawk hrih lo. Cuih tumtah hmuitinmi thleng dingin ka tuah tengteng ding timi mah le mah tthencatnak le khiah-awknak nei ding a ttul ngaingai. Raltthatnak timi cu tuah dingih khiahmi parah hram a bun ih tuahsuak thei dingin a zuampi. Zumtu pawl kan thlun dingmi thu pawl Pathian in in pek ringring. Ralttha dingin khal Bawipa amah lala in thazaang in pek ringring. Pathian thupek vekin kan nung thei ding hi a thupi ngaingai.
3. Kan kiangah Pathian a um tiah a theitu pawl cu an ral a ttha.
“Na hnenah ka um” tiah Josuah hnenah Pathian in a sim (Josh. 1:5). Pathian cu kan hnenah a um ringringtu “Immanuel Pathian” a si. Curuangah kanmah lawng in tanta men dah lo timi kan theifiang ringring ding a ttul. Pathian kan hnenah a um timi hnakih a ttha sawnmi aamahkhan dang a um nawn ding maw? Isaiah hnen khalah Pathian in, “Zianghman ttih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; ka lo hum dingih ka lo run ding” a ti (Is. 41:10). Cumi thu cu Joshua hnen khalah fiangzetin a sim hngaimi a si. Pathian kan hnenah a um timi kan theifiang taktak ahcun zianghman ttihphan ding a um lo. Raltthatnak in kan khat thei ringring ding a si. Kanmai’ cahnak ruangah si loin Pathian ih huham cahnak thawn kan nunnak a khatter ruangah a si sawn. Kan hnenah a um ringringtu Pathian ih pekmi raltthatnak a si.
Thunetnak.
Zumtu ralttha kan si theinak ding hrang thuthup cu a tlunih kan tarlangmi thu pathum pawl hi an si. Pathian ih pekmi tumtah hmuitinak a neitu cu zuamnak, tuar theinak le raltthatnak thawn a khatmi kan si. Kan hnenah Pathian a um timi thu a theifiangtu cun a hmaiah ziangvek harsatnak le buainak a um khalle ttih ding zianghman a nei lo. Raltthatnak thawn hmai a nor vivo thei a si. Paul, Martin Luther, David Livingstone, Willam Carey le Adoniram Judson le zumnak lam ih paralttha pawl khal a tlun ih kan tarlangmi thu pathum thawn a khatmi an si. Curuangah Pathian thuthangttha phuangin an feh tikah rethei zonzai a phunphun, harsatnak ziangkim an tong khalle raltthatnak thawn a pahtlang vivo tu zumtu paralttha pawl an si. Pathian in anmah thawn a um ringring a si timi an theifiang tikah raltthatnak thawn hmai an nor vivo thei a si. Cumi cu zumtu kan zate hrangah khal a si. Zumtu unau, nang le kei the zumnak lam in paralttha kan si ve ko lo maw???
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
April 11, 2015|Saturday|10:00 pm.
“Zianghman ttih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; ka lo hum dingih ka lo run ding” (Isaiah 41:10).
Baibal siarbet: Joshua 1:1-9
Thuhmaihruai
Israel thuanthu kan zoh tikah Moses in a hruai hngai ih Izipt sal ihsin a suahpi. Cule Kanaan ram lam panin a fehpi vivo ih Kanaan ram an thlen hlanah Moses a thi. Moses a thih tikah Israel mipi hruaitu dingah Joshua in ttuanvo a lak. Joshua hrangah cuih hruaitu sinak phurrit le ttuanvo tumpi a ttuansuak theinak dingah raltthatnak nei ding hi a ttul ngaingai thlang. Lai ttong in “ralttha” kan timi hi Mirang ttong in “Bravery” le “Courage” timi thawn an bang aw. Asinain himi Mirang ttongfang pahnih hi a sullam an bang aw deuh lo. “Bravery” timi cu thiisen cahnak thawn a pehparmi a siih “ttih lo, ngamnak” ti ah leh a theih. “Courage” timi cu ttih lo menmen lawng si loin thinlung sung ihsin a suakmi a siih “paralttha” tiin leh a theih ding. “Bravery” hi minung ruangrai cahnak thawn pehparmi a si deuh ih “Courage” cu thuruat theinak parah hram a bun tiah sim ka duh. Rin lopiin ral do ding a ttul tikah “Bravery” nei ding a ttul zet. Sikhalsehla ziangtik lai caan khalih kan ttul ringringmi cu “Courage” timi raltthatnak sawn hi a si tiah thuruat thiam pawlin an sim ttheu. Zumtu pawlih kan nunnak ah kan neih ding a ttulmi cu “Bravery” timi raltthatnak phun si loin “Courage” timi raltthatnak sawn hi a si.
