Baibal Caanghril:
“Bawipa ih tthatzia cu nanmah tein tep ciar hnik uh” (Saam 34:8).
Baibal siarbet: Rom 8:28; 33-39.
Thuthoknak
Hi leitlun thilcang pawl le harsatnak a phunphun pawl kan zoh tikah Bawipa a ttha tiah kan ti thei ngaingai pei maw? Hitluk harsatnak thawn a khatmi leilung a sersiamtu Pathian cu a ttha ngaingai ko tiah kan ti thei ngaingai pei maw? Himi bangtuk thusuhnak hi kanmah le pumpak kan nunnak zohin kan suh caan a um ko ding. Thungaitein kan ruat ahcun himi vek thusuhnak hi mi tampi in kan sut dah ciomi a si ko ding. Thlarau lamah pitling in kan rinsanmi tampi khalin veikhat veihnih ah hivek thu an suh caan a um ve ding. Cutin an sut ruangah thlarau thazaang ttawnttai ih an tlaksiat tiin ruah ding a si lo. Himi thusuhnak hi minung kan si sungah hrial theih lomi thusuhnak pakhat a si ta hrimhrim. A cang thei lomi khuaruahnak lam si loin kan hmuhton theimi khuaruahnak pawl hmangin Bawipai’ tthatzia um daan pawlcu a tanglam bangin kan zoh tlang hrih hnik ding.
1. Harsat zonzaihnak sungah Pathian tthatnak a um.
Kan nunnak ah ninghang riahsiatza pakhat khat kan tong tiah ruat hnik uhsi. Cuih kan tonmi cun kan thin a har ter ngaingai. Kan hardamnak tiang a siatsuah. A si lole kan hnattuan ihsin dawi kan tong. Hnattuan ding kan nei nawn lo. Cuticun ziangkim ah kan remcang thei lo ih kan ning a hang, kan riah a sia ngaingai. Cuvek tikcu caan ahhin Pathian na ttha ngaingai ahcun ziangruangah hibang thil harsa ka parah a thleng? tiah kan sut ko ding. A si lole Pathian na ttha kan lo ti laiah ziangruangah hivek riahsiatza, sunralnak, thinnaunak pawl ka parah na thleng ter? tiah a phunphunin thu kan suh caan a um ko ding. A sile kan biakmi Pathian a ttha taktak ahcun kan harsatnak a zate’n in hlonsak thluh ding tiah kan zum maw? Pathian ih tthatnak timi hi ziangmi bik a si timi teh kan ruat dah maw?
Nu le pa dinhmun in faate parih kan lungput um daan zoh hnik sehla. Nu le pa in faate pawl hi an nun sung hmuahhmuah zianghman ttuan lo ih um huahhi men sehla kan duhsakmi a si maw? Ei dingmi ei mai, in dingmi in thluh, cule itthat men, to men le um men an si tikah kan zoh men dah maw? Cutin kan zoh men a sile kan faate pawl kan duhdawt taktak tiah kan ti thei pei maw? Nu le pa ih duhdawtnak hi faate pawl um huahhi men ding kha a si maw? Cutin kan ret a sile nu le pa dam sung cu an nuam men ding. Asinain nu le pa thih hnu ah siseh, ttumsuk in farahnak a thlen tikah cuih faate pawl ih nun daan dingcu harsatnak hlir in a khat ko ding.
Leitlun mi hminthangzet pawl ih nun kan zohfel tikah farah zonzai tuar loin, an lamzin hi pangpar lamzin thluh a si maw? Hling le so lakah teh an feh dah lo maw? timi kan zoh tikah olte’n mi hminthang ah an cang dah lo. An nunnak lamtluan ah harsatnak nasazet an ton hnu ah an ruahban lomi nunnak lamzin parah an thleng ih sangsin ah an kaiso vivo ttheu a si. Leitlun awnmawi thiam hminthang Bethoven hi hnaset a si. Cuih a ttawnttaihnak lak ihsin leitlun hminthang tiang a thleng thei. Kum 1 te a si lai ihsin mitcaw a simi Finny Croby hi Pathian thangtthatnak hla fing 8000 tlun a phuah thei a si. Tlangleng hnattuantu menmen pakhat a simi Thomas Edison cu meisa a kangter pangmi thil pakhat ruangah a hnattuannak ihsin dawi a tong ko nain a netanak ah leitlun hminthang scientist pakhat ah a cang thei.
