Baibal Caanghril:
“Fimkhurte in um uh, nan zumnak sungah hngetzet in ding uh; ral ṭha le cakzet in um uh. Thil nan tuahmi hmuahhmuah kha duhdawtnak thawn tuah uh” (1 Kor. 16:13-14).
Korin cakuat pakhatnak hi thubuai tampi thawn a pehpar awmi cakuat a si. Tuini kawhhran thubuai tampi thawn zohṭhim theihmi a si. An neihmi thubuai pawl cu thleidan awknak, uar hleicemi neinak, nuncan ziaza lam tlaksiatnak, lunghrinnak, thlarau laksawng thu ah puarthau le hngalnak tvp tla an si. Himi 1 Korin cakuat sungah duh a nung bikmi hmun cu bung 13 nak kha a si. 1 Korin 16:13-14 kan siar tikah fimkhurte ih um dingah forhfialnak, zumfeknak nei dingah, ral ṭha le cakzet ih um dingah, ziangkim tuahmi pawl hi duhdawtnak thawn tuah dingah ralrin a peknak thu kan hmu thei. Hiti ih ralrin a peknak hi zirhnak dik lo tampi a um ruangah a si. Tulai san thar sung khalah zirhnak dik lo tampi a um ih zumtu pawlin fimkhurte’n kan do lo ahcun Khristian pawl in siatsuah thluh ding phan a um nasa. Paul in Korin kawhhran hrangih a duhsakmi pawl kha felfaite’n an nun theinak dingah a forhnak pawl tla an si. Phundang deuh in kan sim a sile midang pawlin Pathian an theifiang theinak dingah zumtu pawlin an nunnak ah langter dingih a duhsaknak thu a si. Himi 1 Korin 16:13-14 sungih tarlangmi thuhla pawl cu a tanglam bangin kan zoh tlang hnik ding.
1. Fimkhurte in um uh.
Minung pawl nitin kan nunnak ah fimkhurte in le ralring te in um ringring ding a thupi ngaingai. Cutin kan um cing hmanin thil ti palhmi tampi a suak thei. Curuangah daithlang zetih kan um pang ahcun kan ralpa Satan ih thlemnak tangah kan pil hlo theimi a si. Cutin si lo dingah Paul in Fimkhurte ih um ding hi a forh hngainak a si. Piter khalin, “Fimvarte in um uh! Ralringte in um uh! Nan ralpa Satan cu deh ding hawlah a huuk reromi kiosa bangin a tawi a vak zok rero a si” a ti ve (1 Pit. 5:8). Vei tampi kan nunnak ah thu ṭhate’n ruat loin in kan um men caan tampi a um ko ding. Cutin kan um huahhi men ahcun ziangtik hmanah kan ṭhangso thei lo ding. Kan ralpa Satan ih bumnak tangah kan pilhlo cingcing ding. Pathian faate kan si kan ti ko nain leitlun kan um sung cu kan nunnak ṭhangsopi dingin a phunphun in tawlrel kan ṭul. Zumtu kan nunnak hi a kilkip in ṭhanglian vivo ding kan ṭul (Efe. 4:15). Cumi hrangah Pathian in kan ṭulsammi fimnak, thiamnak ziangkim in pe. Kanmah le tawk ciar thil titheinak khal in pek. Thuruat theinak a phunphun in pe. Fimkhurte ih um ter in duh ruangah a si. Daithlang in ummen ding in duh lo. Curuangah Paul in, “Nannih cu nan zate in tleunak sung ummi nan si; sun minung nan si. Thimnak sungmi kan si lo; zanih minung khal kan si lo. Curuangah midang pawl bangin itthat ding kan si lo; itthat loin fimhringtein a nung dingmi kan si” tiah in forhbet a si (1 Thess. 5:5-6).