1. Tumtah Hmuitinmi a neitu cu Paralttha a si.
Moses a thih tikah Moses ih dinhmun a cosawngtu Joshua hrangah tumtah hmuitinmi tumpi a nei. Cumi cu, “Cak le ralttha in um aw, ziangahtile ka lo pe ding tiah nan pu nan pa hnenih k arak kam ciami hih ram hi na lak tikah Israel mi pawl hi nangmah in na hruai ding” timi Pathian ih thupek a si (Josh. 1:6). Cuih thupek ruangah Joshua hrangah tuah ttuan dingmi hnattuan, hmailam nor vivo dingmi hmuitin pawl a nei. Mi pakhat cu a nunnak ah tumtah hmuitinmi a nei ahcun ziangvek hnaihnoknak, harsatnak, dawnkhamnak le buainak a tong khalle a thinlung sungih a ummi raltthatnak in a tumtah hmuitinmi thleng dingin a zuampi tengteng ko ding. Cuih tumtah hmuitinmi lam panin a feh vivo theinak dingah thinlung cahnak, sunglam cahnak pawlin raltthatnak a pek ringring ding a si. Joshua khal Pathian in umpi ringring timi a theifiang tikah tumtah hmuitinmi vekin a mipi a hruai vivotu paralttha a si.
2. Raltthatnak cu tuah dingih khiahmi parah hram a bun.
“Ka siahhlawh Moses cu a thi zo… Moses hnenih ka sim zo bangtuk in nan fehnak dingmi ram hmuahhmuah cu nanmah ka miphun hnenah ka lo pe zo a si…” tiah Pathian in a sim (Joshua 1:2-9). Joshua cu thucah vekin Thukham cabu a simi Ca Thianghlim a siar ringring peiih a nganmi vekin nunpi dingah Bawipa in a fial. Raltthatnak thawn a khatmi pawlih thlun dingmi a si lole tuah dingih khiahmi thu a um ringring. Tumtah hmuitinmi nei timen hi a tawk hrih lo. Cuih tumtah hmuitinmi thleng dingin ka tuah tengteng ding timi mah le mah tthencatnak le khiah-awknak nei ding a ttul ngaingai. Raltthatnak timi cu tuah dingih khiahmi parah hram a bun ih tuahsuak thei dingin a zuampi. Zumtu pawl kan thlun dingmi thu pawl Pathian in in pek ringring. Ralttha dingin khal Bawipa amah lala in thazaang in pek ringring. Pathian thupek vekin kan nung thei ding hi a thupi ngaingai.
3. Kan kiangah Pathian a um tiah a theitu pawl cu an ral a ttha.
“Na hnenah ka um” tiah Josuah hnenah Pathian in a sim (Josh. 1:5). Pathian cu kan hnenah a um ringringtu “Immanuel Pathian” a si. Curuangah kanmah lawng in tanta men dah lo timi kan theifiang ringring ding a ttul. Pathian kan hnenah a um timi hnakih a ttha sawnmi aamahkhan dang a um nawn ding maw? Isaiah hnen khalah Pathian in, “Zianghman ttih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; ka lo hum dingih ka lo run ding” a ti (Is. 41:10). Cumi thu cu Joshua hnen khalah fiangzetin a sim hngaimi a si. Pathian kan hnenah a um timi kan theifiang taktak ahcun zianghman ttihphan ding a um lo. Raltthatnak in kan khat thei ringring ding a si. Kanmai’ cahnak ruangah si loin Pathian ih huham cahnak thawn kan nunnak a khatter ruangah a si sawn. Kan hnenah a um ringringtu Pathian ih pekmi raltthatnak a si.
Thunetnak.
Zumtu ralttha kan si theinak ding hrang thuthup cu a tlunih kan tarlangmi thu pathum pawl hi an si. Pathian ih pekmi tumtah hmuitinak a neitu cu zuamnak, tuar theinak le raltthatnak thawn a khatmi kan si. Kan hnenah Pathian a um timi thu a theifiangtu cun a hmaiah ziangvek harsatnak le buainak a um khalle ttih ding zianghman a nei lo. Raltthatnak thawn hmai a nor vivo thei a si. Paul, Martin Luther, David Livingstone, Willam Carey le Adoniram Judson le zumnak lam ih paralttha pawl khal a tlun ih kan tarlangmi thu pathum thawn a khatmi an si. Curuangah Pathian thuthangttha phuangin an feh tikah rethei zonzai a phunphun, harsatnak ziangkim an tong khalle raltthatnak thawn a pahtlang vivo tu zumtu paralttha pawl an si. Pathian in anmah thawn a um ringring a si timi an theifiang tikah raltthatnak thawn hmai an nor vivo thei a si. Cumi cu zumtu kan zate hrangah khal a si. Zumtu unau, nang le kei the zumnak lam in paralttha kan si ve ko lo maw???
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
April 11, 2015|Saturday|10:00 pm.
No comments:
Post a Comment