Baibal Caanghril:
Jesuh in, “Keimah thawn nan pehzom awknak thawngin hnangamnak nan ngah theinak dingah hi thu hi ka lo sim. Leilung in harsat tuarnak a lo pe ding. Sikhalsehla nan ral ttha uh; Leilung cu ka neh zo!” tiah a ti (Johan 16:33).
Baibal siarding: Johan 16:25-33.
Thuthoknak
Bawi Jesuh in himi thu a sim laiih a thinlung sungih um dingmi a lungput hi ziang a si pei, ti hi ruat hnik aw. A dingfelmi hruaitu pawl cun an dungthlun pawl hnenah ziangvek pawl an tong thei ding timi hi an sim cia ttheu. A dungthluntu pawl hi a rei hlanah harsatnak nasazet an tong cing ding timi hi Bawi Jesuh in a rak thei cia. Cuih an tong dingmi harsatnak tuar thei dingin timtuah cia ding a ttulzet ruangah himi ttongkam hi Bawi Jesuh in a rak simmi a si. Cuih ttongkam cu “hnangamnak” (remdaihnak) timi a si.
Bawi Jesuh ih pekmi “hnangamnak” hi a phundang zet. Daiziarzi, olzet le thinnuamzet ih ngah dingmi hnangamnak a si lo. Saam cangantu ih nganmi “Aw, thuro bangin thla nei ningla ka va duh so! Ka zam hlo dingih colhnak (hnangamnak) ka ngah ding na’n” tiin harsat tuar duh loin tlansan vek khal a si lo. Harsatnak sung lala ah ngah theimi hnangamnak phun khi Bawi Jesuh in a simmi a si.
1. Leitlunmi pawl ih pekmi hnangamnak vek a si lo.
Cuih hnangamnak cu Bawipa thawn pehzom awknak thawngin ngah dingmi a si. Bawipa thawn pehzom awknak hi hnangamnak ngah thei ding hrangah a muril a si. Cuih hnangamnak a um taktak timi cu hi hlan kum 2000 leng lo ah zumtu hmaisa pawlin an nunnak hmangin an langter zomi a si. Paul in cakuat a ngan tinte’n “Kan Pa Pathian le Bawipa Jesuh Khrih in zaangfahnak le daihnak lo pe hram seh” timi ttongfang a hmang ringring. Cumi ih a langtermi cu Paul ih ngahmi hnangamnak hi leitlunmi pawlih pekmi hnangamnak a si lozia a fiangter a si. Bawipa Jesuh Khrih thawngin ngahmi hnangamnak lawng hi a famkim ringring.
Hnangamnak timi cu amahte’n a ra dah lo, pakhat khat thawn kan pehzom awk tikah kan ngah theimi a si. Jesuh Khrih thawngin Pathian thawn kan pehzomnak a dik taktak ahcun rualpi le ral, huatmi le duhmi pawl thawn kan pawlkomnak a dik ve ding a si. Harsat tuarnak in Bawipai’ pekmi hnangamnak cu a hloter thei hrimhrim lo ding.
2. Harsatnak in a siatsuat thei lomi hnangamnak.
Bawi Jesuh in a dungthluntu pawl hnenah, ‘leitlun harsatnak phunkim ihsin nan luat thluh ding’ tiah a sim dah lo, thu khal a kam dah lo. Sikhalsehla cuih harsatnak pawl cu nan neh ding, ziangahtile keimah in ka neh zo tiah a sim sawn a si. Bawipa in kan hnenah nehnak tumpi in pek a si sawn. Rethei harsatnak a thlen tikah cuih harsatnak ih phenah ziangmi pawl kan tuar bet hrih pei tiah kan ruat tikah kan bei a dong ngaingai ttheu. Asinain Bawi Jesuh in ral ttha dingah in forh sawn a si. Leitlun ah harsatnak ziangtluk in kan tuar khal leh nehtu cu amah Bawi Jesuh a si. Bawi Jesuh thawn kan pehzom ringring ahcun a nehnak a ttawm ngahtu kan si. Nehnak thazaang thawn in ttuam famkim ding a si. Thihnak neh in a thosal zo ruangah cuih nehnak cu kannih zumtu pawlih kan nehnak a si ve. Cuticun Bawi Jesuh ih pekmi hnangamnak famkim cu kan nunnak ah kan congah theinak dingah a si. Bawipai’ pekmi hnangamnak cu harsatnak in a siatsuah thei lomi hnangamnak famkim a si. Minung pawlih pek awk theimi phun a si lo.
