ZUMTU IH TTUANVO PAWL

Baibal siarding: 1 Timote 2:1-15.

Thuhmaihruai

Kawhhran sungah zumtu pawl pitlin tthanlennak hrangah a thupizetmi ttuanvo kan nei. Cumi cu thlacamnak a si. Thlacamnak thu cu mi tampi in kan thei zo ruangah tampi kan rel nawn lo ding. Hi hmun ah kan tarlang duhmi cu Timote cakuat sungih a simmi zumtu ih ttuanvo pawl hi a si. Paul in Timote hnenih a simmi a si vekin zumtu nangmah le kaimah hnen khalah ttuanvo in pek mi a si. Zumtu pawlin thla kan camsak dingmi pawl cu:-

1. Mi hmuahhmuah hrangah thlacam ding.
Paul in Timote hnenah caang khatnak sungah Pastor pakhat sinak diktak ih nung in zumtu hmuahhmuah hrangah thlacam dingin ttuanvo a pekih a forh hngai. Cumi cu nitin pelh loih tuah dingmi pawl an si:
(1) Pathian thu ah ciah aw in minung zate hrangah thlacam sak ding.
(2) Sungtel pawl le zumtu hmuahhmuah hrangah thlacam sak ding; a hleicei in Pathian hnenah puithiam dinhmun la in thlacam sak ding.
(3) Pastor pakhat dinhmun in Kawhhran le thuthangttha hrangah thlacam ding, ti pawl hi an si. Thlacamnak kipah a cang thei tawk in hotu dinhmun ah telpi ringring dinghi a thupi ngaingai.

Thlacamnak hi hnattuan pakhat a si. Pathian le zumtu karlak ih a thupbik pehzom awknak a si. Kan ttulmi pawl Pathian hnenah theihter in amah ih lamhruainak parah tthum aw ding a ttul. Hmun khiah nei ih thlacam a thupi vekin ziangvek lai khalah khui hmun khal in thlacam ding a ttul ih a thupizet. A thupi bik ah Pathian thawn pehzomawknak dik neih ding a thupi ngaingai. Pastor cun zumtu le sungtel pawl hrangah nasazet in thlacam sak a ttul. Pastor ih a hnattuan tumpi pakhat cu thlacam hi a si. Amai’ pumpak ih ttulmi le zumtu zate ih ttulmi pawl cu catbang loin Pathian hnenah dil in, theiter in Satan ral donak ah thlacam tengteng a ttul. Cuihtlun ah Pastor cun kawhhran sung thlacamnak ah a hohat ding a ttul. Zingpit thlacam, thlacam bur, cikcin thlacam tivek pawlah taimak suah in hotu ding a si (Mat. 5:44; 7:7; Luk. 18:1; Fil. 4:6-7; 1 Thess. 5:17; Jeim 5:16-18).

2. Ram uktu pawl hrangah thlacam ding.
Siangpahrang le ram sung hotu upa pawl hrangah thlacam uh, timi khal hi a thupi zetmi a si. Mi zovek khalin thlacam seh, tinak a si. Ram uktu pawlin duhdawtnak le zawnruahnak thawn rampi an uk tik lawngah mipi pawl khal thinnomnak, daihnak, zalennak pawl kan ngah thei ding. Paul in zumtu pawl hnenah Rom ram uktu Nero siangpahrang san lai ah siangpahrang le uktu bawi pawl hrangah thlacam dingin a fial. Ram uktu timi hi Pathian lungkim ih hrilmi lawngin uk theih a si. Acozah uktu timi hi Pathian thu locun an dinghnget thei lo tihi thei ringring in thlacam sak ding a thupi ngaingai. Rampi sungah a dai ih, a tthangso tikah ramsung um mipi hrangah tthansonak le zalennak a um. Kawhhran hi Pathian ih duhdawtmi minung pawl hrangah tthatnak a tuahtu ding a si. Mipi zate thinlung, taksa, thlarau ah lungawi hnangam ih a um ringring theinak dingah zumtu pawl in thlacam sak ding ttuanvo tumpi kan nei. Cuticun mai’ innhnen nan duhdawt pei tiih Jesuh in cah ta mi vekin kan minungpi a simi uktu pawl hrangah thlacam sak ding kan ttul. Pathian kan duhdawt cun kan minung pi duhdawt in thlacam sak ding a thupi (Thuf. 11:11; Rom 13:1; Tit. 3:1; 1 Pit. 2:17).