Minung nunnak timi cu nomnak hlir in a khat thluh lawngah Pathian a ttha tiah kan ti thei lo ding. Harsat le zonzaihnak a phunphun sungah Pathian cun minung ih kan theih ban lomi Pathian ih tumtahmi le ruahnak pawl cu neta ah a langsal ringring. Zumtu hmaisa pawl martar an tuar ngamnak khal cu Pathian tthatnak kha an nunnak muril sungin an tep ngah cio ruangah a si. Harsat zonzainak timi pawl cu nomnak le hahdamnak lamzin kan kaiso theinak ding hrangah kalbak pawl an si sawn.
2. Zalennak in pekmi sungah Pathian tthatnak a um.
Mi pakhat cu mawtaw a mawng rero laifangah rin lopin lamzin ih a fehtu mi pakhat a pah that pang. Cuih mawtaw mawngtu cu harsatnak nasazet a tong. Pathian a ttha taktah ahcun ziangruangah cuvek thil cang lo dingain Pathian in a kham lo a si pei? Cu te pawlih nunnak ziangruangah a hum lo a si pei? tiah thusuhnak a um thei.
Pathian ih tthatnak timi ih a hleicetnak cu minung hnenah zalennak a pek hngaimi kha a si. Kan hnenah zalennak in pekmi kha kan mang sal a ttul. Zalennak kan neih lo ahcun minung kan si lo dingih cet minung (robot) vek kan si ding. Pathian in minung kha cet minung veih in ret lomi hi a tthatnak cu a si. Minung hnenah zalenzet in tthencat theinak le duhhril theinak in pek. Cuih kan tthencatnak ruangah kanmah le kanmah harsatnak thleng dingah kan tuah aw. Cuih zalennak in pekmi pawl hmangin hi leitlun ah ral a phunphun kan suahpi.
Curuangah Pathian in zalennak in pekmi sungah a tthatnak ziang a si tiah thusut rero loin kanmai’ sambaunak ziang a si timi sawn kha kan zoh aw dingih thu kan sut aw dingmi a si sawn. Zalennak in pekmi sungah Pathian tthatnak a um ringring a si.
Thunetnak.
Nunnak ih harsatnak a sangbik cu “thinglamtah” tiah ruah a si dah. Sikhalsehla zumtu pawl hrangah cuih thinglamtah cu “Sui lukhuh” a si timi cu kan thei thluh ko. Pathian ih ruahnak ziangtluk a thuk ih a kau timi hi cing ringring uhsi. Pathian ih ruahnak le minung ih ruahnak ziangtik khalah a bang aw dah lo (Isa. 55:8-9). Bawipa ih tthatzia cu kanmah te ciar in kan tep ngah taktak lawngah a tthatnak kan theifiang thei ding. Rawl a thaw timi cu kan tep ngah hnu lawngah a thawtzia kan theifiang thei. Pathian ih tthatzia le duhdawtnak cu a tep ngah taktaktu pawl lawngin famkimte’n an theifiang thei. A tep ngahtu hrangah ziangvek harsatnak, zonzai retheinak, buainak pawl khalin Pathian ih duhdawtnak thawn a tthen thei dah lo ding (Rom 8:35). Kan biakmi Pathian cu thinglamtah thihnak ihsin thawhsalnak ah, harsatnak ihsin zalen luatnak ah, mitthli lak ihsin lungawi nomnak ah, riahsiatnak ihsin hnemnak le lungawinak ah in thlenpi thei umsun duhdawtu Pathian nung a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
February 14, 2015|Saturday|9:00 pm.
