Baibal Caanghril:
“Pathian in ‘Kei cu Abraham ih Pathian, Isaak ih Pathian, Jacob ih Pathian ka si’ a ti. A nungmi ih Pathian a si, a thimi ih Pathian a si lo” (Matthai 22:32).
Baibal siarbet: Matthai 22:23-33.
Thuhmaihruai
Baibal caanghril kan siarmi hi Bawi Jesuh ih ttongkam pawl hi Sadusi pawlih thusuhnak a lehsalnak ihsin a suakmi ttongkam pawl an si. Judah mi pawl in Thukam Hlun sungin a hmaisabik cabu pa nga (Pentateuch) lawng an cohlang ih an zumnak hrangah a thupizetmi a si timi hi kan theifiang hmaisa a ttul. Cuih cabu pa nga ih thuzirhmi pawl lawng hi an pompimi a si. Cumi cabu pa nga sungah thihnak ihsin thawhsalnak thu fiangten nganmi a um lo ruangah an zum thei lo. Cuihtlunah Sadusi pawl hi thuhla dang tampi thawn rawi in thihnak ihsin thawhsalnak a um timi hi an zum hrimhrim lo. Tuini khalah mi tampi in Sadusi pawl vekin thawhsalnak a zum lotu tampi an um timi hi kan theifiang a ttul.
1. Bawi Jesuh ih simmi thawhsalnak
Sadusi pawl le Jesuh Khrih thu an el aw tikah Sadusi pawlin Thukam Hlun sungih a hmaisabik cabu pa nga lawng hi an cohlangmi a si ruangah Jesuh Khrih khalin cuih cabu pa nga sirhsan in thu a lehsalmi kan hmu thei. Cuih cabu pa nga sungah atu le atu a tel ringringmi Baibal ttongkam cu Pathian in “Kei cu Abraham ih Pathian, Isaak ih Pathian, Jacob ih Pathian ka si” timi ttongkam hi a si. Thihnak ihsin thawhsalnak a um lo sehla Pathian in “Kei cu (a thi cia zo mi) Abraham ih Pathian, Isaak ih Pathian, Jacob ih Pathian ka rak si dah” tiah a ti ko ding. Sikhalsehla Pathian in Abraham, Isaak, Jacob te pawl an nung lai vekin “ka si” timi ttongkam a hmang a si. Pathian cu A nungmi ih Pathian a si, a ti tikah Abraham, Isaak le Jacob te pawl khal thihnak neh in an lan zo hnu atu ah a nungmi an sizia a langter a si. Cuihtlunah Bawi Jesuh in thawhsalnak thu cu vei tampi a sim ringringmi a si (Joh. 14:1-14; Luk. 16:19-31). Thawhsalnak kan el ahcun Bawi Jesuh ih simmi le zirhmi pawl kan el thawn a bang ding a si. Curuangah Bawi Jesuh cun thawhsalnak a um timi fiangzetin a ummi cu kan zummi khal a si. Kan zum cio dingah a ttulmi khal a si.
2. Bawi Jesuh ih langtermi thawhsalnak
Bawi Jesuh hi leitlun a len laiah a simmi thu pawl hi a famkim thluh. Thawhsalnak thu pawl le a tuahmi mangbangza thil pawl kan zoh tikah Bawi Jesuh in thihnak neh in a thosal tikah fiangzetin a langmi thuhla pawl an si. Jesuh Khrih tih thawhsalnak ruangah thinlung a hnok rerotu pawl siseh, a cohlang thei lotu pawl siseh, lunghrinnak a neitu pawl siseh, fiangzetin an thei, an hmu ngah tikah lungkimin an cohlang thei sal a si. Bawi Jesuh in thawhsalnak thu a sim lawng si loin amah rori in thihnak nehin a thosal. “Pathian in hi Jesuh rori hi thihnak ihsin a thoter sal ih cumi theihpitu cu kanmah hi kan si” tiah Piter in fiangzetin a sim a si (Tirh. 2:32).