3. Mi hmuahhmuah rundamnak ngah dingah thlacam ding.
Mi hmuahhmuah thutak thei haisehla, rundammi si haiseh ti a duhtu in Rundamtu Pathian a lung a awi ding, tiah Paul in a ti. Pathian thutak hi mihmuah hrangah a si ruangah a hmaisabik ah thlacamsaknak thawn hramthok a ttul. Thlacam sak ding a ttulnak (5) a um ih cupawl cu:
(1) Pathian cu rundamtu a si ruangah minung hmuahhmuah khal rundamnak coter ttheh a duh. Rundamnak co lawng si loin thutak theih ter thluh a duh. Jesuh Khrih cu lamzin a si. Nunnak le thutak khal a si. Khrih tel lo cun zohman Pathian hnenah a thleng lo ding (Joh. 14:6). Curuangah minung zate hrangah thlacam sak ding hi kawhhran tin, zumtu tin ih ttuanvo a si (2 Pit. 3:9; Eze. 33:11).
(2) Lei le van a sersiamtu Pathian pakhat lawng a um. Pathian tampi a um lo. Pathian cu minung hmuahhmuah ih Pathian a si. Midang in an thei lo nain minung hmuahhmuah sersiamtu Pathian amah lawng a um a si. Vancung khal pakhat lawng a um ih a fehnak lamzin khal pakhat lawng a si. Minung zate in sersiamtu Pathian hnen lawngah thlacam cio ding kan ttul (1Kor. 8:4; Efe. 4:6; 1 Joh. 5:7).
(3) Jesuh Khrih lawng hi cuih rundamnak hrangah “remnak tuahtu minung palai” a sizia theih ter a duh. Remnak tuahtu palai um loin kan duhnak hmun ah kan thleng thei lo ding. Lamzin a um lo cun feh a theih lo. Jesuh Khrih thawngin kan lamzin in ongsak ih Pathian hnenah kan thleng thei. Kan hrangah Jesuh Khrih in thla in camsak rero (Rom 8:34). Thinglamtah lamzin cu inn kan thlen theinak dingah lam in hmuhtu a si (Joh. 1:14; 14:6; 1 Tim. 2:5; Heb. 8:6; 9:15; 924; 1 Joh. 2:1). Remnak tuahtu palai timi cu lamttang nei loin a laifang ah dingte in ding daan a si. Jesuh Khrih cu minung a si lawng si loin minung pawl kan sualnak in thlahsak thluhtu Pathian khal a si.
(4) Cuih “remnak tuahtu minung palai” a simi Jesuh Khrih cu minung hmuahhmuah rundam dingin a nunnak liamin a thi. Sualnak a nei lomi Jesuh Khrih cu sualnak a neimi minung pawl hrangah a thi. Thungai kan sim a sile sualnak a neimi minung pawl hi thinglamtah parah thlai tuar dingmi kan si. Minung kanmah cio ih sualnak ai ah midang in thihsak a theih lo. Jesuh Khrih siar lo in rundam theitu dang an um lo. Curuangah kan sual ai ah thihnak a tuartu Jesuh Khrih ih duhdawtnak cu mi hmuahhmuah in an hmu thei ih, rundam an ngah thluh theinak dingah thlaza kan camsak a ttul. Kumkhua san a thlen tikah Pathian thawn kumkhua ih um thei dingin thlaza camsak kan ttul (Mat. 20:28; Rom 3:24; 1 Kor. 6:20; 7:23; Efe. 1:7; Kol. 1:14; Heb. 9:15; 2 Pit. 1:18-19).
(5) Pathian hnattuantu pawl in rundamnak thu lawng phuang ding a ttul a si. Paul in zumnak thu le thudik phuangtu palai kan si. Cuih thu cu Zentail mi le zum lotu pawl hnenah phuang ding ah in thlah a si, a ti. Curuangah Pathian hnattuantu cun thuthangttha phuang ding, tirhthlah pawl vekin ttuan ding le zirhtu hnattuan pawl khal ttuan cih ding a ttulzia a lang ter. Paul bangtuk in thuthangttha phuangin, Tirhthlah pawl vekin Pathian thu zaiter in ttuan a ttul. Zumtu pawl an pitling theinak dingah zirhnak thawn bet a ttul.

4. Kut thlirin thlacam hai seh.
Pathian biaknak hmunkip ah mipa in thlacam haiseh ti ka duh. Pathian hnenah pum a pe awmi thinhengnak le thu-el awknak um lotein mipa in an kut thlir in thla cam haiseh, a timi pawl hi Kawhhran hruaitu mipa pawlih ttuanvo tumpi pawl tla an si. Hitin a simmi hi mipa pawl thlacam an mal deuh ruangah a si thei. Pathian ram karhzainak ding hrangah thinlung tak tein thlacam phahin ttuan ding a ttul a si. El-awk rero le tisa nun tukih hruai awk ding a si lo. Kawhhran sungah Pastor le Kawhhran Upa pawl siseh, mipi thawn siseh zumtu zatein khat le khat upat aw in kut-ong zom awte’n thlacam phah in ttuan tlang ding ṭuanvo tumpi kan nei.

Tuisun ah kawhhran hruaitu mipa tampi cu Kawhhran hnattuan le thuthangttha karhzainak hnattuan pawl ah mah rori tel loin a leng lam ihsin mi soisel a hmangtu kan tampi. Kan tel khalle thinhengnak, thu-el awknak pawl thawn khawvelmi pawl bangin kan nung. Cuti si sawn loin mipi thawn hmunkhat ah thlacamnak neiin, mi va sawm ih hmunkhatte’n Pathian hmaiah kutthlir in thlacam ding a ttul. Pathian thawn pehzom awknak ding hrangah thinlung tangdornak neih a ttul. Pathian hmai ah kut thlir kan timi hi kanmah le kanmah zianghman ka si lo, tiih Pathian hmai ih tangdornak langternak a si. Kut kan thlir tik khalah tangdornak thinlung kan nei taktak a ttul. Ti aw ter men a ngah lo. Pathian ih ho mi hnuai ah um ding a ttul. Pathian in hram in thoksak dingih cin le daan tthate nei in ttuan tlang ding a ttul ngaingai.

Duhdawtnak le duhsaknak thawn,

Rev. CJ Hrang Hmung, Ph.D.,
Toungphila, Kalaymyo.
November 2, 2014|Sunday|4:40 pm