Baibal Caanghril:
“Kan Bawipa le in Runtu Jesuh Khrih zaangfahnak le amah theihnak sungah tthang vivo uh” (1 Pit. 3:18).
Thuhmaihruai
A thi maw, a si lole a nung maw timi kan thei duh a sile a tthang maw a tthang lo timi kan cekfel hmaisa a ttul. A nungmi a si ahcun a tthang tengteng ko ding. Tthannak timi hi nunnak hrangah um lo theih lomi sinak pakhat a si. Zumtu kan si kan ti awk tikah kanmah kel kan awh ringring ahcun kan tthang lo tinak a si. Zumtu cu nitin tthang vivo dingah siam thar ringringmi kan si a ttul. Cutik lawngah zumnak nung ah kan pitling thei ding a si.
1. Tthannak
Minung kan nunnak kan zoh tikah kan taksa ruangpi hi kum kul tlun kan kim tiang kilkip in a tthang rero. Kan taksa ruangpum ih a tum a tetnak ding zat a thleng tiang a tthang hmaisa rero. Cuticun tlangval, fala kan si hnu ahcun kan taksa tthannak a reh vivo. Kan taksa tthannak lam reh hmansehla kan thinlung lam cu nitin a tthang rero hrih dingmi a si. Cutin a tthang lo ahcun pitling nun kan nei thei lo dingih khuimi zawnah maw palhnak a um tinak a si. Cuvek thotho in kan theihnak khal hi nitin a tthang vivo dingmi a si. Kan theihnak a tthan vivo theinak dingah kan pianpi thluak kha kan hmang thei. Kan thluak a tthan vekin kan theihnak khal a tthang vivo. Thlarau lam kan zoh sal tikah kan taksa, kan thinlung put, kan theihnak a zate’n hmang thiam thluh ding a ttul a si.
A hleice in Jesuh Khrih theihnak sungah tthang le pitling vivo a ttul. Thlarau lam tthannak timi cu thlarau lam ih kan ttulmi a zatein tuahsuak khi a si. Cutik lawngah thlarau ih rah pawl kha famkimtein kan co ngah thei ding (Gal. 5:22). Zumtu pakhat kan pianthar hnu ah nitin tthang rero ding kan ttul. Thlarau nun ah kan tthang vivo a ttul. Cuticun thlarau thawn pehzommi ruahsannak lawng si loin borhhlawhnak, siatralnak le kan nun a balmi pawl cu a thiang vivo dingin kan zuam a ttul a si.
2. Zaangfahnak sungih tthannak
Zumtu kan si hnuhnu cu Jesuh Khrih ih zaangfahnak sungah tthan rero ding kan ttul. Jesuh Khrih ih thinlung put in kan nunnak a luah tik lawngah Jesuh Khrih ih zaangfahnak sungah tthang vivo dingmi kan si. Cuticun kan thinlung sungah lungawinak le remdaihnak a um thei ding (Rom 15:13; Efe. 4:13; Fil. 4:7).
Kan thinlung muril sungah a zaangfahnak kan co nganmi vekin thlarau ih rahsuahmi pawl cu a langfiang vivo ding a si. A zaangfahnak kan thei deuhdeuh ahcun thlacamnak, Baibal siarnak, thinlung sungin tthencat thiamnak pawl khalah tthang vivo ding. Asinain ziangtluk Baibal siar in thla kan cam rero khalle kan cangvainak le kan tuahnak ah a tthang lo ahcun zianghman san a tlai lo. Pathian ih zaangfahnak kan theifiang ih kan thinlung sungin hlunghlaizet in kan co ngah ahcun hlawknak tampi kan ngah ding. Kan innhnen khal kan duhdawt thiam vivo ding. Kan nun ih a ummi cu kan umpi men thei lo dingih midang hnenah hlawm duhnak a suahpi ding.