3. Ral tthatnak thawn a khatmi hnangamnak.
“Sikhalsehla nan ral ttha uh” timi Bawi Jesuh ih ttongkam hi thupi zetin kan lak dingmi a si. Micak, thazaang cakzet pakhat in mi ttihhrut le thazaang a malmi hnenih simmi men a si lo. Huhman nei, a cakmi Pa Pathian ih pekmi raltthatnak kha a si sawn. Bawi Jesuh in amai’ neihmi a huham cahnak le thazaang pawl kha kannih zumtu pawl hrangah raltthatnak dingah in pekmi a si. Zovek minung le ttihnungza an timi pawl cu zianghman ka siar lo, a ti ttheutu pawl khal harsatnak an ton taktak tikah cun bawmtu le ttanpitu ding an hawl, an hlam ttheu. Curuangah kannih zumtu pawl kan ral ttha ringring theinak dingah Bawi Jesuh in amai’ huham cahnak pawl in pe thluh. Ral ttha uh in timi ttongfang hmangin kan lam ah in ttanpi ringring ruangah a si. Bawipai’ pekmi hnangamnak cu raltthatnak thawn a khatmi hnangamnak a si. Ttihhrut lo dingin thazaang in pe ringringtu a si.
Thunetnak.
Leitlun kan nun sungah harsatnak kan tong ringring ko ding. Zumtu pawl nitin kan nunnak lam in hruai ringringtu cu ziangkim tithei, huham cahnak thawn a khatmi Pathian a si. Amah in kan nunnak lamtluan ah cat loin in hruai ringring a si timi hi kan theifiang taktak ahcun kan ral a ttha thei ding. Cuticun kan nunnak ah hnangamnak thawn kan khat thei ringring ding a si. Cuih hnangamnak cu leitlun minung pawl ih pek theimi a si lo. Rethei harsat tuarnak ih dawnkham theimi khal a si fawn lo. Bawi Jesuh ih cahnak rinsan in ral tthatnak thawn a khatmi hnangamnak a si. Kan biakmi Pathian cu leitlun kan buainak, harsatnak, ttihphannak ziangkim hnakin a cak sawn ih a tum sawn a si timi kha kan theifiang taktak a ttul. Cutin kan theifiang taktak ahcun kan fehnak ding lamtluan ah harsatnak ziangvek kan tuar khalle hnangamte’n in fehpi vivo ding a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
January 24, 2015|Saturday|11:50 pm.
Jesuh in, “Keimah thawn nan pehzom awknak thawngin hnangamnak nan ngah theinak dingah hi thu hi ka lo sim. Leilung in harsat tuarnak a lo pe ding. Sikhalsehla nan ral ttha uh; Leilung cu ka neh zo!” tiah a ti (Johan 16:33).
Baibal siarding: Johan 16:25-33.
Thuthoknak
Bawi Jesuh in himi thu a sim laiih a thinlung sungih um dingmi a lungput hi ziang a si pei, ti hi ruat hnik aw. A dingfelmi hruaitu pawl cun an dungthlun pawl hnenah ziangvek pawl an tong thei ding timi hi an sim cia ttheu. A dungthluntu pawl hi a rei hlanah harsatnak nasazet an tong cing ding timi hi Bawi Jesuh in a rak thei cia. Cuih an tong dingmi harsatnak tuar thei dingin timtuah cia ding a ttulzet ruangah himi ttongkam hi Bawi Jesuh in a rak simmi a si. Cuih ttongkam cu “hnangamnak” (remdaihnak) timi a si.
Bawi Jesuh ih pekmi “hnangamnak” hi a phundang zet. Daiziarzi, olzet le thinnuamzet ih ngah dingmi hnangamnak a si lo. Saam cangantu ih nganmi “Aw, thuro bangin thla nei ningla ka va duh so! Ka zam hlo dingih colhnak (hnangamnak) ka ngah ding na’n” tiin harsat tuar duh loin tlansan vek khal a si lo. Harsatnak sung lala ah ngah theimi hnangamnak phun khi Bawi Jesuh in a simmi a si.
1. Leitlunmi pawl ih pekmi hnangamnak vek a si lo.
Cuih hnangamnak cu Bawipa thawn pehzom awknak thawngin ngah dingmi a si. Bawipa thawn pehzom awknak hi hnangamnak ngah thei ding hrangah a muril a si. Cuih hnangamnak a um taktak timi cu hi hlan kum 2000 leng lo ah zumtu hmaisa pawlin an nunnak hmangin an langter zomi a si. Paul in cakuat a ngan tinte’n “Kan Pa Pathian le Bawipa Jesuh Khrih in zaangfahnak le daihnak lo pe hram seh” timi ttongfang a hmang ringring. Cumi ih a langtermi cu Paul ih ngahmi hnangamnak hi leitlunmi pawlih pekmi hnangamnak a si lozia a fiangter a si. Bawipa Jesuh Khrih thawngin ngahmi hnangamnak lawng hi a famkim ringring.