2. Nan zumnak sungah hngetzet in ding uh.
Zumtu kan nunnak ah “hngetzet in ding” timi hi a thupizetmi a si. Kan dinnak hrampi a fek lo ahcun hngetzetin kan ding thei lo ding. Kan zumnak hrampi kha hngetkhoh ter ding a ṭul. Kiang le kap ah zirhnak a phunphun a hung suak ih ṭongkam thiam le ngainuam ṭongkam pawl hmangin mi bumtu tampi an um. Thudik thutak parah kan din lo ahcun zinpial zawh a ol te. Curuangah thudik, thutak a simi Jesuh Khrih lawng zohin hngetzet ih ding theiding a thupi ngaingai. Paul in, “Mi pakhat in hngetzet in ka ding tiah a ruat aw a sile a tluksawn lonak dingah ralring seh” a ti (1 Kor. 10:12). “Curuangah ka duhdawtmi u le nau pawl tlu lo dingin hnget zetin ding uh. Pathian hna cu taima zetin ṭuan ringring uh. Bawipa ih hnaṭuan cu a lak a si dah lo, ti nan thei” a ti bet hrih (1 Kor. 15:58). Piter khalin, “Nan zumnak hngetkhoh uhla Satan cu do uh, ziangahtile leilung tlun khuazakipih a ummi Khristian unau pawl khal hi bangtuk in harsatnak hi an tuar rero ve a si ti kha nan thei. Cule caan malte sung nan tuar hnuah zaangfahnak in a khatmi Khrih thawn nan pehzom awk ruangah amah thawn kumkhua sunlawinak hlawm aw dingih a lo kotu Pathian Amah rori in a lo famkimter ding ih hngetkhohnak le ṭhazaang cahnak a lo pe ding” a ti (1 Pit. 5:9-10). Cuihtlunah, “Sikhalsehla ka duhdawtmi tla, nannih hrangah cun himi cu nan theih cia mi a si. Curuangah ralring zetin um uh! Cin le daan nei lomi pawl in an lo hruai sual lonak dingah le him zetin nan umnak hmun ihsin nan tlak lonak dingah ralringte in um uh”a ti hrih (2 Pit. 3:17).
3. Ral ṭha le cakzet in um uh.
Ral ṭha le thutak in nung ding kan ṭul. Kan nunpi mi cu ṭihhrut loin phuang ngam kan ṭul. Pathian in ṭihhrut thlarau in pe lo: “Ziangahtile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si” (2 Tim. 1:7). Sim a ṭulnak ah hmaisong lote’n ral ṭhazet in sim le phuang ding a ṭul. Ziangahtile “Nan ral pawl kha ṭih hlah uh. Ral ṭha zetin um uh. Cumi cun annih an sung dingih nannih nehtu nan si ding ti kha a langter ding; ziangahtile nehnak a lo petu cu Pathian a si” tiah Baibal in in sim (Fil. 1:28). Pathian in Joshua hnenah, “Cakzet le ral ṭhazet in um aw tiih thu ka lo pekmi cu ziangtik hmanah hngilh hlah. Ṭih hlah, na thin nau hlah; ziangahtile Bawipa na Pathian keimah in na fehnak kipah ka lo umpi ding a si” a ti (Josh. 1:9). David a thihzik ah a fapa Solomon hnenih thu a cahmi cu Pathian rinsan in ral ṭhat ding hi a si (1 Siang. 2:2). “Job, pacang bangin ding aw la ka thusuhmi pawl i let hnik” tiah ral ṭhat ding a ṭulnak thu kan hmu (Job 40:7). Cuihtlunah Thlarau lam ah thazaang cakmi kan si ding khal a ṭul ngaingai (Efe. 6:10).