Thlarau lam a pitlingtu hrangah hmuitinmi cu a famkimnak hmun a si vekin cuih hmuitin thleng dingin a tlan rero ding a si. Ziangtluk kan zuam rero khalle kan famkim thluh thei dah lo ding. Pathian khalin tutiang na famkim thei dah lo tiah mawh in thluk dah cuang lo ding. Sikhalsehla “hmuitinmi lamah zuam man ngah dingin dingtein ka tlan” timi Paul ih ttongkam vekin kan zuam ringring ding a ttul (Fil. 3:14).
Kan nunnak kan zohkir salin a hlan hnakin a tu ah thlarau lam thu ah ka tthangso maw? Pathian ih zaangfahnak teh kan hmuthiam, kan tep ngah taktak maw? A hlan hnakin Jesuh Khrih theihnak sungah kan tthang taktak maw? tiah mah le mah sut aw ringring ding a ttul. Pathian hnen ihsin a zaangfahnak laksawng kan co ngahmi pawl cu midang hrang khalah hlawm ve ding a ttul. Cuticun Pathian sunlawinak a lang vivo thei ding a si.
3. Jesuh Khrih theihnak sungah tthannak.
Jesuh Khrih theihnak sungah ziangtin kan tthang thei pei? tiah thusuhnak a um ahcun Jesuh thawn pehparmi ca thianghlim pawl siarnak in siseh, Jesuh thu a theitu pawlih simmi pawl tthatein kan ngaithiam a ttul. Mi pakhat khat thawn theih awk ding kan duh ahcun cumi nu/pa thawn hmaitonnak neih hmaisa a ttul. Amah thawn biak-sawn aw ding a ttul. Amah thawn ttuan tlang hmaisa a ttul. Cutin an nun daan kan thei ngahmi a um dingih pakhat le pakhat theithiam awknak a um hnu ah hna kan ttuan tlang thei ding. Thiamnak tinkim hi zir neknek hmaisa hnu lawngah kan thiam thei. Cuih kan thiammi kha hngilh lo dingin cat loin hman ringring a ttul.
Cuvek thotho in Jesuh Khrih theihnak sungah kan tthan theinak dingah Jesuh thawn a tlangleng dahtu tirhthlah pawl hnenin kan zir a ttul. Cumi kan zir famkim theinak dingah Ca Thianghlim hi kan siar ringring a ttul. Cuticun Jesuh Khrih theihnak sungah kan tthang vivo dingih kan nunnak le kan ziangkim Jesuh kut ah kan ap thei ding a si. Jesuh kut sungah kan nunnak pumhlum kan ap thei taktak ahcun nun hnangamnak khal kan tthang vivo ding a si.
Jesuh Khrih theihnak sungah tthan theinak lamzin pakhat a um hrih. Cumi cu kanmah le Jesuh Khrih karlak ah pehzomnak thuk kan neih hnu ah midang hnenah sim le rel ding hi a si. Ziangahtile cazirhtu cun a thiamnak pawl mi a zir, a sim tikah amai’ theihnak khal a karh deuhdeuh. Kan theihmi midang hnenah kan hlawm deuhdeuh le kanmai’ theihnak khal a tthang deuhdeuh ding a si.
Thunetnak.
Curuangah Jesuh Khrih theihnak sungah kan tthan ringring theinak dingah Jesuh thawn pehzom awin amah thawn hmaiton in kan theifiang hmaisa a ttul. Cule midang hnenah sim le rel ringring ding khal a ttul. Paul in, “Nauhak ka rak si lai ahcun ka ttong daan, ka thil hmuh daan le ka thuruah daan cu an nauhak ngaingai. Asinain atu ahcun ka upa thlangih nauhak daan cu ka thlun duh nawn lo” a ti (1 Kor. 13:11). A nungmi kan si ahcun nitin kan nunnak ah tthang vivo dingmi kan si. Jesuh Khrih theihnak sungah khal tthang vivo dingmi kan si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
February 22, 2015|Sunday|8:00 am.
