Baibal Caanghril:
“Thinsau
mi cu mifim a si. Asinain thin a tawi ahcun na aatnak khan a langter” (Thufim
14:29).
Thuhmaihruai:
Pathian in nitin kan nunnak ah lam in hruai ringring. Zumtu tampi
cu kan lamzin in hruaitu cu Pathian a siih amah ruangah ziangkim ah
hlawhtlingin kan um tiah lungawi thu kan sim ttheu. Sikhalsehla mi tampi cun
Pathian ih lamhruainak kha ziang siar loin kan hngilh mai ttheu. Vei hnih khat
cu kan nunnak ah zamrangzet ih thil tuah ttulmi tampi a um thei. Cuvek caan ah
kan thin a tawi deuh cuang men ding. Cutikah ttong lo dingmi, ttong ding a mawi
lomi le thinheng ttong ih kan ttongmi a um thei. Curuangah Pathian ih lamhruainak
dil ringring ding hi a ttulih a thupi ngaingai. Pathian lawngin kan hmailam kan
lamzin a thei thluh. Kan ttong dingmi pawl lawng si loin kan nunnak lamtluan ah
dik le felte’n ke kan kar vivo theinak dingah Pathian ih lamhruainak kha pelh
loin kan dil thiam ringring a ttul a si. Pathian ih lamhruainak ka co ringring
theinak dingah a tanglam thu pawl hi kan ttulmi pawl an si.
1.
Kan ttongkam ralring ding a ttul.
Midang thawn kan pehzom pawlkom tikah kan ttongkam pawl hi dingfel
le dik ding a thupi zet. Cumi hrangah Pathian ih lamhruainak a thupi zet. Pupa
ttongfim ah, “Ttongkam khat Siapi man” tiah a um ih kan ttongkam a thupitzia
simmi a si. Kan ttongkam ruangah mi thinlung kan neh thei; mi thinheng dingah
kan tuah thei. Thufim ngantu in, “Awkaa neem ih thulehnak in thinhengnak a
daiter. Asinain ttong hrang in thinhengnak a suahter sin. Mifim pawl ih lei in
fimnak a karhter. Mi aa pawlih kaa in aatnak a suahter” tiah ralrinnak in pek a
si (Thufim 15:1-2). Curuangah ttongkam ralring thei dingah Pathian hruainak kan
ttul ringring. A dik lomi, thuphan ttongkam pawl kan hmang ahcun harsatnak
pakhat hnu pakhat kan tong tengteng ding.
Ruat hmaisa loih kan ttongmi in mi a siatsuah theiih thinnatnak le
ral awknak tiang a suahpi thei. Mifim thuruat thei cun mai’ ttongmi theifel in
man a neihzia theithiam kan ttul. Kan ttongmi awkaa ruangah midang hrangah
sunral ter lo ding a thupi zet. Kan ttongmi hi duhdawtnak ttongkam si ter in, a
thi cuahcomi le thinnaumi pawl hrangah thazang pekmi ttongkam si ter ding a
ttul zet. “Ruahnak nei cuca lo ttongkam cun nam vekin thuk zetin mi a sun.
Asinain mifim ih ttongkam in hma a damter” (Thufim 12:18). Pathian ih duhmi cu
thuphanper a si loih thudik ttongkam lawng a si: “Thuphan in nunnak caan tawite
a nei. Asinain thudik cu kumkhua in a nung” (Thufim. 12:19). Kan ttongkam (lei)
hi a thupi zet ruangah fimkhur in hmang thiam ding a ttul (Jeim 3:5-10).
2.
Neihnak lam ah dingfel ding a ttul.
Bawi Jesuh in, “… mi pakhat ih nunnak taktak cu ziangtluk milian a
si hmanah, a thilri neihmi ahhin a um lo” tiah a sim (Luka 12:15). Leitlun mi
tampi cun minung pakhat ih a man kan tan tikah a neihmi thilri pawl zohin thu
kan rel ttheu. A thupinak tampi a um ko nain cumi hnakih thil thupi sawn tampi
a um. Thilri tampi nei in milian zetih um khal sehla a thinlung put hi a thupi
sawn. Mai’ zawn lawng ruatih neihmi thilri midang hrang a ttawm siang ve lo
ahcun a neih man zianghman a tthahnem lo. Lungput ttha lo milian hnakin
duhdatnak thinlung ttha nei mifarah thawn pawlkom hi a ttha ih a thupi sawn, a
man khal a khung sawn. “Duhdawtmi pawl thawn hanghnah hangrah ei cu huatawknak
hmun ih sa thaw bike i hnakin a thaw deuh” (Thufim 15:17). Mai’ zawn lawng
ruattu milian pawl cu a phenah ral an nei ringring. An hrangah phurrit a si.