4. Thil nan tuahmi hmuahhmuah kha duhdawtnak thawn tuah uh.
Kawhhran sungah duhdawtnak diktak a um lo ruangah pawl ṭhen awknak a suak. A bur a bur in kan um. Pakhat le pakhat mawhthluk awknak, relsiat awknak a suahpi. “Asinain ka u le ka nau tla, nannih cu miluat si dingah kawhmi nan si. Sikhalsehla cuih luatnak cu nan taksa diriamternak ah canter hlah uh. Cuhnakin duhdawtnak thawn pakhat le pakhat rian aw in bawm aw ton uh. Ziangahtile Daan hmuahhmuah cu ‘Nangmah na duh awk vekin na innhnen na duhdaw pei’ timi thukham pakhat sungah hin a kimṭheh a si. Asinain hramlak ramsa bangin nan nung ih pakhat le pakhat nan keu, nan deh aw a si ahcun ralring uh, nan cemral leh ding a si” (Gal. 5:13). Piter in, “Ziang hmuahhmuah hnakin pakhat le pakhat nan thinlung taktein duhdaw aw uh, ziangahtile duhdawtnak in sualnak tampi a khuh thei a si” a ti (1 Pit. 4:8). Johan cun, “Zokhal tleunak sungah ka um a ti na’n a unau a huatu cu khawthim sungah a um hrih lai tinak a si. Zokhal a unau a duhdawtu cu tleunak sungah a um ih curuangah midang sualternak ding a sungah zianghman a um lo. Sikhalsehla a unau a huatu cu khawthim sungah a um a si; khawthim sung ahcun a tawivak ih thimnak in a mit a cawtter ruangah khuitawk lam ka pan ti hman a thei lo” (1 Joh. 2:10). Cule Pathian kan duhdawt kan timi hi kan unau parah langter ding a ṭulzia, hmuh theimi unau kan duhdaw lo ahcun thuphan per kan sizia a simfiang (1 Joh. 4:19-20). “Khrih ih in pekmi thukham cu hiti in a si: zokhal Pathian a duhdawtu cun a unau khal a duhdaw ve ding” (1 Joh. 4:21).
Thunetnak.
Zumtu pawl nitin kan nunnak ah kan neih ding a ṭulmi pawl cu Paul in Korin cakuat hmangin in zirh rero lai. Curuangah zumtu unau, nitin kan nunnak ah (a) Fimkhurte in um kan ṭul, (b) kan zumnak sungah hngetzet in kan ding a ṭul, (c) Ral ṭha le cakzet in um kan ṭul, (d) Thil kan tuahmi hmuahhmuah kha duhdawtnak thawn kan tuah a ṭul, timi pawl hi hngilh hlah uhsi. Cumi cu Baibal thianghlim ih in zirhmi a si.
Duhdawtnak le duhsaknak thawn,
Rev. CJ Hrang Hmung, Ph.D.,
Toungphila, Kalaymyo.
August 3, 2014 (Sun)|2:30pm|
“Fimkhurte in um uh, nan zumnak sungah hngetzet in ding uh; ral ṭha le cakzet in um uh. Thil nan tuahmi hmuahhmuah kha duhdawtnak thawn tuah uh” (1 Kor. 16:13-14).
Korin cakuat pakhatnak hi thubuai tampi thawn a pehpar awmi cakuat a si. Tuini kawhhran thubuai tampi thawn zohṭhim theihmi a si. An neihmi thubuai pawl cu thleidan awknak, uar hleicemi neinak, nuncan ziaza lam tlaksiatnak, lunghrinnak, thlarau laksawng thu ah puarthau le hngalnak tvp tla an si. Himi 1 Korin cakuat sungah duh a nung bikmi hmun cu bung 13 nak kha a si. 1 Korin 16:13-14 kan siar tikah fimkhurte ih um dingah forhfialnak, zumfeknak nei dingah, ral ṭha le cakzet ih um dingah, ziangkim tuahmi pawl hi duhdawtnak thawn tuah dingah ralrin a peknak thu kan hmu thei. Hiti ih ralrin a peknak hi zirhnak dik lo tampi a um ruangah a si. Tulai san thar sung khalah zirhnak dik lo tampi a um ih zumtu pawlin fimkhurte’n kan do lo ahcun Khristian pawl in siatsuah thluh ding phan a um nasa. Paul in Korin kawhhran hrangih a duhsakmi pawl kha felfaite’n an nun theinak dingah a forhnak pawl tla an si. Phundang deuh in kan sim a sile midang pawlin Pathian an theifiang theinak dingah zumtu pawlin an nunnak ah langter dingih a duhsaknak thu a si. Himi 1 Korin 16:13-14 sungih tarlangmi thuhla pawl cu a tanglam bangin kan zoh tlang hnik ding.