“Kan Bawipa le in Runtu Jesuh Khrih zaangfahnak le amah theihnak sungah tthang vivo uh” (1 Pit. 3:18).
Thuhmaihruai
A thi maw, a si lole a nung maw timi kan thei duh a sile a tthang maw a tthang lo timi kan cekfel hmaisa a ttul. A nungmi a si ahcun a tthang tengteng ko ding. Tthannak timi hi nunnak hrangah um lo theih lomi sinak pakhat a si. Zumtu kan si kan ti awk tikah kanmah kel kan awh ringring ahcun kan tthang lo tinak a si. Zumtu cu nitin tthang vivo dingah siam thar ringringmi kan si a ttul. Cutik lawngah zumnak nung ah kan pitling thei ding a si.
1. Tthannak
Minung kan nunnak kan zoh tikah kan taksa ruangpi hi kum kul tlun kan kim tiang kilkip in a tthang rero. Kan taksa ruangpum ih a tum a tetnak ding zat a thleng tiang a tthang hmaisa rero. Cuticun tlangval, fala kan si hnu ahcun kan taksa tthannak a reh vivo. Kan taksa tthannak lam reh hmansehla kan thinlung lam cu nitin a tthang rero hrih dingmi a si. Cutin a tthang lo ahcun pitling nun kan nei thei lo dingih khuimi zawnah maw palhnak a um tinak a si. Cuvek thotho in kan theihnak khal hi nitin a tthang vivo dingmi a si. Kan theihnak a tthan vivo theinak dingah kan pianpi thluak kha kan hmang thei. Kan thluak a tthan vekin kan theihnak khal a tthang vivo. Thlarau lam kan zoh sal tikah kan taksa, kan thinlung put, kan theihnak a zate’n hmang thiam thluh ding a ttul a si.
A hleice in Jesuh Khrih theihnak sungah tthang le pitling vivo a ttul. Thlarau lam tthannak timi cu thlarau lam ih kan ttulmi a zatein tuahsuak khi a si. Cutik lawngah thlarau ih rah pawl kha famkimtein kan co ngah thei ding (Gal. 5:22). Zumtu pakhat kan pianthar hnu ah nitin tthang rero ding kan ttul. Thlarau nun ah kan tthang vivo a ttul. Cuticun thlarau thawn pehzommi ruahsannak lawng si loin borhhlawhnak, siatralnak le kan nun a balmi pawl cu a thiang vivo dingin kan zuam a ttul a si.
2. Zaangfahnak sungih tthannak
Zumtu kan si hnuhnu cu Jesuh Khrih ih zaangfahnak sungah tthan rero ding kan ttul. Jesuh Khrih ih thinlung put in kan nunnak a luah tik lawngah Jesuh Khrih ih zaangfahnak sungah tthang vivo dingmi kan si. Cuticun kan thinlung sungah lungawinak le remdaihnak a um thei ding (Rom 15:13; Efe. 4:13; Fil. 4:7).
Kan thinlung muril sungah a zaangfahnak kan co nganmi vekin thlarau ih rahsuahmi pawl cu a langfiang vivo ding a si. A zaangfahnak kan thei deuhdeuh ahcun thlacamnak, Baibal siarnak, thinlung sungin tthencat thiamnak pawl khalah tthang vivo ding. Asinain ziangtluk Baibal siar in thla kan cam rero khalle kan cangvainak le kan tuahnak ah a tthang lo ahcun zianghman san a tlai lo. Pathian ih zaangfahnak kan theifiang ih kan thinlung sungin hlunghlaizet in kan co ngah ahcun hlawknak tampi kan ngah ding. Kan innhnen khal kan duhdawt thiam vivo ding. Kan nun ih a ummi cu kan umpi men thei lo dingih midang hnenah hlawm duhnak a suahpi ding.
