TON A THEIH LAIAH BAWIPA HAWL UHSI

Baibal Caanghril:
“Ton a theih lai ah Bawipa cu hawl uh. A nailai ah amah ko uh. Mittha lo in an ziaza tlansan in an ruah daan thleng hai seh. Bawipa kan Pathian hnenah kir hai sehla, a ngaidam lohli ding. Amah cu mi zaangfahtu a si” (Isaiah 55:6-7).

Baibal siarbet: Amos 8:11-13; Matthai 24.

Thuhmaihruai.

Pathian thu le nuntu khawsaknak thu ah zirh awk daan tampi in a um. Kawl biaknak cun no lai caan ah fimthiamnak zir le hawl ding. Cu le hnattuan thei caan, cah lai caan ah taimak suahin hnattuan in sumsaw hawl ding. Kum upa hnu tar lam caan ah Pathian thu lam ah fehin Pathian hawl ding hi an zirh awknak thupibik a si (ပထမအရြယ္မွာ ပညာရွာ၊ ဒုတိယအရြယ္မွာ ဥစၥာရွာ၊ တတိယအရြယ္မွာ တရားရွာ). Pathian thu hi tar hnu lam lawngah hawl in Pathian hna ttuan ding hi an zirhnak tlangpi a si. Cuihtlunah Pathian hna ttuan ding thu khalah hin khopkham ih kan um thei lawngah Pathian thu sungah kan um thei ding tiah zirhnak an nei bet hrih (အူမေတာင့္မွ သီလေစာင့္ႏုိင္မည္).

A nung Pathian a biaktu zumtu tampi khal kan kiangkap ih zirhnak cawng in kan nunpi caan tampi a um thei men. Cutiin Pathian thu hi tar hnu ah le len hnu lawngah pan le hawl ding a si ahcun Baibal ih zirhnak thawn kan pial zo, tiah kan ti thei ding. Kan Baibal cun, Na tar hnu ah a ti lo. Fimthiamnak na zir ttheh hnu ah a ti lo. Sumsaw tampi na nei ih na len hnu ah a ti lo. Pathian mithmai ttha ngah caan cu “tuih caan, tuih ni hi a si” a ti ( 2 Kor.6:2). Atu hi kan hrangah Pathian kan hawl ding caan tthabik a si. Ziangahtile Pathian cun kanmah tong dingin kum tampi in hngak rero zo ruangah a si.

1. Bawipa kan hawl a ttul.
Minung kan sualnak ruangah Bawipa thawn kan pehzom-awknak a cat. Cuticun Bawipa thawn hlatnak hmun ah kan thleng. Pathian thawn pehzomnak kan nei thei nawn lo. Kan zatein a hlomi tuu bangin kan vakvai. Kan duhnak zin ciarah kan feh (Is. 53:6). Zumtu piangthar tampi khal kan tisa duhnak thlun in sual tuahnak ruangah Bawipa thawn kan hlat awk ttheu a si. Vei tampi kan nunnak ah leilung tlun sualnak tampi kan rak tuah ttheu. Pathian duhnak ziang a si timi hi thupi ih kan ret ngah lo caan tampi a um ttheu. Cuti cun Bawipa thawn kan hlat awk. Asinain Bawipa cun a hnen kir dingah in hngak ringring lai a si. Israel pawlih nunnak kan zoh tikah an sualnak a phunphun ruangah Bawipa thawn a hlat aw ringring ttheu. Israel mi pawl bangin kannih zumtu pawl khal Pathian thawn a hlatnak ah kan vakvai ringring. Curuangah hloral vakvaimi kan si lam theithiam aw in Bawipa kan hawl a ttul a si.

2. Ziangtin Bawipa kan hawl ding?
Daan Peksalnak 4:29 ah, “Cutawk ahcun Bawipa nan Pathian cu nan hawl dingih nan thin le nan lung taktein nan hawl ahcun Amah cu nan tong ding” timi thu kan hmu thei. Cuihtlun ah Bawipa in, “In hawl dingih in hmu ding. Nan thinlung takte ih in hawl tikah cun!” tiah a ti (Jeremiah 29:13). Kan thinlung takte le thungaithlaknak thawn Pathian kan hawl ding a ttul a si. Cutin kan hawl a sile Bawipa cu kan tong ngah tengteng ding. Bawipa hnenah panin kan hawl a ttul. Ziangahtile Jeim in, “Pathian pan uhla a lo pan ve ding,” a ti (Jeim 4:8). Bawipa hnen panin kan ko ahcun in sawn tengteng ding. Bawipa in, “I ko awla ka lo let ding. Na theih lomi thil khawruahhar le mangbangza ka lo sim ding” a ti (Jeremiah 33:3). Bawipa thawn ton awk theinak dingah nan thinlung taktein nan hawl a sile nan tong ding tiah kan hmu theinak a si. Mi hrekkhat in Bawipa cu kanmah in kan hawl thei lo. Bawipa in in hawl ruangah kanmah in hawl a ttul lo a titu an um thei men. Asinain Baibal cun Bawipa hawl ding le a hnen pan dingah in simmi hi kan hngilh lo ding a thupi zet.