Hnangamnak timi cu amahte’n a ra dah lo, pakhat khat thawn kan pehzom awk tikah kan ngah theimi a si. Jesuh Khrih thawngin Pathian thawn kan pehzomnak a dik taktak ahcun rualpi le ral, huatmi le duhmi pawl thawn kan pawlkomnak a dik ve ding a si. Harsat tuarnak in Bawipai’ pekmi hnangamnak cu a hloter thei hrimhrim lo ding.
2. Harsatnak in a siatsuat thei lomi hnangamnak.
Bawi Jesuh in a dungthluntu pawl hnenah, ‘leitlun harsatnak phunkim ihsin nan luat thluh ding’ tiah a sim dah lo, thu khal a kam dah lo. Sikhalsehla cuih harsatnak pawl cu nan neh ding, ziangahtile keimah in ka neh zo tiah a sim sawn a si. Bawipa in kan hnenah nehnak tumpi in pek a si sawn. Rethei harsatnak a thlen tikah cuih harsatnak ih phenah ziangmi pawl kan tuar bet hrih pei tiah kan ruat tikah kan bei a dong ngaingai ttheu. Asinain Bawi Jesuh in ral ttha dingah in forh sawn a si. Leitlun ah harsatnak ziangtluk in kan tuar khal leh nehtu cu amah Bawi Jesuh a si. Bawi Jesuh thawn kan pehzom ringring ahcun a nehnak a ttawm ngahtu kan si. Nehnak thazaang thawn in ttuam famkim ding a si. Thihnak neh in a thosal zo ruangah cuih nehnak cu kannih zumtu pawlih kan nehnak a si ve. Cuticun Bawi Jesuh ih pekmi hnangamnak famkim cu kan nunnak ah kan congah theinak dingah a si. Bawipai’ pekmi hnangamnak cu harsatnak in a siatsuah thei lomi hnangamnak famkim a si. Minung pawlih pek awk theimi phun a si lo.
3. Ral tthatnak thawn a khatmi hnangamnak.
“Sikhalsehla nan ral ttha uh” timi Bawi Jesuh ih ttongkam hi thupi zetin kan lak dingmi a si. Micak, thazaang cakzet pakhat in mi ttihhrut le thazaang a malmi hnenih simmi men a si lo. Huhman nei, a cakmi Pa Pathian ih pekmi raltthatnak kha a si sawn. Bawi Jesuh in amai’ neihmi a huham cahnak le thazaang pawl kha kannih zumtu pawl hrangah raltthatnak dingah in pekmi a si. Zovek minung le ttihnungza an timi pawl cu zianghman ka siar lo, a ti ttheutu pawl khal harsatnak an ton taktak tikah cun bawmtu le ttanpitu ding an hawl, an hlam ttheu. Curuangah kannih zumtu pawl kan ral ttha ringring theinak dingah Bawi Jesuh in amai’ huham cahnak pawl in pe thluh. Ral ttha uh in timi ttongfang hmangin kan lam ah in ttanpi ringring ruangah a si. Bawipai’ pekmi hnangamnak cu raltthatnak thawn a khatmi hnangamnak a si. Ttihhrut lo dingin thazaang in pe ringringtu a si.
Thunetnak.
Leitlun kan nun sungah harsatnak kan tong ringring ko ding. Zumtu pawl nitin kan nunnak lam in hruai ringringtu cu ziangkim tithei, huham cahnak thawn a khatmi Pathian a si. Amah in kan nunnak lamtluan ah cat loin in hruai ringring a si timi hi kan theifiang taktak ahcun kan ral a ttha thei ding. Cuticun kan nunnak ah hnangamnak thawn kan khat thei ringring ding a si. Cuih hnangamnak cu leitlun minung pawl ih pek theimi a si lo. Rethei harsat tuarnak ih dawnkham theimi khal a si fawn lo. Bawi Jesuh ih cahnak rinsan in ral tthatnak thawn a khatmi hnangamnak a si. Kan biakmi Pathian cu leitlun kan buainak, harsatnak, ttihphannak ziangkim hnakin a cak sawn ih a tum sawn a si timi kha kan theifiang taktak a ttul. Cutin kan theifiang taktak ahcun kan fehnak ding lamtluan ah harsatnak ziangvek kan tuar khalle hnangamte’n in fehpi vivo ding a si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
January 24, 2015|Saturday|11:50 pm.
No comments:
Post a Comment