Curuangah Bawi Jesuh in, “Tlap le nget ih a siatsuah thei lonak le rukru pawlin
an buah ih an ruk thei lonak vancung ram ah nan sumsaw cu khawl sawn uh,” tiah
in tinak a si (Mat. 6:19-20).
Zumtu hrangah thilri neih ding hi a thupi zetmi a si ko. Minung
kan si sung cu neih tam dingin zuam rero ding a ttulmi a si. Sikhalsehla cuih
kan neihmi pawl hi kan phurrit ah cang ter lo ding a thupi ngaingai. Nei ngah
lo ding phang ih duhham tukin midang thil tiang lon tum, dik zo zet ih ngah
dingin tawlrel ih kan um ahcun duh um lomi buainak a suahpi thei. Rem lonak le
huat awknak a suak thei. “Dik lozet ih hlawknak ngah na tum ahcun na innsang na
buaiter ding. Nawhthuh lak hlah awla na san a sau ding” (Thufim 15:27).
Curuangah Saam cangantu in, “Na Biakinnpi sungih ni khat um cu hmundang ih ni
thawng khat um hnakin a ttha sawn. Ka Pathian ih inn sangka kil cu mi ttha lo
pawl inn sungih um hnakin ka duh sawn” tiah a ti (Saam 84:10).
3.
Kan nun daan dingfel ding a ttul.
Mifim thuruat theitu cu zu le sa, zuk le hmawm ih sal ah a tang
dah lo (Isaiah 55:1-2). Midang thawn khal an to aw dah loih amai’ tuah le ttuan
dingmi parah zuamzet in hna a ttuan. Midang ih ruahnak parah a ttawmpi theiih
tesinfa hrang tiang thilttha tuah in a um theitu a si (Thufim 20:1-7 tiang siar
thluh aw). Bawipa cun kan thinlung sungih ruahnak zohin kan cangvaih le nun
daan ah thu a rel ttheu: “Zokhal in mah ih nun daan cio hi a dik in kan ruat.
Sikhalsehla Bawipa cun kan thinlung a zoh” (Thufim 21:2). Samuel in David hriak
a culh zik tikah a u Eliab cu Samuel kiangah a um ko. Sikhalsehla Bawipa in,
“Hi pa hi mi sangzet le mi piangzet sihmansehla zoh duh hlah. Amah cu ka hnon
zomi a si, ziangahtile milai zoh daan in kei Bawipa cun ka zoh lo. Milai cun a
lenglam thil nan zoh, kei cun an thinlung ka zoh a si,” a ti (1 Sam. 16:7).
“Dingnak le a dikmi tuah cu raithawinak hnakin Bawipa in a duh sawn” (Thufim
21:3). Bawipa ih duhmi cu, “A dingmi tuah le zaangfahnak tlaihsan le tangdorte
in Pathian thawn fehtlang khi a si” (Mikah 6:6-8). Curuangah kan nun daan
dingfel dingin kan zuam cio a ttul.
Thunetnak.
Zumtu nitin kan fehnak lamzin ah Pathian ih lamhruainak a tel
ringring ding hi a thupi bik miangmo a si. Curuangah Bawipai’ Thlarau
Thianghlim in nitin kan nunnak ah lamzin in hruai ringring theinak dingah Bawipa
hrang hmun kian kan thiam a ttul. Bawipa in kan nun in uk lawngah Amai’ duhnak
vekin in fehpi vivo ding. Kanmai’ duhnak hnakin Pathian ih lamhruainak parah
lungkim thiamtu si dingah kan nun kan ap awk ringring a ttul. Thinsaule
supawknak thawn Pathian ih hruaimi kan si ding a ttul. Siartu zate parah
Pathian ih lamhruainak a thar in thleng ringring seh. Amen.
Duhdawtnak le duhsaknak
thawn,
Rev. CJ Hrang Hmung, PhD.,
Toungphila, Kalaymyo.
January 11, 2015|Sunday|9:00 am.
No comments:
Post a Comment