“Bawipa ih tthatzia cu nanmah tein tep ciar hnik uh” (Saam 34:8).
Baibal siarbet: Rom 8:28; 33-39.
Thuthoknak
Hi leitlun thilcang pawl le harsatnak a phunphun pawl kan zoh tikah Bawipa a ttha tiah kan ti thei ngaingai pei maw? Hitluk harsatnak thawn a khatmi leilung a sersiamtu Pathian cu a ttha ngaingai ko tiah kan ti thei ngaingai pei maw? Himi bangtuk thusuhnak hi kanmah le pumpak kan nunnak zohin kan suh caan a um ko ding. Thungaitein kan ruat ahcun himi vek thusuhnak hi mi tampi in kan sut dah ciomi a si ko ding. Thlarau lamah pitling in kan rinsanmi tampi khalin veikhat veihnih ah hivek thu an suh caan a um ve ding. Cutin an sut ruangah thlarau thazaang ttawnttai ih an tlaksiat tiin ruah ding a si lo. Himi thusuhnak hi minung kan si sungah hrial theih lomi thusuhnak pakhat a si ta hrimhrim. A cang thei lomi khuaruahnak lam si loin kan hmuhton theimi khuaruahnak pawl hmangin Bawipai’ tthatzia um daan pawlcu a tanglam bangin kan zoh tlang hrih hnik ding.
1. Harsat zonzaihnak sungah Pathian tthatnak a um.
Kan nunnak ah ninghang riahsiatza pakhat khat kan tong tiah ruat hnik uhsi. Cuih kan tonmi cun kan thin a har ter ngaingai. Kan hardamnak tiang a siatsuah. A si lole kan hnattuan ihsin dawi kan tong. Hnattuan ding kan nei nawn lo. Cuticun ziangkim ah kan remcang thei lo ih kan ning a hang, kan riah a sia ngaingai. Cuvek tikcu caan ahhin Pathian na ttha ngaingai ahcun ziangruangah hibang thil harsa ka parah a thleng? tiah kan sut ko ding. A si lole Pathian na ttha kan lo ti laiah ziangruangah hivek riahsiatza, sunralnak, thinnaunak pawl ka parah na thleng ter? tiah a phunphunin thu kan suh caan a um ko ding. A sile kan biakmi Pathian a ttha taktak ahcun kan harsatnak a zate’n in hlonsak thluh ding tiah kan zum maw? Pathian ih tthatnak timi hi ziangmi bik a si timi teh kan ruat dah maw?
Nu le pa dinhmun in faate parih kan lungput um daan zoh hnik sehla. Nu le pa in faate pawl hi an nun sung hmuahhmuah zianghman ttuan lo ih um huahhi men sehla kan duhsakmi a si maw? Ei dingmi ei mai, in dingmi in thluh, cule itthat men, to men le um men an si tikah kan zoh men dah maw? Cutin kan zoh men a sile kan faate pawl kan duhdawt taktak tiah kan ti thei pei maw? Nu le pa ih duhdawtnak hi faate pawl um huahhi men ding kha a si maw? Cutin kan ret a sile nu le pa dam sung cu an nuam men ding. Asinain nu le pa thih hnu ah siseh, ttumsuk in farahnak a thlen tikah cuih faate pawl ih nun daan dingcu harsatnak hlir in a khat ko ding.
Leitlun mi hminthangzet pawl ih nun kan zohfel tikah farah zonzai tuar loin, an lamzin hi pangpar lamzin thluh a si maw? Hling le so lakah teh an feh dah lo maw? timi kan zoh tikah olte’n mi hminthang ah an cang dah lo. An nunnak lamtluan ah harsatnak nasazet an ton hnu ah an ruahban lomi nunnak lamzin parah an thleng ih sangsin ah an kaiso vivo ttheu a si. Leitlun awnmawi thiam hminthang Bethoven hi hnaset a si. Cuih a ttawnttaihnak lak ihsin leitlun hminthang tiang a thleng thei. Kum 1 te a si lai ihsin mitcaw a simi Finny Croby hi Pathian thangtthatnak hla fing 8000 tlun a phuah thei a si. Tlangleng hnattuantu menmen pakhat a simi Thomas Edison cu meisa a kangter pangmi thil pakhat ruangah a hnattuannak ihsin dawi a tong ko nain a netanak ah leitlun hminthang scientist pakhat ah a cang thei.