1. Fimkhurte in um uh.
Minung pawl nitin kan nunnak ah fimkhurte in le ralring te in um ringring ding a thupi ngaingai. Cutin kan um cing hmanin thil ti palhmi tampi a suak thei. Curuangah daithlang zetih kan um pang ahcun kan ralpa Satan ih thlemnak tangah kan pil hlo theimi a si. Cutin si lo dingah Paul in Fimkhurte ih um ding hi a forh hngainak a si. Piter khalin, “Fimvarte in um uh! Ralringte in um uh! Nan ralpa Satan cu deh ding hawlah a huuk reromi kiosa bangin a tawi a vak zok rero a si” a ti ve (1 Pit. 5:8). Vei tampi kan nunnak ah thu ṭhate’n ruat loin in kan um men caan tampi a um ko ding. Cutin kan um huahhi men ahcun ziangtik hmanah kan ṭhangso thei lo ding. Kan ralpa Satan ih bumnak tangah kan pilhlo cingcing ding. Pathian faate kan si kan ti ko nain leitlun kan um sung cu kan nunnak ṭhangsopi dingin a phunphun in tawlrel kan ṭul. Zumtu kan nunnak hi a kilkip in ṭhanglian vivo ding kan ṭul (Efe. 4:15). Cumi hrangah Pathian in kan ṭulsammi fimnak, thiamnak ziangkim in pe. Kanmah le tawk ciar thil titheinak khal in pek. Thuruat theinak a phunphun in pe. Fimkhurte ih um ter in duh ruangah a si. Daithlang in ummen ding in duh lo. Curuangah Paul in, “Nannih cu nan zate in tleunak sung ummi nan si; sun minung nan si. Thimnak sungmi kan si lo; zanih minung khal kan si lo. Curuangah midang pawl bangin itthat ding kan si lo; itthat loin fimhringtein a nung dingmi kan si” tiah in forhbet a si (1 Thess. 5:5-6).
2. Nan zumnak sungah hngetzet in ding uh.
Zumtu kan nunnak ah “hngetzet in ding” timi hi a thupizetmi a si. Kan dinnak hrampi a fek lo ahcun hngetzetin kan ding thei lo ding. Kan zumnak hrampi kha hngetkhoh ter ding a ṭul. Kiang le kap ah zirhnak a phunphun a hung suak ih ṭongkam thiam le ngainuam ṭongkam pawl hmangin mi bumtu tampi an um. Thudik thutak parah kan din lo ahcun zinpial zawh a ol te. Curuangah thudik, thutak a simi Jesuh Khrih lawng zohin hngetzet ih ding theiding a thupi ngaingai. Paul in, “Mi pakhat in hngetzet in ka ding tiah a ruat aw a sile a tluksawn lonak dingah ralring seh” a ti (1 Kor. 10:12). “Curuangah ka duhdawtmi u le nau pawl tlu lo dingin hnget zetin ding uh. Pathian hna cu taima zetin ṭuan ringring uh. Bawipa ih hnaṭuan cu a lak a si dah lo, ti nan thei” a ti bet hrih (1 Kor. 15:58). Piter khalin, “Nan zumnak hngetkhoh uhla Satan cu do uh, ziangahtile leilung tlun khuazakipih a ummi Khristian unau pawl khal hi bangtuk in harsatnak hi an tuar rero ve a si ti kha nan thei. Cule caan malte sung nan tuar hnuah zaangfahnak in a khatmi Khrih thawn nan pehzom awk ruangah amah thawn kumkhua sunlawinak hlawm aw dingih a lo kotu Pathian Amah rori in a lo famkimter ding ih hngetkhohnak le ṭhazaang cahnak a lo pe ding” a ti (1 Pit. 5:9-10). Cuihtlunah, “Sikhalsehla ka duhdawtmi tla, nannih hrangah cun himi cu nan theih cia mi a si. Curuangah ralring zetin um uh! Cin le daan nei lomi pawl in an lo hruai sual lonak dingah le him zetin nan umnak hmun ihsin nan tlak lonak dingah ralringte in um uh”a ti hrih (2 Pit. 3:17).