Thlarau lam a pitlingtu hrangah hmuitinmi cu a famkimnak hmun a si vekin cuih hmuitin thleng dingin a tlan rero ding a si. Ziangtluk kan zuam rero khalle kan famkim thluh thei dah lo ding. Pathian khalin tutiang na famkim thei dah lo tiah mawh in thluk dah cuang lo ding. Sikhalsehla “hmuitinmi lamah zuam man ngah dingin dingtein ka tlan” timi Paul ih ttongkam vekin kan zuam ringring ding a ttul (Fil. 3:14).
Kan nunnak kan zohkir salin a hlan hnakin a tu ah thlarau lam thu ah ka tthangso maw? Pathian ih zaangfahnak teh kan hmuthiam, kan tep ngah taktak maw? A hlan hnakin Jesuh Khrih theihnak sungah kan tthang taktak maw? tiah mah le mah sut aw ringring ding a ttul. Pathian hnen ihsin a zaangfahnak laksawng kan co ngahmi pawl cu midang hrang khalah hlawm ve ding a ttul. Cuticun Pathian sunlawinak a lang vivo thei ding a si.
3. Jesuh Khrih theihnak sungah tthannak.
Jesuh Khrih theihnak sungah ziangtin kan tthang thei pei? tiah thusuhnak a um ahcun Jesuh thawn pehparmi ca thianghlim pawl siarnak in siseh, Jesuh thu a theitu pawlih simmi pawl tthatein kan ngaithiam a ttul. Mi pakhat khat thawn theih awk ding kan duh ahcun cumi nu/pa thawn hmaitonnak neih hmaisa a ttul. Amah thawn biak-sawn aw ding a ttul. Amah thawn ttuan tlang hmaisa a ttul. Cutin an nun daan kan thei ngahmi a um dingih pakhat le pakhat theithiam awknak a um hnu ah hna kan ttuan tlang thei ding. Thiamnak tinkim hi zir neknek hmaisa hnu lawngah kan thiam thei. Cuih kan thiammi kha hngilh lo dingin cat loin hman ringring a ttul.
Cuvek thotho in Jesuh Khrih theihnak sungah kan tthan theinak dingah Jesuh thawn a tlangleng dahtu tirhthlah pawl hnenin kan zir a ttul. Cumi kan zir famkim theinak dingah Ca Thianghlim hi kan siar ringring a ttul. Cuticun Jesuh Khrih theihnak sungah kan tthang vivo dingih kan nunnak le kan ziangkim Jesuh kut ah kan ap thei ding a si. Jesuh kut sungah kan nunnak pumhlum kan ap thei taktak ahcun nun hnangamnak khal kan tthang vivo ding a si.
Jesuh Khrih theihnak sungah tthan theinak lamzin pakhat a um hrih. Cumi cu kanmah le Jesuh Khrih karlak ah pehzomnak thuk kan neih hnu ah midang hnenah sim le rel ding hi a si. Ziangahtile cazirhtu cun a thiamnak pawl mi a zir, a sim tikah amai’ theihnak khal a karh deuhdeuh. Kan theihmi midang hnenah kan hlawm deuhdeuh le kanmai’ theihnak khal a tthang deuhdeuh ding a si.
Thunetnak.
Curuangah Jesuh Khrih theihnak sungah kan tthan ringring theinak dingah Jesuh thawn pehzom awin amah thawn hmaiton in kan theifiang hmaisa a ttul. Cule midang hnenah sim le rel ringring ding khal a ttul. Paul in, “Nauhak ka rak si lai ahcun ka ttong daan, ka thil hmuh daan le ka thuruah daan cu an nauhak ngaingai. Asinain atu ahcun ka upa thlangih nauhak daan cu ka thlun duh nawn lo” a ti (1 Kor. 13:11). A nungmi kan si ahcun nitin kan nunnak ah tthang vivo dingmi kan si. Jesuh Khrih theihnak sungah khal tthang vivo dingmi kan si.
Duhdawtnak le duhsaknak thawn,
Rev. CJ Hrang Hmung, PhD.,
Toungphila, Kalaymyo.
February 22, 2015|Sunday|8:00 am.
No comments:
Post a Comment