3. Bawi Jesuh ih pekmi thukam
Thihnak ihsin thawhsalnak timi thuhla hi Abraham, Isaak, Jacob le Bawi Jesuh lawng si loin mikip thawn pehparmi a sizia Bawi Jesuh in fiangtein a sim. Bawi Jesuh in, “Kei cu thawhsalnak le nunnak ka si. zokhal keimah i zumtu cu thi hmansehla an nung ding. Zokhal keimah sungah a nungmi le i zumtu cu an thin awn lo ding” tiah fiangtein a simmi kan hmu thei (Joh. 11:26-26). Cumi cu Bawi Jesuh ih pekmi thukam a si. Thukam Thar sungah atu le atu a sim ringringmi a thukam a si. Bawi Jesuh a nung vekin kannih zumtu pawl khal kumkhua in kan nung thluh ding timi hi Thukam Thar hmun tinkim ah a simmi thupi bik a si. Thihnak ihsin a thosaltu Jesuh Khrih kan zum ruangah siatralnak thleng loin kumkhua nunnak kan co ding thu in kam cia thuh zo a si (Joh. 3:16).
Thunetnak.
Mi zovek khalin thihnak timi cu kan tong leh tengteng ko ding. A hmaisa le neta lawng kan dang aw. Cumi thihnak cu zovek minung khalin kan el thei lomi a si. Tikcu caan a kim tikah cuih thihnak cu kan tong tengteng ko ding. Sikhalsehla zumtu mi piangthar hrangah kumkhua nunnak aamahkhan kan nei ringring a si. Cumi cu Bawi Jesuh ih pekmi, amah rori thihnak nehin a thosalih kumkhua nunnak lamzin in ong sak zo. Bawi Jesuh thosal ta lo sehla zumtu timi kan um lo ding. Kawhhran timi khal a um lo ding. Kumkhua nunnak timi khal a um lo ding. Asinain Bawi Jesuh cu thihnak nehin a thosal zo ruangah zumtu kan zate hrangah kumkhua nunnak aamahkhan kan nei theinak a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
April 4, 2015|Saturday|9:00 am.
“Pathian in ‘Kei cu Abraham ih Pathian, Isaak ih Pathian, Jacob ih Pathian ka si’ a ti. A nungmi ih Pathian a si, a thimi ih Pathian a si lo” (Matthai 22:32).
Baibal siarbet: Matthai 22:23-33.
Thuhmaihruai
Baibal caanghril kan siarmi hi Bawi Jesuh ih ttongkam pawl hi Sadusi pawlih thusuhnak a lehsalnak ihsin a suakmi ttongkam pawl an si. Judah mi pawl in Thukam Hlun sungin a hmaisabik cabu pa nga (Pentateuch) lawng an cohlang ih an zumnak hrangah a thupizetmi a si timi hi kan theifiang hmaisa a ttul. Cuih cabu pa nga ih thuzirhmi pawl lawng hi an pompimi a si. Cumi cabu pa nga sungah thihnak ihsin thawhsalnak thu fiangten nganmi a um lo ruangah an zum thei lo. Cuihtlunah Sadusi pawl hi thuhla dang tampi thawn rawi in thihnak ihsin thawhsalnak a um timi hi an zum hrimhrim lo. Tuini khalah mi tampi in Sadusi pawl vekin thawhsalnak a zum lotu tampi an um timi hi kan theifiang a ttul.