3. Ral ṭha le cakzet in um uh.
Ral ṭha le thutak in nung ding kan ṭul. Kan nunpi mi cu ṭihhrut loin phuang ngam kan ṭul. Pathian in ṭihhrut thlarau in pe lo: “Ziangahtile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si” (2 Tim. 1:7). Sim a ṭulnak ah hmaisong lote’n ral ṭhazet in sim le phuang ding a ṭul. Ziangahtile “Nan ral pawl kha ṭih hlah uh. Ral ṭha zetin um uh. Cumi cun annih an sung dingih nannih nehtu nan si ding ti kha a langter ding; ziangahtile nehnak a lo petu cu Pathian a si” tiah Baibal in in sim (Fil. 1:28). Pathian in Joshua hnenah, “Cakzet le ral ṭhazet in um aw tiih thu ka lo pekmi cu ziangtik hmanah hngilh hlah. Ṭih hlah, na thin nau hlah; ziangahtile Bawipa na Pathian keimah in na fehnak kipah ka lo umpi ding a si” a ti (Josh. 1:9). David a thihzik ah a fapa Solomon hnenih thu a cahmi cu Pathian rinsan in ral ṭhat ding hi a si (1 Siang. 2:2). “Job, pacang bangin ding aw la ka thusuhmi pawl i let hnik” tiah ral ṭhat ding a ṭulnak thu kan hmu (Job 40:7). Cuihtlunah Thlarau lam ah thazaang cakmi kan si ding khal a ṭul ngaingai (Efe. 6:10).
4. Thil nan tuahmi hmuahhmuah kha duhdawtnak thawn tuah uh.
Kawhhran sungah duhdawtnak diktak a um lo ruangah pawl ṭhen awknak a suak. A bur a bur in kan um. Pakhat le pakhat mawhthluk awknak, relsiat awknak a suahpi. “Asinain ka u le ka nau tla, nannih cu miluat si dingah kawhmi nan si. Sikhalsehla cuih luatnak cu nan taksa diriamternak ah canter hlah uh. Cuhnakin duhdawtnak thawn pakhat le pakhat rian aw in bawm aw ton uh. Ziangahtile Daan hmuahhmuah cu ‘Nangmah na duh awk vekin na innhnen na duhdaw pei’ timi thukham pakhat sungah hin a kimṭheh a si. Asinain hramlak ramsa bangin nan nung ih pakhat le pakhat nan keu, nan deh aw a si ahcun ralring uh, nan cemral leh ding a si” (Gal. 5:13). Piter in, “Ziang hmuahhmuah hnakin pakhat le pakhat nan thinlung taktein duhdaw aw uh, ziangahtile duhdawtnak in sualnak tampi a khuh thei a si” a ti (1 Pit. 4:8). Johan cun, “Zokhal tleunak sungah ka um a ti na’n a unau a huatu cu khawthim sungah a um hrih lai tinak a si. Zokhal a unau a duhdawtu cu tleunak sungah a um ih curuangah midang sualternak ding a sungah zianghman a um lo. Sikhalsehla a unau a huatu cu khawthim sungah a um a si; khawthim sung ahcun a tawivak ih thimnak in a mit a cawtter ruangah khuitawk lam ka pan ti hman a thei lo” (1 Joh. 2:10). Cule Pathian kan duhdawt kan timi hi kan unau parah langter ding a ṭulzia, hmuh theimi unau kan duhdaw lo ahcun thuphan per kan sizia a simfiang (1 Joh. 4:19-20). “Khrih ih in pekmi thukham cu hiti in a si: zokhal Pathian a duhdawtu cun a unau khal a duhdaw ve ding” (1 Joh. 4:21).
Thunetnak.
Zumtu pawl nitin kan nunnak ah kan neih ding a ṭulmi pawl cu Paul in Korin cakuat hmangin in zirh rero lai. Curuangah zumtu unau, nitin kan nunnak ah (a) Fimkhurte in um kan ṭul, (b) kan zumnak sungah hngetzet in kan ding a ṭul, (c) Ral ṭha le cakzet in um kan ṭul, (d) Thil kan tuahmi hmuahhmuah kha duhdawtnak thawn kan tuah a ṭul, timi pawl hi hngilh hlah uhsi. Cumi cu Baibal thianghlim ih in zirhmi a si.
Duhdawtnak le duhsaknak thawn,
Rev. CJ Hrang Hmung, Ph.D.,
Toungphila, Kalaymyo.
August 3, 2014 (Sun)|2:30pm|
No comments:
Post a Comment