3. Ziang caan ah Bawipa kan hawl ding?
Kan kum a no lai ihsin thokin Pathian naih le hawl ding kan ttul a si. Baibal sungah, “Na no laiah a lo sersiamtu thei aw. Harsatnak in a lo man hlanah le, kum le tikcu a her ih, thin nomnak zianghman ka nei nawn lo na ti hlanah hin” tiah kan hmu thei (Thusimtu 12:1). No lai caan ihsin Pathian a hawltu le a tong ngahtu pawl cu an nun sungah an sir aw dah lo. Pathian an thei deuhdeuh tikah harsatnak tampi an tong ko nain hlawhtlinnak tampi an ngah. Pathian ram hrangah thil thupi tamzet an tuah, an ttuan man. Pathian thuthangttha karhzainak hrangih pum a pe awtu tampi hi mino lai ihsin Pathian an tong ngah ruangah Pathian ram hrangah an nunnak tiang liamin pum an pe ngam. Hna tampi an ttuan man. William Carey, Jonathan Edward, Adoniram Judson, D. L. Moody, tvp. hi kum no te lai ihsin Pathian an tong, an piang thar ih Pathian thusim hminthang le Pathian mi hman ropi taktak ah an cang a si. Harsatnak tampi karlak ah Pathian in a hmang ruangah hlawhtlinnak tamzet an nei ih Pathian ram hrangah thil tampi a tuahsuak thei a si. Tuini khalah kum no tete Pathian mihman ropi tampi a suak rero. Tuante’n kan no lai caan ihsin Pathian kan hawl ahcun kan sir-aw dah lo ding. Curuangah Pathian kan tong ngah hrih lo ahcun no lai caan ihsin thokin tarkun tiang kan nun sungah Pathian kan hawl tengteng a ttul. Thinlung tak le thungai thlakin kan hawl ahcun Pathian kan tong tengteng ding. Ziangahtile Pathian cu kan hnenah a um ringring (Mat. 1:23).

4. Ton a theih laiah Bawipa kan hawl a ttul.
Baibal canghril kan tarlangmi kan zoh tikah ton a theihlai ah Bawipa hawl a ttulzia fiangzetin in sim. Ziangahtile Bawipa hi kan hawl ding nan kan tong thei lo caan a um lai ding ruangah a si. Amos 8:11-13 ah, “Hi ram sungih paam ka tlunter ding ni a ra thleng cing ding. Mipi pawl cu an ril a rawng ding na’n rawl duh rinrawn a si lo ding, an ti a haal ding na’n tidai duh tihal a si lo ding. Bawipa ih ttongkam theih duh rilrawng le tihal an si ding. Cungnungbik Bawipa keimah in ka sim zo a si. Mi pawl cu saklam in thlanglam ah, nisuahnak in nitlaknak ah an vakvai ding. Khuazakip ah Pathian ih ttongkam an hawl ding na’n an hmu lo ding. Cuih ni ahcun fala le tlangval harhdam zet pawl hman tihal in an bah an ril ding” tiah kan hmu thei. Cumi cu ni neta bik lam a khihhmuh ih a tu ah kan thleng phah rero thlang. Tuini kan san ih thil cang rero mi pawl kan zoh tikah Bawipai’ caan a nai zia hi kan hmu in kan theithei rero zo. Kan Baibal ih a rak simmi ni neta lamah cun sualnak a tam sinin ding, pakhat le pakhat an ral aw ding, raldonak thawmvang tampi nan thei ding, tvp. hi a tu kan san ah nasa takin a ra thleng rero thlang (Mat. 24). Cumi pawlcu Bawipa ratnak a nai zo timi khihhmuh langtertu pawl an si. Curuangah ton a theih lai ah Bawipa cun kan hawl a ttul a si. Tuini ah Bawipa cu ton theih in a um lai ruangah Bawipa kan tong hrih lo ahcun tong dingah hawl kan ttul. Zumtu unau, Bawipa ton a theih lo caan a um lai ding. Cuih caan ah Bawipa cu na hawlih na ko rero khal le zianghman sullam a nei nawn lo ding, man a nei nawn lo ding. Tui caan hi Bawipa ton thei dingah caan ttha kan nei laifang a si.

Thunetnak
Zumtu unau, tuini ah Bawipa thawn a hlat aw mi kan si pang maw? Bawipa thawn kan hlat aw hmanah Bawipa cu hawlin amai’ hnenah kirsal dingah caan ttha kan nei lai. Kanmah tong dingah Bawipa cun in hngak ringring a si. Luka 15:11-24 sung kan siar tikah fapa tlanhlo thu kan hmu. Fapa nautasawn cu a pai’ inn ihsin a tlanhlo ko. Sikhalsehla a pa cun ziangtikah ka fapa a rak tlungkir sal pei, tiin a hngak ringring. Cuvek tthiamtthiam in kan Pathian cun sualnak a phunphun tuah in, a thu ngai duh loin Amah thawn hlatnak ah kan feh ko hmanah ka faate hi ziangtikah a rak tlungkir sal pei tiah in cuan, in hngak ringring a si. Curuangah zumtu nang le kei hi Bawpa thawn hlatnak ah kan um pang a sile a caan um laiah Bawipa cu hawl uhsi. A nai lai ah amah ko in a hnen ah pan uhsi. Ton a theih laiah zumnak thawn Bawipa cu hawl uhsi. “Ziangahtile Pathian a pantu in Pathian a um, ti le amah a hawltu hnenah hawlman laksawng a pe, ti an zum a ttul a si” (Hebru 11:6).

Duhdawtnak le duhsaknak thawn,

Rev. CJ Hrang Hmung, PhD.,
Toungphila, Kalaymyo.
July 12, 2014|7:31pm