1. Bawi Jesuh ih simmi thawhsalnak
Sadusi pawl le Jesuh Khrih thu an el aw tikah Sadusi pawlin Thukam Hlun sungih a hmaisabik cabu pa nga lawng hi an cohlangmi a si ruangah Jesuh Khrih khalin cuih cabu pa nga sirhsan in thu a lehsalmi kan hmu thei. Cuih cabu pa nga sungah atu le atu a tel ringringmi Baibal ttongkam cu Pathian in “Kei cu Abraham ih Pathian, Isaak ih Pathian, Jacob ih Pathian ka si” timi ttongkam hi a si. Thihnak ihsin thawhsalnak a um lo sehla Pathian in “Kei cu (a thi cia zo mi) Abraham ih Pathian, Isaak ih Pathian, Jacob ih Pathian ka rak si dah” tiah a ti ko ding. Sikhalsehla Pathian in Abraham, Isaak, Jacob te pawl an nung lai vekin “ka si” timi ttongkam a hmang a si. Pathian cu A nungmi ih Pathian a si, a ti tikah Abraham, Isaak le Jacob te pawl khal thihnak neh in an lan zo hnu atu ah a nungmi an sizia a langter a si. Cuihtlunah Bawi Jesuh in thawhsalnak thu cu vei tampi a sim ringringmi a si (Joh. 14:1-14; Luk. 16:19-31). Thawhsalnak kan el ahcun Bawi Jesuh ih simmi le zirhmi pawl kan el thawn a bang ding a si. Curuangah Bawi Jesuh cun thawhsalnak a um timi fiangzetin a ummi cu kan zummi khal a si. Kan zum cio dingah a ttulmi khal a si.
2. Bawi Jesuh ih langtermi thawhsalnak
Bawi Jesuh hi leitlun a len laiah a simmi thu pawl hi a famkim thluh. Thawhsalnak thu pawl le a tuahmi mangbangza thil pawl kan zoh tikah Bawi Jesuh in thihnak neh in a thosal tikah fiangzetin a langmi thuhla pawl an si. Jesuh Khrih tih thawhsalnak ruangah thinlung a hnok rerotu pawl siseh, a cohlang thei lotu pawl siseh, lunghrinnak a neitu pawl siseh, fiangzetin an thei, an hmu ngah tikah lungkimin an cohlang thei sal a si. Bawi Jesuh in thawhsalnak thu a sim lawng si loin amah rori in thihnak nehin a thosal. “Pathian in hi Jesuh rori hi thihnak ihsin a thoter sal ih cumi theihpitu cu kanmah hi kan si” tiah Piter in fiangzetin a sim a si (Tirh. 2:32).
3. Bawi Jesuh ih pekmi thukam
Thihnak ihsin thawhsalnak timi thuhla hi Abraham, Isaak, Jacob le Bawi Jesuh lawng si loin mikip thawn pehparmi a sizia Bawi Jesuh in fiangtein a sim. Bawi Jesuh in, “Kei cu thawhsalnak le nunnak ka si. zokhal keimah i zumtu cu thi hmansehla an nung ding. Zokhal keimah sungah a nungmi le i zumtu cu an thin awn lo ding” tiah fiangtein a simmi kan hmu thei (Joh. 11:26-26). Cumi cu Bawi Jesuh ih pekmi thukam a si. Thukam Thar sungah atu le atu a sim ringringmi a thukam a si. Bawi Jesuh a nung vekin kannih zumtu pawl khal kumkhua in kan nung thluh ding timi hi Thukam Thar hmun tinkim ah a simmi thupi bik a si. Thihnak ihsin a thosaltu Jesuh Khrih kan zum ruangah siatralnak thleng loin kumkhua nunnak kan co ding thu in kam cia thuh zo a si (Joh. 3:16).
Thunetnak.
Mi zovek khalin thihnak timi cu kan tong leh tengteng ko ding. A hmaisa le neta lawng kan dang aw. Cumi thihnak cu zovek minung khalin kan el thei lomi a si. Tikcu caan a kim tikah cuih thihnak cu kan tong tengteng ko ding. Sikhalsehla zumtu mi piangthar hrangah kumkhua nunnak aamahkhan kan nei ringring a si. Cumi cu Bawi Jesuh ih pekmi, amah rori thihnak nehin a thosalih kumkhua nunnak lamzin in ong sak zo. Bawi Jesuh thosal ta lo sehla zumtu timi kan um lo ding. Kawhhran timi khal a um lo ding. Kumkhua nunnak timi khal a um lo ding. Asinain Bawi Jesuh cu thihnak nehin a thosal zo ruangah zumtu kan zate hrangah kumkhua nunnak aamahkhan kan nei theinak a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
April 4, 2015|Saturday|9:00 am.
No comments:
Post a Comment