KAN LAMZIN HRNGAH TLEUNAK

Baibal Caanghril:

“Na thu cu ka ke hrangah mei-inn a siih ka lamzin hrangah tleunak a si” (Saam 119:105).

Baibal siarbet: Saam 119:89-96.

Thuhmaihruai:

Pathian lamhruainak in kum thar sungah nili sung ke kan karthok rero thlang. Kum cem dingah ni 361 sung ke kan kar vivo lai ding. Hitin ke kan kar vivo tikah ziang kan cang ding? ziang kan bang ding? timi pawl kan thei ciami pakhat hman a um lo. Cumi hrangah Baibal caanghril kan tarlangmi hi kan hrangah a tthabik pakhat a si. Kanmah le pumpak nun hrangah siseh, innsang hrangah siseh, kawhhran hrangah siseh, khawtlang hrangah siseh, ziangvek caan khalah “Tleunak” a pe theitu mei-inn a um a si timi in thei ter.

1. Kan ke hrangih mei-inn.

A fehvak theitu le khualtlawngtu kan zate in “ke” kan hmang cio. Khristian timi cu tomen ding a ngah lo. Khual kan tlawng rero. Hi leitlun ah khual tlawng rero kan si. Baibal sungah Pathian thupekmi tampi hi “tho aw la, na ke in feh aw” timi khal a um. “A sungah lut aw”, “lenglam ah suak aw”, “dunglam ah kir sal aw” timi ttongfang pawl khal an si thei. Abram hnenah Pathian in, “Na ram, na miphun le na pa ih inn taanta aw la ka lo hmuh dingmi ram ah feh aw” a ti (Seem. 12:1). Cutiin mai’ umtlannak khua le ram taanta in midang thei dah lonak ram ah feh dingin thu a pek hngai. Kan Bawipa Jesuh khalin a dungthlun pawl hnenah, “Leitlun khuazakip ah va feh uh…” (Mat. 28:19; Mar. 16:15) tiah thu a pekmi kan hmu thei.

“Nunnak” timi cu “cawl menin a um lo, cangvai in a feh rero a si”. Cutin cangvai in a feh rero ruangah thimnak hmunih a feh tikah a hmaiah tleunak hmuhtu mei-inn a ttul. Ke hrangih mei-inn cu mawttaw car meisa vekin hmailam a zaten a tleu ban thluh lo, ke hmaite, ke kiangkap hrang lawngah a tleu thei a si. Kal khat hnu kal khat a feh vivo theinak hrang lawngah tleunak a um. Nikhat sungah kal khat hnu kal khat kan feh vivo theinak ding tleunak a si. Curuangah Khristian zumtu pawl hrangah kumpi kum khat sungah ziang kan cang ding timi hi thei thluh a ttul lo. Kan fehnak kekar kal khat hnu kal khat, ni khat hnu ni khat hrangah Pathian in tleunak kha in pe ringring ding a si.

2. Thimnak lakih tleunak.

“Pathian thu” cu kan mei-inn le tleunak a si tiah Saam cangantu in a sim. Mei-inn hi ziang hrangah kan vang ttheu? “Tleunak” ngahnak ding hrangah a si. A hleice in a thimnak hmun ah fehvah ding a harsat tikah lamhmuhtu dingah a si. Veikhat veihnih cu a thim hmun ih kan hlo termi thilri hawlnak ding hrangah tleunak kan hmang. Khuathim lakih kan feh, kan vah tikah thimnak phenthlam pawl kan hmu ttheu ih cumi pawl cu tleunak thawn kan cerh tikah phenthlam si nawn loin fiangzetin kan hmu theimi ah an cang sal. A thimnak hmunah tleunak a pe theimi mei-inn kan keng ringring ahcun cuih hmun ahcun a tleu ringring a si. Zumtu pawl hrangah kan khualtlawnnak lamzin tluan ah cuih mei-inn a simi Jesuh ih tleunak kan keng ringring ahcun kan nunnak ah thim thuneihnak a um thei lo ding a si.

3. “Thu” timi tleunak.

Kum thar hrangah “Thu” timi Pathian ih pekmi tleunak hi rinsan tlak bikmi a si. Hi leitlun kan um sungah thu tampi a um. Thusimmi a phunphun, thehlarnak a phunphun, thlemnak a phunphun a um. Cumi pawl sungah zumtu pawlih kan ttul bikmi pawl cu “Pathian Thu” timi “tleunak’ hi a si. “Pathian Thu” hi olzawng le daithlang zetih ruah le theih men dingmi a si lo. “Thu” a um ruangah “tleunak” khal a um. Cuih “Thu” cu kan nunnak a si, kan damnak a si, kan hlawhtlinnak a si, kan tthansonak a si. Jesuh Khrih ih ttongkam pakhat (Thu) ruangah mina tampi an dam. Mitcaw tampi in khua an hmu. A thianghlim lomi le khawsia siatsuahnak a tuartu pawl an dam ih an thianghlim. A thi ciami pawl an nung sal. Miphar pawl dam le thianfainak an ngah. “Pathian Thu” in mi nun a sim, a rem, pehzom ih nun vivo theinak dingah lam a hruai. Lamzin palh ah kan zawh ngah khalle cuih “Thu” ih “tleunak” cun lamzin dik, lamzin ding ah in fehpi. Cuih Tleunak thlun in kan zawh vivo a si ahcun “lungawinak”, “hnangamnak”, “remdaihnak” le “thinnomnak” pawl kan nei theinak dingah “aamahkhaan” in pek a si.

Thunetnak.

Curuangah Saam cangantu ih simmi “Na thu cu ka ke hrangah mei-inn a siih ka lamzin hrangah tleunak a si” (Saam 119:105) timi hi kum thar sungih nitin ke kan karnak ah thupi zetah retin kan fehpi vivo ding a ttul ngaingai. Pathian Thu a simi tleunak in lamzin in hruai vivo ding a thupi. Pathian Thu lawngin kan nunnak in uk cio hram seh. Hi leitlun ah a famkimmi zianghman a um lo, asinain Pathian ih thukham cu a famkim a si (Saam 119:96).

Duhdawtnak le duhsaknak thawn,

Rev. CJ Hrang Hmung, PhD.,

Toungphila, Kalaymyo.

January 4, 2015|Sunday|5:00 pm.