Minung nunnak timi cu nomnak hlir in a khat thluh lawngah Pathian a ttha tiah kan ti thei lo ding. Harsat le zonzaihnak a phunphun sungah Pathian cun minung ih kan theih ban lomi Pathian ih tumtahmi le ruahnak pawl cu neta ah a langsal ringring. Zumtu hmaisa pawl martar an tuar ngamnak khal cu Pathian tthatnak kha an nunnak muril sungin an tep ngah cio ruangah a si. Harsat zonzainak timi pawl cu nomnak le hahdamnak lamzin kan kaiso theinak ding hrangah kalbak pawl an si sawn.
2. Zalennak in pekmi sungah Pathian tthatnak a um.
Mi pakhat cu mawtaw a mawng rero laifangah rin lopin lamzin ih a fehtu mi pakhat a pah that pang. Cuih mawtaw mawngtu cu harsatnak nasazet a tong. Pathian a ttha taktah ahcun ziangruangah cuvek thil cang lo dingain Pathian in a kham lo a si pei? Cu te pawlih nunnak ziangruangah a hum lo a si pei? tiah thusuhnak a um thei.
Pathian ih tthatnak timi ih a hleicetnak cu minung hnenah zalennak a pek hngaimi kha a si. Kan hnenah zalennak in pekmi kha kan mang sal a ttul. Zalennak kan neih lo ahcun minung kan si lo dingih cet minung (robot) vek kan si ding. Pathian in minung kha cet minung veih in ret lomi hi a tthatnak cu a si. Minung hnenah zalenzet in tthencat theinak le duhhril theinak in pek. Cuih kan tthencatnak ruangah kanmah le kanmah harsatnak thleng dingah kan tuah aw. Cuih zalennak in pekmi pawl hmangin hi leitlun ah ral a phunphun kan suahpi.
Curuangah Pathian in zalennak in pekmi sungah a tthatnak ziang a si tiah thusut rero loin kanmai’ sambaunak ziang a si timi sawn kha kan zoh aw dingih thu kan sut aw dingmi a si sawn. Zalennak in pekmi sungah Pathian tthatnak a um ringring a si.
Thunetnak.
Nunnak ih harsatnak a sangbik cu “thinglamtah” tiah ruah a si dah. Sikhalsehla zumtu pawl hrangah cuih thinglamtah cu “Sui lukhuh” a si timi cu kan thei thluh ko. Pathian ih ruahnak ziangtluk a thuk ih a kau timi hi cing ringring uhsi. Pathian ih ruahnak le minung ih ruahnak ziangtik khalah a bang aw dah lo (Isa. 55:8-9). Bawipa ih tthatzia cu kanmah te ciar in kan tep ngah taktak lawngah a tthatnak kan theifiang thei ding. Rawl a thaw timi cu kan tep ngah hnu lawngah a thawtzia kan theifiang thei. Pathian ih tthatzia le duhdawtnak cu a tep ngah taktaktu pawl lawngin famkimte’n an theifiang thei. A tep ngahtu hrangah ziangvek harsatnak, zonzai retheinak, buainak pawl khalin Pathian ih duhdawtnak thawn a tthen thei dah lo ding (Rom 8:35). Kan biakmi Pathian cu thinglamtah thihnak ihsin thawhsalnak ah, harsatnak ihsin zalen luatnak ah, mitthli lak ihsin lungawi nomnak ah, riahsiatnak ihsin hnemnak le lungawinak ah in thlenpi thei umsun duhdawtu Pathian nung a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
February 14, 2015|Saturday|9:00 pm.
No comments:
Post a Comment